2382 நான்முகனை நாராயணன்படைத்தான் * நான்முகனும்

தான்முகமாய்ச் சங்கரனைத்தான்படைத்தான் * - யான்முகமாய்

அந்தாதிமேலிட்டு அறிவித்தேனாழ்பொருளை *

சிந்தாமல்கொண்மிநீர்தேர்ந்து. (2)

2383 தேருங்கால்தேவன் ஒருவனேயென்றுரைப்பர் *

ஆருமறியாரவன்பெருமை * ஓரும்

பொருள்முடிவுமித்தனையே எத்தவம்செய்தார்க்கும்

அருள்முடிவதாழியான்பால்.

2384 பாலிற்கிடந்ததுவும் பண்டரங்கம்மேயதுவும் *

ஆலில்துயின்றதுவுமாரறிவார்? * - ஞாலத்

தொருபொருளை வானவர்தம்மெய்ப்பொருளை * அப்பில்

அருபொருளை யானறிந்தவாறு.

2385 ஆறுசடைக்கரந்தான் அண்டர்கோன்தன்னோடும் *

கூறுடையனென்பதுவும் கொள்கைத்தே * - வேறொருவ

ரில்லாமைநின்றானை எம்மானை * எப்பொருட்கும்

சொல்லானைச் சொன்னேன்தொகுத்து.

2386 தொகுத்தவரத்தனாய்த் தோலாதான்மார்வம் *

வகிர்த்தவளையுகிர்த்தோள்மாலே! * - உகத்தில்

ஒருநான்றுநீயுயர்த்தி உள் வாங்கிநீயே *

அருநான்குமானாயறி.

2387 அறியார்சமணர் அயர்த்தார்பவுத்தர் *

சிறியார்சிவப்பட்டார்செப்பில் * -வெறியாய

மாயவனைமாலவனை மாதவனையேத்தாதார்

ஈனவரேயாதலாலின்று.

2388 இன்றாக நாளையேயாக * இனிச்சிறிதும்

நின்றாக நின்னருளென்பாலதே * - நன்றாக

நானுன்னை அன்றி இலேன்கண்டாய் * நாரணனே!

நீயென்னையன்றியிலை.

2389 இலைதுணைமற்றென்னெஞ்சே ஈசனைவென்ற *

சிலைகொண்டசெங்கண்மால்சேரா * - குலைகொண்ட

ஈரைந்தலையான் இலங்கையையீடழித்த *

கூரம்பனல்லால்குறை.

2390 குறைகொண்டுநான்முகன் குண்டிகைநீர்பெய்து *

மறைகொண்டமந்திரத்தால் வாழ்த்தி * - கறைகொண்ட

கண்டத்தான் சென்னிமேலேறக் கழுவினான் *

அண்டத்தான்சேவடியையாங்கு.

2391 ஆங்காரவாரமதுகேட்டு * அழலுமிழும்

பூங்காரரவணையான் பொன்மேனி * - யாங்காண

வல்லமேயல்லமே? மாமலரான்வார்சடையான் *

வல்லரேயல்லரே? வாழ்த்து.

2392 வாழ்த்துகவாய் காண்ககண்கேட்கசெவி * மகுடம்

தாழ்த்திவணங்குமின்கள் தண்மலரால் * - சூழ்த்த

துழாய்மன்னும்நீள்முடி என்தொல்லைமால்தன்னை *

வழாவண்கைகூப்பிமதித்து.

2393 மதித்தாய்போய்நான்கின் மதியார்போய்வீழ *

மதித்தாய், மதிகோள்விடுத்தாய்! * - மதித்தாய்

மடுக்கிடந்த மாமுதலைகோள்விடுப்பான் * ஆழி

விடற்கிரண்டும்போயிரண்டின்வீடு.

2394 வீடாக்கும் பெற்றியறியாது * மெய்வருத்திக்

கூடாக்கி நின்றுண்டுகொண்டுழல்வீர்! * - வீடாக்கும்

மெய்ப்பொருள்தான்வேதமுதற்பொருள்தான் * விண்ணவர்க்கு

நற்பொருள்தான் நாராயணன்.

2395 நாராயணண் என்னையாளி * நரகத்துச்

சேராமல்காக்கும் திருமால்தன் * பேரான

பேசப்பெறாத பிணச்சமயர்பேசக்கேட்டு *

ஆசைப்பட்டாழ்வார்பலர்.

2396 பலதேவரேத்தப் படிகடந்தான்பாதம் *

மலரேறவிட்டிறைஞ்சிவாழ்த்த - வலராகில் *

மார்க்கண்டன்கண்டவகையே வருங்கண்டீர் *

நீர்க்கண்டன்கண்டநிலை.

2397 நிலைமன்னுமென்னெஞ்சம் அந்நான்று * தேவர்

தலைமன்னர்தாமே மாற்றாக * - பலமன்னர்

போர்மாள வெங்கதிரோன்மாயப், பொழில்மறைய *

தேராழியால்மறைத்தாரால்.

2398 ஆலநிழற்கீழ் அறநெறியை * நால்வர்க்கு

மேலையுகத்துரைத்தான் மெய்த்தவத்தோன் * - ஞால

மளந்தானை ஆழிக்கிடந்தானை * ஆல்மேல்

வளர்ந்தானைத் தான்வணங்குமாறு.

2399 மாறாயதானவனை வள்ளுகிரால் * மார்விரண்டு

கூறாகக் கீறியகோளரியை * - வேறாக

ஏத்தியிருப்பாரை வெல்லுமே * மற்றவரைச்

சார்த்தியிருப்பார்தவம்.

2400 தவஞ்செய்து நான்முகனால்பெற்றவரத்தை *

அவஞ்செய்த ஆழியாயன்றே * உவந்தெம்மைக்

காப்பாய்நீ காப்பதனையாவாய்நீ * வைகுந்தம்

ஈப்பாயுமெவ்வுயிர்க்கும்நீ.

2401 நீயேயுலகெல்லாம் நின்னருளேநிற்பனவும் *

நீயே தவத்தேவதேவனும் * - நீயே

எரிசுடரும்மால்வரையும் எண்திசையும் * அண்டத்

திருசுடருமாயவிவை.

2402 இவையா! பிலவாய் திறந்தெரிகான்ற *

இவையா! எரிவட்டக் கண்கள் * - இவையா!

எரிபொங்கிக்காட்டும் இமையோர்பெருமான் *

அரிபொங்கிக்காட்டுமழகு.

2403 அழகியான்தானே அரியுருவன்தானே *

பழகியான்தாளேபணிமின் * - குழவியாய்த்

தானேழுலகுக்கும் தன்மைக்குந்தன்மையனே *

மீனாயுயிரளிக்கும்வித்து.

2404 வித்துமிடவேண்டுங்கொல்லோ? * விடைஅடர்த்த

பத்தியுழவன்பழம்புனத்து * - மொய்த்தெழுந்த

கார்மேகமன்ன கருமால்திருமேனி *

நீர்வானங்காட்டும் நிகழ்ந்து.

2405 நிகழ்ந்தாய் பால்பொன்பசுப்புக்கார்வண்ணம்நான்கும் *

இகழ்ந்தாயிருவரையும்வீய * - புகழ்ந்தாய்

சினப்போர்ச்சுவேதனைச் சேனாபதியாய் *

மனப்போர்முடிக்கும்வகை.

2406 வகையால்மதியாது மண்கொண்டாய் * மற்றும்

வகையால் வருவதொன்றுண்டே! * வகையால்

வயிரம்குழைத்துண்ணும் மாவலிதானென்னும் *

வயிரவழக்கொழித்தாய்மற்று.

2407 மற்றுத்தொழுவார் ஒருவரையும்யானின்மை *

கற்றைச்சடையான்கரிக்கண்டாய் * எற்றைக்கும்

கண்டுகொள் கண்டாய் கடல்வண்ணா * யானுன்னைக்

கண்டுகொள்கிற்குமாறு.

2408 மால்தான்புகுந்த மட நெஞ்சம் * மற்றதுவும்

பேறாகக்கொள்வனோ? பேதைகாள்! * நீறாடி

தான்காணமாட்டாத தாரகலச்சேவடியை *

யான்காணவல்லேற்கிது.

2409 இதுவிலங்கையீடழியக் கட்டியசேது *

இதுவிலங்குவாலியை வீழ்த்ததுவும் * - இதுவிலங்கை

தானொடுங்கவில்நுடங்கத் தண்தாரிராவணனை *

ஊனொடுங்கவெய்தானுகப்பு.

2410 உகப்புருவன்தானே ஒளியுருவன்தானே *

மகப்புருவன்தானேமதிக்கில் * - மிகப்புருவம்

ஒன்றுக்கொன்று ஓசனையான்வீழ * ஒருகணையால்

அன்றிக்கொண்டெய்தானவன்.

2411 அவனென்னையாளி அரங்கத்து * அரங்கில்

அவனென்னையெய்தாமல்காப்பான் * அவனென்ன

துள்ளத்து நின்றானிருந்தான்கிடக்குமே *

வெள்ளத்தரவணையின்மேல்.

2412 மேல்நான்முகன் அரனையிட்டவிடுசாபம் *

தான்நாரணனொழித்தான் தாரகையுள் * வானோர்

பெருமானை ஏத்தாதபேய்காள்! * பிறக்கும்

கருமாயம்பேசின்கதை.

2413 கதைப்பொருள்தான் கண்ணன்திருவயிற்றினுள்ள *

உதைப்பளவு போதுபோக்கின்றி * - வதைப்பொருள்தான்

வாய்ந்தகுணத்துப் படாததுஅடைமினோ *

ஆய்ந்தகுணத்தானடி.

2414 அடிச்சகடஞ்சாடி அரவாட்டி * யானை

பிடித்தொசித்துப் பேய்முலைநஞ்சுண்டு * - வடிப்பவள

வாய்ப்பின்னைதோளிக்கா வல்லேற்றெருத்திறுத்து *

கோப்பின்னுமானான்குறிப்பு.

2415 குறிப்பெனக்குக் கோட்டியூர்மேயானையேத்த *

குறிப்பெனக்கு நன்மைபயக்க * - வெறுப்பனோ?

வேங்கடத்துமேயானை மெய்வினைநோயெய்தாமல் *

தான்கடத்தும்தன்மையான்தாள்.

2416 தாளால் உலகம் அளந்தவசைவேகொல்? *

வாளாகிடந்தருளும் வாய்திறவான் * - நீளோதம்

வந்தலைக்கும்மாமயிலை மாவல்லிக்கேணியான் *

ஐந்தலைவாய்நாகத்தணை. (2)

2417 நாகத்தணைக்குடந்தை வெஃகாதிருவெவ்வுள் *

நாகத்தணையரங்கம் பேரன்பில் * - நாகத்

தணைப்பாற்கடல்கிடக்கும் ஆதிநெடுமால் *

அணைப்பார்கருத்தனாவான்.

2418 வானுலவுதீவளி மாகடல்மாபொருப்பு *

தானுலவுவெங்கதிரும் தண்மதியும் * - மேனிலவு

கொண்டல்பெயரும் திசையெட்டும்சூழ்ச்சியும் *

அண்டந்திருமாலகைப்பு.

2419 அகைப்பில்மனிசரை ஆறுசமயம்

புகைத்தான் * பொருகடல்நீர்வண்ணன் * - உகைக்குமேல்

எத்தேவர்வாலாட்டும் எவ்வாறுசெய்கையும் *

அப்போதொழியுமழைப்பு.

2420 அழைப்பன் திருவேங்கடத்தானைக்காண *

இழைப்பன் திருக்கூடல்கூட * - மழைப்பே

ரருவி மணி வரன்றிவந்திழிய * யானை

வெருவியரவொடுங்கும்வெற்பு.

2421 வெற்பென்று வேங்கடம்பாடினேன் * வீடாக்கி

நிற்கின்றேன் நின்றுநினைக்கின்றேன் * கற்கின்ற

நூல்வலையில்பட்டிருந்த நூலாட்டிகேள்வனார் *

கால்வலையில்பட்டிருந்தேன்காண்.

2422 காணலுறுகின்றேன் கல்லருவிமுத்துதிர *

ஓணவிழவிலொலியதிர * பேணி

வருவேங்கடவா! என்னுள்ளம்புகுந்தாய் *

திருவேங்கடமதனைச்சென்று.

2423 சென்றுவணங்குமினோ சேணுயர்வேங்கடத்தை *

நின்றுவினைகெடுக்கும் நீர்மையால் * -என்றும்

கடிக்கமலநான்முகனும் கண்மூன்றத்தானும் *

அடிக்கமலமிட்டேத்துமங்கு.

2424 மங்குல்தோய்சென்னி வடவேங்கடத்தானை *

கங்குல்புகுந்தார்கள் காப்பணிவான் * - திங்கள்

சடையேறவைத்தானும் தாமரைமேலானும் *

குடையேறத்தாம்குவித்துக்கொண்டு.

2425 கொண்டுகுடங்கால்மேல் வைத்தகுழவியாய் *

தண்டவரக்கன்தலைதாளால் - பண்டெண்ணி *

போம்குமரன் நிற்கும் பொழில்வேங்கடமலைக்கே *

போம்குமரருள்ளீர்! புரிந்து.

2426 புரிந்துமலரிட்டுப் புண்டரீகப்பாதம் *

பரிந்துபடுகாடுநிற்ப * - தெரிந்தெங்கும்

தானோங்கிநிற்கின்றான் தண்ணருவிவேங்கடமே *

வானோர்க்கும்மண்ணோர்க்கும்வைப்பு.

2427 வைப்பன்மணிவிளக்கா மாமதியை * மாலுக்கென்று

எப்பொழுதும் கைநீட்டும்யானையை * - எப்பாடும்

வேடுவளைக்கக் குறவர்வில்லெடுக்கும்வேங்கடமே *

நாடுவளைத் தாடுதுமேல்நன்று.

2428 நன்மணிவண்ணனூர் ஆளியும்கோளரியும் *

பொன்மணியும்முத்தமும் பூமரமும் * - பன்மணிநீ

ரோடுபொருதுருளும் கானமும்வானரமும் *

வேடுமுடைவேங்கடம்.

2429 வேங்கடமே விண்ணோர்தொழுவதுவும் * மெய்ம்மையால்

வேங்கடமே மெய்வினைநோய்தீர்ப்பதுவும் * - வேங்கடமே

தானவரைவீழத் தன்னாழிப்படைதொட்டு *

வானவரைக்காப்பான்மலை.

2430 மலையாமைமேல்வைத்து வாசுகியைச்சுற்றி *

தலையாமைதானொருகைபற்றி * - அலையாமல்

பீறக்கடைந்த பெருமான்திருநாமம் *

கூறுவதேயாவர்க்கும்கூற்று.

2431 கூற்றமும்சாரா கொடுவினையும்சாரா * தீ

மாற்றமும்சாராவகையறிந்தேன் * - ஆற்றங்

கரைக்கிடக்கும்கண்ணன் கடல்கிடக்கும் * மாயன்

உரைக்கிடக்குமுள்ளத்தெனக்கு.

2432 எனக்காவார் ஆரொருவரே? * எம்பெருமான்

தனக்காவான் தானேமற்றல்லால் * புனக்காயா

வண்ணனே! உன்னைப்பிறரறியார் * என்மதிக்கு

விண்ணெல்லாமுண்டோவிலை?

2433 விலைக்காட்படுவர் விசாதியேற்றுண்பர் *

தலைக்காட்பலிதிரிவர்தக்கோர் * - முலைக்கால்

விடமுண்டவேந்தனையே வேறாவேத்தாதார் *

கடமுண்டார்கல்லாதவர்.

2434 கல்லாதவர்இலங்கை கட்டழித்த * காகுத்தன்

அல்லால் ஒருதெய்வம்யானிலேன் * - பொல்லாத

தேவரைத் தேவரல்லாரை * திருவில்லாத்

தேவரைத் தேறேல்மின்தேவு.

2435 தேவராய்நிற்கும் அத்தேவும் * அத்தேவரில்

மூவராய்நிற்கும் முதுபுணர்ப்பும் * - யாவராய்

நிற்கின்றதெல்லாம் நெடுமாலென்றோராதார் *

கற்கின்றதெல்லாம்கடை.

2436 கடைநின்றமரர் கழல்தொழுது * நாளும்

இடைநின்றவின்பத்தராவர் * - புடைநின்ற

நிரோதமேனி நெடுமாலே! * நின்னடியை

யாரோதவல்லாரவர்?

2437 அவரிவரென்றில்லை அனங்கவேள்தாதைக்கு *

எவருமெதிரில்லைகண்டீர் * - உவரிக்

கடல்நஞ்சமுண்டான் கடனென்று * வாணற்கு

உடன்நின்றுதோற்றானொருங்கு.

2438 ஒருங்கிருந்தநல்வினையும் தீவினையுமாவான் *

பெருங்குருந்தம்சாய்த்தவனேபேசில் * - மருங்கிருந்த

வானவர்தாம்தானவர்தாம் தாரகைதான் * என்னெஞ்ச

மானவர்தாம் அல்லாததென்?

2439 என்னெஞ்சமேயான் இருள்நீக்கிஎம்பிரான் *

மன்னஞ்சமுன்னொருநாள் மண்ணளந்தான் * - என்னெஞ்ச

மேயானை இல்லாவிடையேற்றான் * வெவ்வினை தீர்த்து

ஆயானுக்காக்கினேனன்பு.

2440 அன்பாவாய் ஆரமுதமாவாய் * அடியேனுக்கு

இன்பாவாய் எல்லாமும்நீயாவாய் * - பொன்பாவை

கேள்வா! கிளரொளியென்கேசவனே! * கேடின்றி

ஆள்வாய்க்குஅடியேன்நானாள்.

2441 ஆட்பார்த்துழிதருவாய் கண்டுகொளென்றும் * நின்

தாட்பார்த் துழிதருவேன் தன்மையை * கேட்பார்க்கு

அரும்பொருளாய் நின்ற அரங்கனே! * உன்னை

விரும்புவதே விள்ளேன்மனம்.

2442 மனக்கேதம்சாரா மதுசூதன்தன்னை *

தனக்கேதான் தஞ்சமாக்கொள்ளில் * - எனக்கேதான்

இன்றொன்றிநின்றுஉலகையேழ் ஆணையோட்டினான் *

சென்றொன்றிநின்றதிரு.

2443 திருநின்றபக்கம் திறவிதென்றோரார் *

கருநின்றகல்லார்க்குஉரைப்பர் * - திருவிருந்த

மார்பன் சிரீதரன்றன் வண்டுலவுதண்துழாய் *

தார்தன்னைச் சூடித்தரித்து.

2444 தரித்திருந்தேனாகவே தாராகணப்போர் *

விரித்துரைத்தவெந்நாகத்துன்னை * - தெரித்தெழுதி

வாசித்தும்கேட்டும் வணங்கிவழிபட்டும் *

பூசித்தும்போக்கினேன்போது.

2445 போதான இட்டிறைஞ்சியேத்துமினோ * பொன்மகரக்

காதானை ஆதிப்பெருமானை * - நாதானை

நல்லானைநாரணனை நம்மேழ்பிறப்பறுக்கும்

சொல்லானை * சொல்லுவதேசூது.

2446 சூதாவது என்நெஞ்சத்தெண்ணினேன் * சொல்மாலை

மாதாய மாலவனைமாதவனை * - யாதானும்

வல்லவா சிந்தித்திருப்பேற்கு * வைகுந்தத்து

இல்லையோசொல்லீரிடம்?

2447 இடமாவது என்னெஞ்சமின்றெல்லாம் * பண்டு

படநாகணை நெடியமாற்கு * - திடமாக

வையேன் மதிசூடிதன்னோடு * அயனைநான்

வையேன் ஆட்செய்யேன்வலம்.

2448 வலமாக மாட்டாமைதானாக * வைகல்

குலமாக குற்றம்தானாக * - நலமாக

நாரணனைநாபதியை ஞானப்பெருமானை *

சீரணனையேத்துந்திறம்.

2449 திறம்பேன்மின்கண்டீர் திருவடிதன்நாமம் *

மறந்தும்புறந்தொழாமாந்தர் * - இறைஞ்சியும்

சாதுவராய்ப் போதுமின்களென்றான் * நமனும்தன்

தூதுவரைக்கூவிச்செவிக்கு.

2450 செவிக்கின்பமாவதுவும் செங்கண்மால்நாமம் *

புவிக்கும்புவியதுவேகண்டீர் * - கவிக்கு

நிறைபொருளாய்நின்றானை நேர்பட்டேன் * பார்க்கில்

மறைப்பொருளுமத்தனையே தான்.

2451 தானொருவனாகித் தரணியிடந்தெடுத்து *

ஏனொருவனாய் எயிற்றில்தாங்கியதும் * - யானொருவன்

இன்றாவறிகின்றேனல்லேன் * இருநிலத்தைச்

சென்றாங்கடிப்படுத்தசேய்.

2452 சேயனணியன் சிறியன்மிகப்பெரியன் *

ஆயன் துவரைக்கோனாய்நின்ற - மாயன் * அன்று

ஓதிய வாக்கதனைக்கல்லார் * உலகத்தில்

ஏதிலராம் மெய்ஞ்ஞானமில்.

2453 இல்லறமில்லேல் துறவறமில்லென்னும் *

சொல், அறமல்லனவும்சொல்லல்ல * - நல்லற

மாவனவும் நால்வேதமாத்தவமும் * நாரணனே

யாவது ஈதன்றென்பாரார்?

2454 ஆரேயறிவார்? அனைத்துலகுமுண்டுமிழ்ந்த *

பேராழியான்தன்பெருமையை * - கார்செறிந்த

கண்டத்தான் எண்கண்ணான்காணான் * அவன்வைத்த

பண்டைத்தானத்தின்பதி.

2455 பதிப்பகைஞர்க்காற்றாது பாய்திரைநீர்ப்பாழி *

மதித்தடைந்த வாளரவந்தன்னை * - மதித்தவன்தன்

வல்லாகத்தேற்றிய மாமேனி மாயவனை *

அல்லாது ஒன்றேத்தாதென்நா.

2456 நாக்கொண்டு மானிடம்பாடேன் * நலமாகத்

தீக்கொண்ட செஞ்சடையான்சென்று * என்றும் - பூக்கொண்டு

வல்லவாறு ஏத்தமகிழாத * வைகுந்தச்

செல்வனார்சேவடிமேற்பாட்டு.

2457 பாட்டும்முறையும் படுகதையும்பல்பொருளும் *

ஈட்டியதீயும் இருவிசும்பும் * - கேட்ட

மனுவும் சுருதிமறைநான்கும் * மாயன்

தனமாயையில்பட்டதற்பு.

2458 தற்பென்னைத் தானறியானேலும் * தடங்கடலைக்

கற்கொண்டு தூர்த்தகடல்வண்ணன் * - எற்கொண்ட

வெவ்வினையும்நீங்க விலங்காமனம்வைத்தான் *

எவ்வினையும்மாயுமால்கண்டு.

2459 கண்டுவணங்கினார்க்கு என்னாங்கொல்? * காமனுடல்

கொண்டதவத்தாற்கு உமையுணர்த்த * - வண்டலம்பும்

தாரலங்கல்நீள்முடியான்தன் பெயரேகேட்டிருந்து * அங்

காரலங்கலானமையாலாய்ந்து.

2460 ஆய்ந்துகொண்டு ஆதிப்பெருமானை * அன்பினால்

வாய்ந்தமனத்து இருத்தவல்லார்கள் * - ஏய்ந்ததம்

மெய், குந்தமாக விரும்புவரே * தாமும்தம்

வைகுந்தம்காண்பார்விரைந்து.

2461 விரைந்தடைமின்மேலொருநாள் வெள்ளம்பரக்க *

கரந்துலகம் காத்தளித்தகண்ணன் * - பரந்துலகம்

பாடின, ஆடினகேட்டு * படுநரகம்

வீடினவாசற்கதவு.

2462 கதவுமனமென்றும் காணலாமென்றும் *

குதையும்வினையாவிதீர்ந்தேன் * - விதையாக

நல்தமிழைவித்தி என்னுள்ளத்தைநீவிளைத்தாய் *

கற்றமொழியாகிக்கலந்து.

2463 கலந்தானென்னுள்ளத்துக் காமவேள்தாதை *

நலந்தானுமீதொப்பதுண்டே? * - அலர்ந்தலர்கள்

இட்டேத்தும் ஈசனும் நான்முகனும் * என்றிவர்கள்

விட்டேத்தமாட்டாதவேந்து.

2464 வேந்தராய்விண்ணவராய் விண்ணாகித்தண்ணளியாய் *

மாந்தராய்மாதாய் மற்றெல்லாமாய் * - சார்ந்தவர்க்குத்

தன்னாற்றான் நேமியான் மால்வண்ணன்தான்கொடுக்கும் *

பின்னால்தான் செய்யும்பிதிர்.

2465 பிதிரும்மனமிலேன் பிஞ்ஞகன்தன்னோடு

எதிர்வன் * அவனெனக்குநேரான் * - அதிரும்

கழற்காலமன்னனையே கண்ணனையே * நாளும்

தொழக்காதல்பூண்டேன்தொழில்.

2466 தொழிலெனெக்குத் தொல்லைமால்தன்னாமமேத்த *

பொழுதெனக்கு மற்றதுவேபோதும் * - கழிசினத்த

வல்லாளன் வானரக்கோன்வாலிமதனழித்த *

வில்லாளன் நெஞ்சத்துளன்.

2467 உளன்கண்டாய்நன்நெஞ்சே! உத்தமனென்றும்

உளன்கண்டாய் * உள்ளுவாருள்ளத்து - உளன்கண்டாய் *

தன்னொப்பான்தானாய் உளன்காண்தமியேற்கும் *

என்னொப்பார்க்கீசனிமை.

2468 இமையப்பெருமலைபோல் இந்திரனார்க்கிட்ட *

சமயவிருந்துண்டு ஆர்காப்பார்? * சமயங்கள்

கண்டானவைகாப்பான் கார்க்கண்டன்நான்முகனோடு *

உண்டானுலகோடுயிர்.

2469 உயிர்கொண்டுடலொழிய ஓடும்போதோடி *

அயர்வென்றதீர்ப்பான் பேர்பாடி * - செயல்தீரச்

சிந்தித்து வாழ்வாரேவாழ்வார் * சிறுசமயப்

பந்தனையார்வாழ்வேல்பழுது.

2470 பழுதாகாதொன்றறிந்தேன் பாற்கடலான்பாதம் *

வழுவாவகைநினைந்து வைகல் - தொழுவாரை *

கண்டிறைஞ்சிவாழ்வார் கலந்தவினைகெடுத்து *

விண்திறந்துவீற்றிருப்பார்மிக்கு.

2471 வீற்றிருந்து விண்ணாளவேண்டுவார் * வேங்கடத்தான்

பால்திருந்தவைத்தாரே பல்மலர்கள் * - மேல்திருந்த

வாழ்வார் வருமதிபார்த்துஅன்பினராய் * மற்றவர்க்கே

தாழ்வாயிருப்பார்தமர்.

2472 தமராவார்யாவர்க்கும் தாமரைமேலார்க்கும் *

அமரர்க்கும் ஆடரவார்த்தாற்கும் - அமரர்கள்

தாள்தாமரை மலர்களிட்டிறைஞ்சி * மால்வண்ணன்

தாள்தாமரையடைவோமென்று.

2473 என்றும்மறந்தறியேன் என்னெஞ்சத்தேவைத்து *

நின்றுமிருந்தும் நெடுமாலை * - என்றும்

திருவிருந்தமார்பன் சிரீதரனுக்காளாய் *

கருவிருந்தநாள்முதலாக்காப்பு.

2474 காப்புமறந்தறியேன் கண்ணனேயென்றிருப்பன் *

ஆப்புஅங்கொழியவும் பல்லுயிர்க்கும் * - ஆக்கை

கொடுத்தளித்த கோனே! குணப்பரனே! * உன்னை

விடத்துணியார் மெய்தெளிந்தார்தாம்.

2475 மெய்தெளிந்தார்என்செய்யார்? வேறானார்நீறாக *

கைதெளிந்துகாட்டிக் களப்படுத்து * பைதெளிந்த

பாம்பினணையாய்! அருளாய்அடியேற்கு *

வேம்பும்கறியாகுமேன்று.

2476 ஏன்றேனடிமை இழிந்தேன்பிறப்பிடும்பை *

ஆன்றேனமரர்க்கமராமை * - ஆன்றேன்

கடன்நாடும்மண்ணாடும் கைவிட்டு * மேலை

இடநாடுகாணவினி. (2)

2477 இனியறிந்தேன் ஈசற்கும்நான்முகற்கும்தெய்வம் *

இனியறிந்தேன்எம்பெருமான்! உன்னை * - இனியறிந்தேன்

காரணன்நீகற்றவைநீ கற்பவைநீ * நற்கிரிசை

நாரணன்நீ நன்கறிந்தேன்நான். (2)