2282 திருக்கண்டேன் பொன்மேனிகண்டேன் * திகழும்

அருக்கனணிநிறமும் கண்டேன் * - செருக்கிளரும்

பொன்னாழிகண்டேன் புரிசங்கம்கைக்கண்டேன் *

என்னாழிவண்ணன்பாலின்று. (2)

2283 இன்றேகழல்கண்டேன் ஏழ்பிறப்பும்யானறுத்தேன் *

பொன்தோய்வரைமார்வில்பூந்துழாய் * - அன்று

திருக்கண்டுகொண்ட திருமாலே! * உன்னை

மருக்கண்டுகொண்டென்மனம்.

2284 மனத்துள்ளான் மாகடல்நீருள்ளான் * மலராள்

தனத்துள்ளான் தண்துழாய்மார்பன் * - சினத்துச்

செருநருகச்செற்றுகந்த தேங்கோதவண்ணன் *

வருநரகந்தீர்க்கும்மருந்து.

2285 மருந்தும்பொருளும் அமுதமும்தானே *

திருந்தியசெங்கண்மாலாங்கே * - பொருந்தியும்

நின்றுலகமுண்டுமிழ்ந்தும் நீரேற்றும்மூவடியால் *

அன்றுலகந்தாயோனடி.

2286 அடிவண்ணம்தாமரை அன்றுலகந்தாயோன் *

படிவண்ணம் பார்க்கடல்நீர்வண்ணம் * - முடிவண்ணம்

ஓராழிவெய்யோன் ஒளியுமஃதன்றே *

ஆராழிகொண்டாற்கழகு.

2287 அழகன்றேயாழியாற்கு ஆழிநீர்வண்ணம் *

அழகன்றேயண்டம்கடத்தல் * - அழகன்றே

அங்கைநீரேற்றாற் கலர்மேலோன்கால்கழுவ *

கங்கைநீர்கான்றகழல்.

2288 கழல்தொழுதும்வாநெஞ்சே! கார்கடல்நீர்வேலை *

பொழிலளந்தபுள்ளூர்திச்செல்வன் * - எழிலளந்தங்

கெண்ணற்கரியானை எப்பொருட்கும்சேயானை *

நண்ணற்கரியானைநாம்.

2289 நாமம்பலசொல்லி நாராயணாவென்று *

நாமங்கையால்தொழுதும்நன்னெஞ்சே! - வா * மருவி

மண்ணுலகமுண்டுமிழ்ந்த வண்டறையும்தண்துழாய் *

கண்ணனையேகாண்கநங்கண்.

2290 கண்ணும்கமலம் கமலமேகைத்தலமும் *

மண்ணளந்தபாதமும் மற்றவையே * எண்ணில்

கருமாமுகில்வண்ணன் கார்க்கடல்நீர்வண்ணன் *

திருமாமணிவண்ணன்தேசு.

2291 தேசும்திறலும் திருவுமுருவமும் *

மாசில்குடிப்பிறப்பும் மற்றவையும் - பேசில்

வலம்புரிந்தவான்சங்கம் கொண்டான்பேரோத *

நலம்புரிந்துசென்றடையும்நன்கு.

2292 நன்கோதும் நால்வேதத்துள்ளான் * நறவிரியும்

பொங்கோதருவிப்புனல்வண்ணன் * - சங்கோதப்

பாற்கடலான் பாம்பணையின்மேலான் * பயின்றுரைப்பார்

நூற்கடலான் நுண்ணறிவினான்.

2293 அறிவென்னும்தாள்கொளுவி ஐம்புலனும்தம்மில் *

செறிவென்னும்திண்கதவஞ்செம்மி * - மறையென்றும்

நன்கோதி நன்குணர்வார்காண்பரே * நாள்தோறும்

பைங்கோதவண்ணன்படி.

2294 படிவட்டத்தாமரை பண்டுலகம்நீரேற்று *

அடிவட்டத்தாலளப்ப நீண்ட - முடிவட்டம் *

ஆகாயமூடறுத்து அண்டம்போய்நீண்டதே *

மாகாயமாய்நின்றமாற்கு.

2295 மாற்பால்மனஞ்சுழிப்ப மங்கையர்தோள்கைவிட்டு *

நூற்பால்மனம்வைக்கநொய்விதாம் * -நாற்பால

வேதத்தான்வேங்கடத்தான் விண்ணோர்முடிதோயும் *

பாதத்தான்பாதம்பணிந்து.

2296 பணிந்துயர்ந்தபௌவப் படுதிரைகள்மோத *

பணிந்தபணமணிகளாலே - அணிந்து * அங்கு

அனந்தனணைக் கிடக்குமம்மான் * அடியேன்

மனந்தனணைக்கிடக்கும்வந்து.

2297 வந்துதைத்தவெண்திரைகள் செம்பவளவெண்முத்தம் *

அந்திவிளக்குமணிவிளக்காம் * - எந்தை

ஒருவல்லித்தாமரையாள் ஒன்றியசீர்மார்வன் *

திருவல்லிக்கேணியான்சென்று. (2)

2298 சென்றநாள்செல்லாத செங்கண்மாலெங்கள்மால் *

என்றநாளெந்நாளும்நாளாகும் * - என்றும்

இறவாதவெந்தை இணையடிக்கேயாளாய் *

மறவாதுவாழ்த்துகவென்வாய்.

2299 வாய்மொழிந்துவாமனனாய்மாவலிபால் * மூவடிமண்

நீயளந்துகொண்டநெடுமாலே? * - தாவியநின்

எஞ்சாவிணையடிக்கே ஏழ்பிறப்புமாளாகி *

அஞ்சாதிருக்கவருள்.

2300 அருளாதொழியுமே? ஆலிலைமேல் * அன்று

தெருளாதபிள்ளையாய்ச் சேர்ந்தான் * இருளாத

சிந்தையராய்ச்சேவடிக்கே செம்மலர்தூய்க்கைதொழுது *

முந்தையராய் நிற்பார்க்குமுன்.

2301 முன்னுலகம் உண்டுமிழ்ந்தாய்க்கு * அவ்வுலகமீரடியால்

பின்னளந்துகோடல்பெரிதொன்றே? - என்னே!

திருமாலே! செங்கணெடியானே! * எங்கள்

பெருமானே! நீயிதனைப்பேசு.

2302 பேசுவார் எவ்வளவுபேசுவர் * அவ்வளவே

வாசமலர்த்துழாய்மாலையான் * - தேசுடைய

சக்கரத்தான் சங்கினான்சார்ங்கத்தான் * பொங்கரவ

வக்கரனைக் கொன்றான் வடிவு.

2303 வடிவார்முடிகோட்டி வானவர்கள் * நாளும்

கடியார்மலர் தூவிக்காணும் - படியானை *

செம்மையாலுள்ளுருகிச் செவ்வனே நெஞ்சமே! *

மெய்ம்மையேகாணவிரும்பு.

2304 விரும்பிவிண்மண்ணளந்த அஞ்சிறையவண்டார் *

சுரும்புதொளையில்சென்றூத * அரும்பும்

புனந்துழாய்மாலையான் பொன்னங்கழற்கே *

மனம்துழாய்மாலாய்வரும்.

2305 வருங்காலிருநிலனும் மால்விசும்பும்காற்றும் *

நெருங்குதீநீருருவுமானான் * - பொருந்தும்

சுடராழி யொன்றுடையான்சூழ்கழலே * நாளும்

தொடராழிநெஞ்சே! தொழுது.

2306 தொழுதால்பழுதுண்டே? தூநீருலகம் *

முழுதுண்டுமொய்குழலாளாய்ச்சி * - இழுதுண்ட

வாயானை மால்விடையேழ்செற்றானை * வானவர்க்கும்

சேயானை நெஞ்சே! சிறந்து.

2307 சிறந்தவென்சிந்தையும் செங்கணரவும் *

நிறைந்தசீர்நீள்கச்சியுள்ளும் * - உறைந்ததும்

வேங்கடமும்வெஃகாவும் வேளுக்கைப்பாடியுமே *

தாங்கடவார்தண்துழாயார்.

2308 ஆரேதுயருழந்தார்? துன்புற்றாராண்டையார் *

காரேமலிந்தகருங்கடலை * நேரே

கடைந்தானைக் காரணனை * நீரணைமேற்பள்ளி

அடைந்தானை நாளுமடைந்து.

2309 அடைந்ததரவணைமேல், ஐவர்க்காய் * அன்று

மிடைந்தது பாரதவெம்போர் * - உடைந்ததுவும்

ஆய்ச்சிபால்மத்துக்கே அம்மனே * வாளெயிற்றுப்

பேய்ச்சிபாலுண்டபிரான்.

2310 பேய்ச்சிபாலுண்ட பெருமானைப்பேர்ந்தெடுத்து *

ஆய்ச்சிமுலைகொடுத்தாளஞ்சாதே * வாய்த்த

இருளார்திருமேனி இன்பவளச்செவ்வாய் *

தெருளாமொழியானைச்சேர்ந்து.

2311 சேர்ந்ததிருமால் கடல்குடந்தைவேங்கடம்

நேர்ந்தவென்சிந்தை நிறை விசும்பும் * - வாய்ந்த

மறைபாடகமனந்தன் வண்டுழாய்க்கண்ணி *

இறைபாடியாயவிவை.

2312 இவையவன்கோயில் இரணியனதாகம் *

அவைசெய்தரியுருவமானான் * - செவிதெரியா

நாகத்தான் நால்வேதத்துள்ளான் * நறவேற்றான்

பாகத்தான்பாற்கடலுளான்.

2313 பாற்கடலும்வேங்கடமும் பாம்பும்பனிவிசும்பும் *

நூற்கடலும்நுண்ணூலதாமரைமேல் * - பாற்பட்

டிருந்தார்மனமும் இடமாகக்கொண்டான் *

குருந்தொசித்தகோபாலகன்.

2314 பாலகனாய் ஆலிலைமேல்பைய * உலகெல்லாம்

மேலொருநாளுண்டவனே! மெய்ம்மையே * - மாலவனே!

மந்தரத்தால் மாநீர்க்கடல்கடைந்து * வானமுதம்

அந்தரத்தார்க்கீந்தாய்நீயன்று.

2315 அன்றிவ்வுலகம் அளந்தவசைவேகொல்? *

நின்றிருந்துவேளுக்கைநீள்நகர்வாய் * - அன்று

கிடந்தானைக்கேடில்சீரானை * முன்கஞ்சைக்

கடந்தானை நெஞ்சமே! காண்.

2316 காண்காணென விரும்பும்கண்கள் * கதிரிலகு

பூண்தாரகலத்தான் பொன்மேனி * - பாண்கண்

தொழில்பாடி வண்டறையும்தொங்கலான் * செம்பொன்

கழல்பாடியாம்தொழுதும்கை.

2317 கையகனலாழி கார்க்கடல்வாய்வெண்சங்கம் *

வெய்யகதைசார்ங்கம் வெஞ்சுடர்வாள் * செய்ய

படைபரவைபாழி பனிநீருலகம் *

அடியளந்த மாயரவற்கு.

2318 அவற்கடிமைப்பட்டேன் அகத்தான்புறத்தான் *

உவக்கும்கருங்கடல்நீருள்ளான் * துவர்க்கும்

பவளவாய்ப்பூமகளும் பன்மணிப்பூணாரம் *

திகழுந்திருமார்பன்தான்.

2319 தானேதனக்குவமன் தன்னுருவேயெவ்வுருவும் *

தானேதவவுருவும்தாரகையும் * - தானே

எரிசுடரும்மால்வரையும் எண்திசையும் * அண்டத்

திருசுடருமாயவிறை.

2320 இறையாய்நிலனாகி எண்திசையும்தானாய் *

மறையாய்மறைப்பொருளாய்வானாய் * - பிறைவாய்ந்த

வெள்ளத்தருவி விளங்கொலிநீர்வேங்கடத்தான் *

உள்ளத்தினுள்ளேயுளன்.

2321 உளன்கண்டாய்நல்னெஞ்சே! உத்தமனென்றும்

உளன்கண்டாய் * உள்ளுவாருள்ளத்து உளன்கண்டாய் *

விண்ணொங்கக்கோடுயரும் வீங்கருவிவேங்கடத்தான் *

மண்ணொடுங்கத்தானளந்தமன்.

2322 மன்னுமணிமுடிநீண்டு அண்டம்போயெண்திசையும் *

துன்னுபொழிலனைத்தும்சூழ்கழலே * - மின்னை

உடையாகக்கொண்டு அன்றுலகளந்தான் * குன்றம்

குடையாகஆகாத்தகோ.

2323 கோவலனாய் ஆநிரைகள்மேய்த்துக்குழலூதி *

மாவலனாய்க்கீண்ட மணிவண்ணன் * மேவி

அரியுருவமாகி இரணியனதாகம் *

தெரியுகிராற்கீண்டான்சினம்.

2324 சினமாமத களிற்றின் திண்மருப்பைச்சாய்த்து *

புனமேயபூமியதனை * - தனமாகப்

பேரகலத்துள்ளொடுக்கும் பேராரமார்வனார் *

ஓரகலத்துள்ளதுலகு.

2325 உலகமும் ஊழியுமாழியும் * ஒண்கேழ்

அலர்கதிருஞ்செந்தீயுமாவான் * பலகதிர்கள்

பாரித்த பைம்பொன்முடியானடியிணைக்கே *

பூரித்துஎன்நெஞ்சே! புரி.

2326 புரிந்துமதவேழம் மாப்பிடியோடூடி *

திரிந்துசினத்தால்பொருது * விரிந்தசீர்

வெண்கோட்டு முத்துதிர்க்கும்வேங்கடமே * மேலொருநாள்

மண்கோட்டுக்கொண்டான்மலை.

2327 மலைமுகடுமேல்வைத்து வாசுகியைச்சுற்றி *

தலைமுகடுதானொருகைபற்றி * அலைமுகட்டு

அண்டம்போய்நீர்தெறிப்ப அன்றுகடல்கடைந்தான் *

பிண்டமாய்நின்றபிரான்.

2328 நின்றபெருமானே! நீரேற்று * உலகெல்லாம்

சென்றபெருமானே? செங்கண்ணா! * - அன்று

துரகவாய்கீண்ட துழாய்முடியாய் * நாங்கள்

நரகவாய்கீண்டாயும் நீ.

2329 நீயன்றேநீரேற்று உலகமடியளந்தாய்? *

நீயன்றே நின்றுநிரைமேய்த்தாய் - நீயன்றே

மாவாயுரம்பிளந்து மாமருதினூடுபோய் *

தேவாசுரம்பொருதாய்செற்று?

2330 செற்றதுவும் சேராவிரணியனை * சென்றேற்றுப்

பெற்றதுவும் மாநிலம் பின்னைக்காய் * - முற்றல்

முரியேற்றின் முன்னின்றுமொய்ம்பொழித்தாய்! * மூரிச்

சுரியேறுசங்கினாய்! சூழ்ந்து.

2331 சூழ்ந்ததுழாயலங்கல் சோதிமணிமுடிமால் *

தாழ்ந்தவருவித்தடவரைவாய் * - ஆழ்ந்த

மணிநீர்ச்சுனைவளர்ந்த மாமுதலைகொன்றான் *

அணிநீலவண்ணத்தவன்.

2332 அவனே அருவரையால் ஆநிரைகள்காத்தான் *

அவனே அணிமருதஞ்சாய்த்தான் * - அவனே

கலங்காப்பெருநகரம் காட்டுவான்கண்டீர் *

இலங்காபுரமெரித்தானெய்து.

2333 எய்தான்மராமர மேழும்இராமனாய் *

எய்தானம்மான் மறியைஏந்திழைக்காய் * - எய்ததுவும்

தென்னிலங்கைக்கோன்வீழ, சென்றுகுறளுருவாய் *

முன்னிலங்கைக்கொண்டான்முயன்று.

2334 முயன்றுதொழுநெஞ்சே! மூரிநீர்வேலை *

இயன்றமரத்தாலிலையின்மேலால் * - பயின்றங்கோர்

மண்ணலங்கொள்வெள்ளத்து மாயக்குழவியாய் *

தண்ணலங்கல்மாலையான்தாள்.

2335 தாளால்சகடம் உதைத்துப்பகடுந்தி *

கீளாமருதிடைபோய்க்கேழலாய் * - மீளாது

மண்ணகலம்கீண்டு அங்கோர்மாதுகந்தமார்வற்கு *

பெண்ணகலங்காதல்பெரிது.

2336 பெரியவரைமார்வில் பேராரம்பூண்டு *

கரியமுகிலிடைமின்போல * - தெரியுங்கால்

பாணொடுங்க வண்டறையும்பங்கயமே * மற்றவன்றன்

நீணெடுங்கண்காட்டும் நிறம்.

2337 நிறம்வெளிதுசெய்து பசிதுகரிதென்று *

இறையுருவம்யாமறியோமெண்ணில் * - நிறைவுடைய

நாமங்கைதானும் நலம்புகழவல்லளே? *

பூமங்கைகேள்வன்பொலிவு.

2338 பொலிந்திருண்டகார்வானில் மின்னேபோல்தோன்றி *

மலிந்துதிருவிருந்தமார்வன் * - பொலிந்து

கருடன்மேற்கொண்ட கரியான்கழலே *

தெருடன்மேற்கண்டாய்தெளி.

2339 தெளிந்தசிலாதலத்தின் மேலிருந்தமந்தி *

அளிந்தகடுவனையேநோக்கி * - விளங்கிய

வெண்மதியம் தாவென்னும்வேங்கடமே * மேலொருநாள்

மண்மதியில்கொண்டுகந்தான்வாழ்வு.

2340 வாழும்வகையறிந்தேன் மைபோல்நெடுவரைவாய் *

தாழுமருவிபோல்தார்கிடப்ப * - சூழும்

திருமாமணிவண்ணன் செங்கண்மால் * எங்கள்

பெருமானடிசேரப்பெற்று.

2341 பெற்றம்பிணைமருதம் பேய்முலைமாச்சகடம் *

முற்றக்காத்தூடுபோயுண்டுதைத்து * - கற்றுக்

குணிலை விளங்கனிக்குக்கொண்டெறிந்தான் * வெற்றிப்

பணிலம்வாய்வைத்துகந்தான்பண்டு.

2342 பண்டெல்லாம்வேங்கடம் பாற்கடல்வைகுந்தம் *

கொண்டங்குறைவார்க்குக்கோயில்போல் * - வண்டு

வளங்கிளரும்நீள்சோலை வண்பூங்கடிகை *

இளங்குமரன்தன்விண்ணகர். (2)

2343 விண்ணகரம்வெஃகா விரிதிரைநீர்வேங்கடம் *

மண்ணகரம்மாமாடவேளுக்கை * மண்ணகத்த

தென்குடந்தை தேனார்திருவரங்கம்தென்கோட்டி *

தன்குடங்கைநீரேற்றான்தாழ்வு.

2344 தாழ்சடையும்நீள்முடியும் ஒள்மழுவும்சக்கரமும் *

சூழரவும்பொன்னாணும் தோன்றுமால் * சூழும்

திரண்டருவிபாயும் திருமலைமேலெந்தைக்கு *

இரண்டுருவுமொன்றாயிசைந்து.

2345 இசைந்தஅரவமும் வெற்பும்கடலும் *

பசைந்தங்கமுது படுப்ப * - அசைந்து

கடைந்தவருத்தமோ? கச்சிவெஃகாவில் *

கிடந்திருந்துநின்றதுவுமங்கு.

2346 அங்கற்கிடரின்றி அந்திப்பொழுதத்து *

மங்கவிரணியனதாகத்தை * பொங்கி

அரியுருவமாய்ப்பிளந்த அம்மானவனே *

கரியுருவங்கொம்பொசித்தான்காய்ந்து.

2347 காய்ந்திருளைமாற்றிக் கதிரிலகுமாமணிகள் *

ஏய்ந்தபணக்கதிர்மேல்வெவ்வுயிர்ப்ப * - வாய்ந்த

மதுகைடவரும் வயிறுருகிமாண்டார் *

அதுகேடவர்க்கிறுதியாங்கு.

2348 ஆங்குமலரும் குவியுமாலுந்திவாய் *

ஓங்கு கமலத்தினதொண்போது * - ஆங்கைத்

திகிரிசுடரென்றும் வெண்சங்கம் * வானில்

பகருமதியென்றும்பார்த்து.

2349 பார்த்தகடுவன் சுனைநீர்நிழல்கண்டு *

பேர்த்தோர் கடுவனெனப்பேர்ந்து * - கார்த்த

களங்கனிக்குக் கைநீட்டும்வேங்கடமே * மேனாள்

விளங்கனிக்குக் கன்றெறிந்தான்வெற்பு.

2350 வெற்பென்று வேங்கடம்பாடும் * வியன்துழாய்

கற்பென்றுசூடும் கருங்குழல்மேல் * மல்பொன்ற

நீண்டதோள்மால்கிடந்த நீள்கடல்நீராடுவான் *

பூண்டநாளெல்லாம்புகும்.

2351 புகுமதத்தால் வாய்பூசிக்கீழ்தாழ்ந்து * அருவி

உகுமதத்தால் கால்கழுவிக், கையால் * மிகுமதத்தேன்

விண்டமலர்கொண்டு விறல்வேங்கடவனையே *

கண்டுவணங்கும்களிறு.

2352 களிறுமுகில்குத்தக் கையெடுத்தோடி *

ஒளிறுமருப்பொசிகையாளி * - பிளிறி

விழ * கொன்றுநின்றதிரும் வேங்கடமே * மேல்நாள்

குழக்கன்றுகொண்டெறிந்தான் குன்று.

2353 குன்றொன்றினாய குறமகளிர்கோல்வளைக்கை *

சென்றுவிளையாடும்தீங்கழைபோய் * - வென்று

விளங்குமதிகோள்விடுக்கும் வேங்கடமே * மேலை

இளங்குமரர்கோமானிடம்.

2354 இடம்வலமேழ்பூண்ட இரவித்தேரோட்டி *

வடமுகவேங்கடத்துமன்னும் * - குடம்நயந்த

கூத்தனாய்நின்றான் குரைகழலேகூறுவதே *

நாத்தன்னாலுள்ளநலம்.

2355 நலமேவலிதுகொல்? நஞ்சூட்டுவன்பேய் *

நிலமேபுரண்டுபோய்வீழ * - சலமேதான்

வெங்கொங்கையுண்டானை மீட்டாய்ச்சியூட்டுவான் *

தன்கொங்கைவாய்வைத்தாள்சார்ந்து.

2356 சார்ந்தகடுதேய்ப்பத் தடாவியகோட்டுச்சிவாய் *

ஊர்ந்தியங்கும்வெண்மதியினொண்முயலை * - சேர்ந்து

சினவேங்கைபார்க்கும் திருமலையே * ஆயன்

புனவேங்கைநாறும்பொருப்பு.

2357 பொருப்பிடையேநின்றும் புனல்குளித்தும் * ஐந்து

நெருப்பிடையேநிற்கவும்நீர்வேண்டா * - விருப்புடைய

வெஃகாவேசேர்ந்தானை மெய்ம்மலர்தூய்க்கை தொழுதால் *

அஃகாவேதீவினைகளாய்ந்து.

2358 ஆய்ந்தவருமறையோன் நான்முகத்தோன்நன்குறங்கில் *

வாய்ந்தகுழவியாய்வாளரக்கன் * - ஏய்ந்த

முடிப்போது மூன்றேழென்றெண்ணினான் * ஆர்ந்த

அடிப்போதுநங்கட்குஅரண்.

2359 அரணாம்நமக்கென்றும் ஆழிவலவன் *

முரனாள்வலஞ் சுழிந்தமொய்ம்பன் * - சரணாமேல்

ஏதுகதி? ஏதுநிலை? ஏதுபிறப்பு என்னாதே *

ஓதுகதி மாயனையேயோர்த்து.

2360 ஓர்த்தமனத்தராய் ஐந்தடக்கியாராய்ந்து *

பேர்த்தால்பிறப்பேழும்பேர்க்கலாம் * - கார்த்த

விரையார்நறுந்துழாய் வீங்கோதமேனி *

நிரையாரமார்வனையேநின்று.

2361 நின்றெதிராய நிரைமணித்தேர்வாணன்தோள் *

ஒன்றியவீரைஞ்ஞூறுடன்துணிய * - வென்றிலங்கும்

ஆர்படுவான்நேமி யரவணையான் * சேவடிக்கே

நேர்படுவான்தான்முயலும்நெஞ்சு.

2362 நெஞ்சால் நினைப்பரியனேலும் நிலைபெற்றுஎன்

நெஞ்சமே! பேசாய் நினைக்குங்கால் * நெஞ்சத்துப்

பேராதுநிற்கும் பெருமானை, என்கொலோ? *

ஓராதுநிற்பதுணர்வு.

2363 உணரிலுணர்வரியன் உள்ளம்புகுந்து *

புணரிலும்காண்பரியனுண்மை * - இணரணையக்

கொங்கணைந்துவண்டறையும் தண்துழாய்க்கோமானை *

எங்கணைந்துகாண்டும்இனி?

2364 இனியவன்மாயன் எனவுரைப்பரேலும் *

இனியவன்காண்பரியனேலும் * - இனியவன்

கள்ளத்தால்மண்கொண்டு விண்கடந்தபைங்கழலான் *

உள்ளத்தினுள்ளேயுளன்.

2365 உளனாய நான்மறையின்உட்பொருளை * உள்ளத்

துளனாகத் தேர்ந்துணர்வரேலும் * - உளனாய

வண்தாமரைநெடுங்கண் மாயவனை, யாவரே? *

கண்டாருகப்பர்கவி.

2366 கவியினார்கைபுனைந்து கண்ணார்கழல்போய் *

செவியினார்கேள்வியராய்ச்சேர்ந்தார் * - புவியினார்

போற்றியுரைக்கப் பொலியுமே? * - பின்னைக்காய்

ஏற்றுயிரையட்டானெழில்.

2367 எழில்கொண்டு மின்னுக்கொடியெடுத்து * வேகத்

தொழில்கொண்டு தான்முழங்கித்தோன்றும் * - எழில்கொண்ட

நீர்மேகமன்ன நெடுமால்நிறம்போல *

கார்வானம்காட்டும்கலந்து.

2368 கலந்துமணியிமைக்கும் கண்ணா * நின்மேனி

மலர்ந்து மரதகமேகாட்டும் * - நலந்திகழும்

கொந்தின்வாய்வண்டறையும் தண்துழாய்க்கோமானை *

அந்திவான்காட்டுமது.

2369 அதுநன்றுஇதுதீதென்று ஐயப்படாதே *

மதுநின்றதண்துழாய்மார்வன் * - பொதுநின்ற

பொன்னங்கழலேதொழுமின் * முழுவினைகள்

முன்னம்கழலும்முடிந்து.

2370 முடிந்தபொழுதில் குறவாணர் * ஏனம்

படிந்துழுசால் பைந்தினைகள்வித்த * - தடிந்தெழுந்த

வேய்ங்கழைபோய் விண்திறக்கும்வேங்கடமே * மேலொருநாள்

தீங்குழல்வாய்வைத்தான்சிலம்பு.

2371 சிலம்பும்செறிகழலும்சென்றிசைப்ப * விண்ணாறு

அலம்பியசேவடிபோய் * அண்டம் - புலம்பியதோள்

எண்திசையும்சூழ இடம்போதாதென்கொலோ? *

வண்துழாய்மாலளந்தமண்.

2372 மண்ணுண்டும் பேய்ச்சிமுலையுண்டுமாற்றாதாய் *

வெண்ணெய்விழுங்கவெகுண்டு * ஆய்ச்சி - கண்ணிக்

கயிற்றினால்கட்டத் தான்கட்டுண்டிருந்தான் *

வயிற்றினோடாற்றாமகன்.

2373 மகனொருவர்க்கல்லாத மாமேனிமாயன் *

மகனாமவன்மகன்றன்காதல் - மகனை *

சிறைசெய்தவாணன்தோள் செற்றான்கழலே *

நிறைசெய்துஎன்நெஞ்சே! நினை.

2374 நினைத்துலகிலார்தெளிவார்? நீண்டதிருமால் *

அனைத்துலகுமுள்ளொடுக்கியால்மேல் * - கனைத்துலவு

வெள்ளத்தோர்பிள்ளையாய் மெள்ளத்துயின்றானை *

உள்ளத்தேவைநெஞ்சே! உய்த்து.

2375 உய்த்துணர்வென்னும் ஒளிகொள்விளக்கேற்றி *

வைத்து அவனைநாடிவலைப்படுத்தேன் * - மெத்தெனவே

நின்றானிருந்தான் கிடந்தானென்னெஞ்சத்து *

பொன்றாமைமாயன்புகுந்து.

2376 புகுந்திலங்கும் அந்திப்பொழுதகத்து * அரியாய்

இகழ்ந்தவிரணியனதாகம் * சுகிர்ந்தெங்கும்

சிந்தப்பிளந்த திருமால்திருவடியே *

வந்தித்துஎன்நெஞ்சமே! வாழ்த்து.

2377 வாழ்த்தியவாயராய் வானோர்மணிமகுடம் *

தாழ்த்திவணங்கத்தழும்பாமே * - கேழ்த்த

அடித்தாமரைமலர்மேல்மங்கைமணாளன் *

அடித்தாமரையாமலர்.

2378 அலரெடுத்தவுந்தியான் ஆங்கெழிலாய *

மலரெடுத்தமாமேனிமாயன் * - அலரெடுத்த

வண்ணத்தான் மாமலரான்வார்சடையான் * என்றிவர்கட்கு

எண்ணத்தானாமோ? இமை.

2379 இமஞ்சூழ்மலையும் இருவிசும்பும்காற்றும் *

அமஞ்சூழ்ந் தறவிளங்கித்தோன்றும் * - நமஞ்சூழ்

நரகத்து நம்மைநணுகாமல்காப்பான் *

துரகத்தைவாய்பிளந்தான்தொட்டு.

2380 தொட்டபடையெட்டும் தோலாதவென்றியான் *

அட்டபுயகரத்தானஞ்ஞான்று * - குட்டத்துக்

கோள்முதலைதுஞ்சக் குறித்தெறிந்தசக்கரத்தான் *

தாள்முதலேநங்கட்குச்சார்வு. (2)

2381 சார்வுநமக்கென்றும் சக்கரத்தான் * தண்துழாய்த்

தார்வாழ்வரைமார்பன்தான்முயங்கும் * - காரார்ந்த

வானமருமின்னிமைக்கும் வண்தாமரைநெடுங்கண் *

தேனமரும்பூமேல்திரு. (2)