2585 முயற்றிசுமந்தெழுந்து முந்துற்றநெஞ்சே! *

இயற்றுவாயெம்மொடுநீகூடி * - நயப்புடைய

நாவீன்தொடைக்கிளவியுள் பொதிவோம் * நற்பூவைப்

பூவீன்றவண்ணன்புகழ். (2)

2586 புகழ்வோம்பழிப்போம் புகழோம்பழியோம் *

இகழ்வோம்மதிப்போம் மதியோம் - இகழோம் * மற்று

எங்கள்மால்! செங்கண்மால்! சீறல்நீதீவினையோம் *

எங்கள்மால்கண்டாய்இவை.

2587 இவையன்றேநல்ல இவையன்றேதீய *

இவையென்றிவையறிவனேலும் * - இவையெல்லாம்

என்னாலடைப்புநீக்கொண்ணாது இறையவனே! *

என்னாற்செயற்பாலதென்?

2588 என்னின்மிகுபுகழார்யாவரே? * பின்னையும்மற்

றெண்ணில் மிகுபுகழேன்யானல்லால் * - என்ன

கருஞ்சோதிக் கண்ணன், கடல்புரையும் * சீலப்

பெருஞ்சோதிக்குஎன்னெஞ்சாள்பெற்று.

2589 பெற்றதாய்நீயே பிறப்பித்ததந்தைநீ *

மற்றையாராவாரும்நீபேசில் * எற்றேயோ!

மாய! மாமாயவளை மாயமுலைவாய்வைத்த *

நீயம்மா! காட்டும்நெறி.

2590 நெறிகாட்டி நீக்குதியோ? * நின்பால்கருமா

முறிமேனிகாட்டுதியோ? * மேல்நாள் - அறியோமை

எஞ்செய்வானெண்ணினாய்? கண்ணனே! * ஈதுரையாய்

என்செய்தாலென்படோம்யாம்?

2591 யாமேயருவினையோம்சேயோம் * என்நெஞ்சினார்

தாமே அணுக்கராய்ச்சார்ந்தொழிந்தார் * - பூமேய

செம்மாதை நின்மார்வில்சேர்வித்து * பாரிடந்த

அம்மா! நின்பாதத்தருகு.

2592 அருகும்சுவடும் தெரிவுணரோம் * அன்பே

பெருகும்மிக இதுவென்? பேசீர் * - பருகலாம்

பண்புடையீர்! பாரளந்தீர்! பாவியேம்கண்காண்பரிய *

நுண்புடையீர்! நும்மைநுமக்கு.

2593 நுமக்கடியோமென்றென்று நொந்துதுரைத்தென்? * மாலார்

தமக்கு அவர்த்தாம்சார்வரியரானால் * - எமக்கினி

யாதானும் ஆகிடுகாண்நெஞ்சே! * அவர்திறத்தே

யாதானும்சிந்தித்திரு.

2594 இருநால்வர் ஈரைந்தின்மேலொருவர் * எட்டோ

டொருநால்வர் ஓரிருவரல்லால் * திருமாற்கு

யாமார் வணக்கமார்? ஏபாவம்நன்னெஞ்சே! *

நாமாமிகவுடையோம்நாழ்.

2595 நாழாலமர்முயன்ற வல்லரக்கனின்னுயிரை *

வாழாவகைவலிதல்நின்வலியே * - ஆழாத

பாரும்நீவானும்நீ காலும்நீதீயும்நீ *

நீரும்நீயாய்நின்றநீ.

2596 நீயன்றேயாழ்துயரில் வீழ்விப்பான்நின்றுழன்றாய்? *

போயொன்றுசொல்லியென்? போநெஞ்சே! * - நீயென்றும்

காழ்த்துபதேசம்தரினும் கைகொள்ளாய் * கண்ணன்தாள்

வாழ்த்துவதேகண்டாய்வழக்கு.

2597 வழக்கொடுமாறுகொளன்று, அடியார்வேண்ட *

இழக்கவும்காண்டுமிறைவ! - இழப்புண்டே? *

எம்மாட்கொண்டாகிலும் யான்வேண்ட என்கண்கள்

தம்மால் * காட்டுன்மேனிச்சாய்.

2598 சாயால்கரியானை உள்ளறியாராய்நெஞ்சே! *

பேயார்முலைகொடுத்தார்பேயராய் * - நீயார்? போய்த்

தேம்பூண்சுவைத்து ஊனறிந்தறிந்தும் * தீவினையாம்

பாம்பார்வாய்க்கைநீட்டல்பார்த்தி.

2599 பார்த்தோர் எதிரிதா நெஞ்சே * படுதுயரம்

பேர்த்தோதப் பீடழிவாம்பேச்சில்லை * - ஆர்த்துஓதம்

தம்மேனி தாள்தடவத்தாம்கிடந்து * தம்முடைய

செம்மேனிக்கண்வளர்வார்சீர்.

2600 சீரால்பிறந்து சிறப்பால்வளராது *

பேர்வாமனாகாக்கால் பேராளா! * - மார்பாரப்

புல்கிநீயுண்டுமிழ்ந்த பூமிநீரேற்பரிதே? *

சொல்லுநீயாமறியச்சூழ்ந்து.

2601 சூழ்ந்தடியார்வேண்டினக்கால் தோன்றாதுவிட்டாலும் *

வாழ்ந்திடுவர்பின்னும்தம்வாய்திறவார் * - சூழ்ந்தெங்கும்

வாள்வரைகள்போலரக்கன் வன்தலைகள்தாமிடிய *

தாள்வரைவில்லேந்தினார்தாம்.

2602 தாம்பாலாப்புண்டாலும் அத்தழும்புதானிளக *

பாம்பாலாப்புண்டுபாடுற்றாலும் * - சோம்பாதுஇப்

பல்லுருவையெல்லாம் படர்வித்தவித்தா! * உன்

தொல்லுருவையாரறிவார்? சொல்லு.

2603 சொல்லில்குறையில்லை சூதறியாநெஞ்சமே! *

எல்லிபகலென்னாதுஎப்போதும் * - தொல்லைக்கண்

மாத்தானைக்கெல்லாம் ஓரைவரையேமாறாக *

காத்தானைக்காண்டும்நீகாண்.

2604 காணப்புகிலறிவு கைக்கொண்டநல்நெஞ்சம் *

நாணப்படுமன்றே? நாம்பேசில் * - மாணி

யுருவாகிக்கொண்டு உலகம்நீரேற்றசீரான் *

திருவாகம்தீண்டிற்றுச்சென்று.

2605 சென்றங்குவெந்நரகில் சேராமல்காப்பதற்கு *

இன்றிங்கென்னெஞ்சாலிடுக்குண்ட * - அன்றங்குப்

பாருருவும் பார்வளைத்தநீருருவும்கண்புதைய *

காருருவன்தான்நிமிர்த்தகால்.

2606 காலேபொதத்திரிந்து கத்துவராமிந்நாள் *

மாலார்குடிபுகுந்தாரென்மனத்தே * - மேலால்

தருக்குமிடம்பாட்டினொடும் வல்வினையார்தாம் * வீற்

றிருக்குமிடம்காணாதிளைத்து.

2607 இளைப்பாயிளையாப்பாய் நெஞ்சமே! சொன்னேன் *

இளைக்கநமன்தமர்கள் பற்றி - இளைப்பெய்த *

நாய்தந்துமோதாமல் நல்குவான்நல்காப்பான் *

தாய்தந்தையெவ்வுயிர்க்கும்தான்.

2608 தானேதனித்தோன்றல் தன்னளப்பொன்றில்லாதான் *

தானேபிறர்கட்கும் தற்றோன்றல் * - தானே

இளைக்கிற்பார்கீழ்மேலாம் மீண்டமைப்பானானால் *

அளக்கிற்பார்பாரின்மேலார்?

2609 ஆரானுமாதானும்செய்ய * அகலிடத்தை

ஆராய்ந்து அதுதிருத்தலாவதே? * - சீரார்

மனத்தலை வன்துன்பத்தைமாற்றினேன் * வானோ

ரினத்தலைவன்கண்ணனால்யான்.

2610 யானும்என்னெஞ்சும் இசைந்தொழிந்தோம் * வல்வினையைக்

கானும்மலையும் புகக்கடிவான் * - தானோர்

இருளன்னமாமேனி எம்மிறையார்தந்த *

அருளென்னும்தண்டாலடித்து.

2611 அடியால்படிகடந்தமுத்தோ? * அதன்றேல்

முடியால் விசும்பளந்தமுத்தோ? * - நெடியாய்!

செறிகழல்கள்தாள்நிமிர்த்துச் சென்றுலகமெல்லாம் *

அறிகிலமால்நீயளந்தவன்று.

2612 அன்றேநம்கண்காணும் ஆழியான்காருருவம் *

இன்றேநாம்காணாதிருப்பதுவும் * - என்றேனும்

கட்கண்ணால் காணாதஅவ்வுருவை * நெஞ்சென்னும்

உட்கண்ணேல்காணுமுணர்ந்து.

2613 உணரவொருவர்க்கு எளியனே? செவ்வே *

இணரும்துழாயலங்கலெந்தை * - உணரத்

தனக்கெளியரெவ்வளவர் அவ்வளவன்ஆனால் *

எனக்கெளியனெம்பெருமானிங்கு.

2614 இங்கில்லை பண்டுபோல்வீற்றிருத்தல் * என்னுடைய

செங்கண்மால் சீர்க்கும்சிறிதுள்ளம் * - அங்கே

மடியடக்கிநிற்பதனில் வல்வினையார்தாம் * மீண்டு

அடியெடுப்பதன்றோவழகு?

2615 அழகுமறிவோமாய் வல்வினையைத்தீர்ப்பான் *

நிழலுமடிதோறுமானோம் * - சுழலக்

குடங்கள் தலைமீதெடுத்துக்கொண்டாடி * அன்றுஅத்

தடங்கடலைமேயார் தமக்கு.

2616 தமக்கடிமைவேண்டுவோர் தாமோதரனார்

தமக்கு * அடிமைசெய்யென்றால் செய்யாது * - எமக்கென்று

தாம்செய்யுந்தீவினைக்கே தாழ்வுறுவர் நெஞ்சினார் *

யாஞ்செய்வதிவ்விடத்திங்கியாது?

2617 யாதானுமொன்றறியில் தன்னுகக்கிலென்கொலோ? *

யாதானும்நேர்ந்தணுகாவாறுதான் * - யாதானும்

தேறுமாசெய்யா அசுரர்களை * நேமியால்

பாறுபாறாக்கினான்பால்.

2618 பாலாழி நீகிடக்கும்பண்பை * யாம்கேட்டேயும்

காலாழும்நெஞ்சழியும் கண்சுழலும் * - நீலாழிச்

சோதியாய்! ஆதியாய்! தொல்வினையெம்பால்கடியும் *

நீதியாய்! நிற்சார்ந்துநின்று.

2619 நின்றுமிருந்தும் கிடந்தும்திரிதந்தும் *

ஒன்றுமோவாற்றான் என்நெஞ்சகலான் * - அன்றங்கை

வன்புடையால்பொன்பெயரோன் வாய்தகர்த்து மார்விடந்தான் *

அன்புடையனன்றேயவன்?

2620 அவனாமிவனாமுவனாம் * மற்றுஉம்ப

ரவனாம் அவனென்றிராதே * - அவனாம்

அவனேயெனத்தெளிந்து கண்ணனுக்கேதீர்ந்தால் *

அவனேஎவனேலுமாம்.

2621 ஆமாறறிவுடையாராவது அரிதன்றே? *

நாமேயதுவுடையோம் நன்னெஞ்சே! * - பூமேய்

மதுகரமே தண்துழாய்மாலாரை * வாழ்த்தாம்

அதுகரமேயன்பாலமை.

2622 அமைக்கும்பொழுதுண்டே? ஆராயில்நெஞ்சே! *

இமைக்கும்பொழுதும் இடைச்சி - குமைத்திறங்கள் *

ஏசியேயாயினும் ஈன்துழாய்மாயனையே *

பேசியேபோக்காய்பிழை.

2623 பிழைக்கமுயன்றோமோ? நெஞ்சமே! பேசாய் *

தழைக்குந்துழாய்மார்வன்தன்னை * - அழைத்துஒருகால்

போயுபகாரம் பொலியக்கொள்ளாது * அவன்புகழே

வாயுபகாரம்கொண்டவாய்ப்பு.

2624 வாய்ப்போஇதுவொப்ப மற்றில்லைவாநெஞ்சே! *

போய்ப்போஒய்வெந்நரகில்பூவியேல் * - தீப்பால

பேய்த்தாய் உயிர்கலாய்ப்பாலுண்டு * அவளுயிரை

மாய்த்தானை வாழ்தேவலி.

2625 வலியமெனநினைந்து வந்தெதிர்ந்தமல்லர் *

வலியமுடியிடியவாங்கி * - வலியநின்

பொன்னாழிக்கையால் புடைத்திடுதிகீளாதே *

பல்நாளும்நிற்குமிப்பார்.

2626 பாருண்டான்பாருமிழ்ந்தான் பாரிடந்தான்பாரளந்தான் *

பாரிடமுன்படைத்தானென்பரால் * - பாரிட

மாவானும் தானானால்ஆரிடமே? * மற்றொருவர்க்கு

ஆவான்புகாவாலவை.

2627 அவயமெனநினைந்து வந்தசுரர்பாலே *

நவையைநளிர்விப்பான்தன்னை * - கவையில்

மனத்துயரவைத்திருந்து வாழ்த்தாதார்க்குண்டோ? *

மனத்துயரைமாய்க்கும்வகை.

2628 வகைசேர்ந்தநல் நெஞ்சும் நாவுடையவாயும் *

மிகவாய்ந்துவீழாவெனிலும் * - மிகவாய்ந்து

மாலைத்தாம் வாழ்த்தாதிருப்பர்இதுவன்றே? *

மேலைத்தாம் செய்யும்வினை.

2629 வினையார்தரமுயலும் வெம்மையேயஞ்சி *

தினையாஞ்சிறிதளவுஞ்செல்ல - நினையாது *

வாசகத்தாலேத்தினேன் வானோர்தொழுதிறைஞ்சும் *

நாயகத்தான்பொன்னடிக்கள்நான்.

2630 நான்கூறும் கூற்றாவதுஇத்தனையே * நாள்நாளும்

தேங்கோத நீருருவன்செங்கண்மால் * - நீங்காத

மாகதியாம்வெந்நரகில் சேராமல்காப்பதற்கு *

நீகதியாநெஞ்சேநினை.

2631 நினித்திறைஞ்சிமானிடவர் ஒன்றிரப்பரென்றே *

நினைத்திடவும்வேண்டாநீநேரே * - நினைத்திறஞ்ச

எவ்வளவர்எவ்விடத்தோர்மாலே! * அதுதானும்

எவ்வளவுமுண்டோ? எமக்கு.

2632 எமக்குயாம்விண்ணாட்டுக்கு உச்சமதாம்வீட்டை *

அமைத்திருந்தோம் அஃதன்றேயாமாறு? * - அமைப்பொலிந்த

மென்தோளிகாரணமா வெங்கோட்டேறேழுடனே *

கொன்றானையேமனத்துக்கொண்டு.

2633 கொண்டல்தான்மால்வரைதான் மாகடல்தான் கூரிருள் தான் *

வண்டறாப்பூவைதான் மற்றுத்தான் * - கண்டநாள்

காருருவம் காண்தோறும்நெஞ்சோடும் * கண்ணனார்

பேருருவென்றெம்மைப்பிரிந்து.

2634 பிரிந்தொன்றுநோக்காது தம்முடையபின்னே *

திரிந்துழுலும்சிந்தனையார்தம்மை * - புரிந்தொருகால்

ஆவா! எனவிரங்கார் அந்தோ! வலிதேகொல்? *

மாவைபிளந்தார்மனம்.

2635 மனமாளுமோரைவர் வன்குறும்பர்தம்மை *

சினமாள்வித்துஓரிடத்தேசேர்த்து * - புனமேய

தண்துழாயானடியைத்தான் காணுமஃதன்றே? *

வண்டுழாஞ்சீரார்க்குமாண்பு.

2636 மாண்பாவித்துஅந்நான்றுமண்ணிரந்தான் * மாயவள்நஞ்சு

ஊண்பாவித்துண்டானதோருருவம் * - காண்பான்நங்

கண்ணவா மற்றொன்றுகாணுறா * சீர்பரவாது

உண்ணவாய்தானுறுமோவொன்று?

2637 ஒன்றுண்டுசெங்கண்மால்! யானுரைப்பது * உன்னடியார்க்கு

என்செய்வனென்றேயிருத்திநீ * - நின்புகழில்

வைகும் தம்சிந்தையிலும்மற்றினிதோ? * நீயவர்க்கு

வைகுந்தமென்றருளும்வான்.

2638 வானோ? மறிகடலோ? மாருதமோ? தீயகமோ? *

கானோ? ஒருங்கிற்றும்கண்டிலமால் * ஆனீன்ற

கன்றுயரத்தாமெறிந்து காயுதிர்த்தார்தாள்பணிந்தோம் *

வன்துயரையாவா! மருங்கு.

2639 மருங்கோதம்மோதும் மணிநாகணையார் *

மருங்கேவரவரியரேலும் * - ஒருங்கே

எமக்கவரைக்காணலாம் எப்பொழுதுமுள்ளால் *

மனக்கவலைதீர்ப்பார்வரவு.

2640 வரவாறொன்றில்லையால் வாழ்வினிதால் * எல்லே!

ஒருவாறு ஒருவன்புகாவாறு * - உருமாறும்

ஆயவர்தாம்சேயவர்தாம் அன்றுலகம்தாயவர்தாம் *

மாயவர்தாம்காட்டும்வழி.

2641 வழித்தங்குவல்வினையை மாற்றானோ? நெஞ்சே! *

தழீஇக்கொண்டு போரவுணன்தன்னை * - சுழித்தெங்கும்

தாழ்விடங்கள்பற்றிப் புலால்வெள்ளந்தானுகள *

வாழ்வடங்கமார்விடந்தமால்.

2642 மாலே! படிச்சோதிமாற்றேல் * இனியுனது

பாலேபோல் சீரிற்பழுத்தொழிந்தேன் * - மேலால்

பிறப்பின்மைபெற்று அடிக்கீழ்க்குற்றேவலன்று *

மறப்பின்மை யான்வேண்டும்மாடு.

2643 மாடே வரப்பெறுவராமென்றே * வல்வினையார்

காடானுமாதானும் கைக்கொள்ளார் * - ஊடேபோய்ப்

பேரோதம்சிந்து திரைக்கண்வளரும் * பேராளன்

பேரோதச்சிந்திக்கப்பேர்ந்து.

2644 பேர்ந்தொன்று நோக்காது பின்னிற்பாய்நில்லாப்பாய் *

ஈன்துழாய்மாயனையே என்னெஞ்சே! * பேர்ந்தெங்கும்

தொல்லைமாவெந்நரகில் சேராமல்காப்பதற்கு *

இல்லைகாண்மற்றோரிறை.

2645 இறைமுறையான்சேவடிமேல் மண்ணளந்தஅந்நாள் *

மறைமுறையால் வானாடர்கூடி * - முறைமுறையின்

தாதிலகு பூத்தெளித்தாலொவ்வாதே * தாழ்விசும்பின்

மீதிலகித்தாங்கிடக்கும்மீன்.

2646 மீனென்னுங்கம்பில் வெறியென்னும் வெள்ளிவேய் *

வானென்னும் கேடிலாவான்குடைக்கு * - தானோர்

மணிக்காம்புபோல் நிமிர்ந்து மண்ணளந்தான் * நங்கள்

பிணிக்காம்பெருமருந்துபின்.

2647 பின்துரக்கும்காற்றிழந்த சூல்கொண்டல்பேர்ந்தும் போய் *

வன்திரைக்கண் வந்தணைந்தவாய்மைத்தே * - அன்று

திருச்செய்யநேமியான் தீயரக்கிமூக்கும் *

பருச்செவியுமீர்ந்தபரன்.

2648 பரனாமவனாதல் பாவிப்பராகில் *

உரனாலொருமூன்றுபோதும் * - மரமேழன்று

எய்தானைப் புள்ளின் வாய்கீண்டானையே * அமரர்

கைதான்தொழாவேகலந்து.

2649 கலந்துநலியும் கடுந்துயரைநெஞ்சே! *

மலங்கவடித்து மடிப்பான் * - விலங்கல்போல்

தொன்மாலைக்கேசவனை நாரணனை மாதவனை *

சொன்மாலையெப்பொழுதும்சூட்டு.

2650 சூட்டாயநேமியான் தொல்லரக்கனின்னுயிரை *

மாட்டேதுயரிழைத்தமாயவனை * - ஈட்ட

வெறிகொண்ட தண்துழாய்வேதியனை * நெஞ்சே!

அறிகண்டாய் சொன்னேனது.

2651 அதுவோநன்றென்று அங்கமருலகோவேண்டில் *

அதுவோபொருளில்லையன்றே? * - அதுவொழிந்து

மண் இன்று ஆள்வேனெனிலும் கூடும்மடநெஞ்சே! *

கண்ணன்தாள் வாழ்த்துவதேகல்.

2652 கல்லும் கனைகடலும் வைகுந்தவானாடும் *

புல்லென்றொழிந்தனகொல்? ஏபாவம்! * - வெல்ல

நெடியான் நிறங்கரியான் உள்புகுந்துநீங்கான் *

அடியேனதுள்ளத்தகம்.

2653 அகஞ்சிவந்தகண்ணினராய் வல்வினையராவார் *

முகஞ்சிதைவராமன்றே? முக்கி * - மிகுந்திருமால்

சீர்க்கடலையுள்பொதிந்த சிந்தனையேன்தன்னை *

ஆர்க்கு அடலாம் செவ்வேயடர்த்து?

2654 அடர்பொன்முடியானை ஆயிரம்பேரானை *

சுடர்கொள்சுடராழியானை * - இடர்கடியும்

மாதாபிதுவாக வைத்தேன் எனதுள்ளே *

யாதாகில்யாதேயினி?

2655 இனிநின்று நின்பெருமை யானுரைப்பதென்னே? *

தனிநின்றசார்விலாமூர்த்தி! * - பனிநீர்

அகத்துலவு செஞ்சடையானாகத்தான் * நான்கு

முகத்தான் நின்னுந்திமுதல்.

2656 முதலாந்திருவுருவம் மூன்றென்பர் * ஒன்றே

முதலாகும் மூன்றுக்குமென்பர் * - முதல்வா!

நிகரிலகுகாருருவா! நின்னகத்ததன்றே? *

புகரிலகுதாமரையின்பூ.

2657 பூவையும் காயாவும் நீலமும், பூக்கின்ற *

காவிமலரென்றும் காண்தோறும் * - பாவியேன்

மெல்லாவி மெய்மிகவே பூரிக்கும் * அவ்வவை

யெல்லாம்பிரானுருவேயென்று.

2658 என்றுமொருநாள் ஒழியாமையானிரந்தால் *

ஒன்றுமிரங்காருருக்காட்டார் * - குன்று

குடையாக ஆகாத்தகோவலனார் * நெஞ்சே!

புடைதான்பெரிதேபுவி.

2659 புவியுமிருவிசும்பும் நின்னகத்த * நீயென்

செவியின் வழிபுகுந்து என்னுள்ளாய் * - அவிவின்றி

யான்பெரியன்நீபெரியை என்பதனையாரறிவார்? *

ஊன்பருகுநேமியாய்! உள்ளு.

2660 உள்ளிலுமுள்ளந்தடிக்கும் வினைப்படலம் *

விள்ள, விழித்துன்னைமெய்யுற்றால் * - உள்ள

உலகளவும் யானும்உளனாவனென்கொலோ? *

உலகளந்தமூர்த்தி! உரை.

2661 உரைக்கிலோர்சுற்றத்தார் உற்றாரென்றுஆரே? *

இரைக்குங்கடற்கிடந்தவெந்தாய்! * - உரைப்பெல்லாம் *

நின்னன்றி மற்றிலேன்கண்டாய் * எனதுயிர்க்குஓர்

சொல்நன்றியாகும்துணை.

2662 துணைநாள் பெருங்கிளையும் தொல்குலமும் * சுற்றத்

திணைநாளும் இன்புடைத்தாமேலும் * - கணைநாணில்

ஓவாத்தொழிற்சார்ங்கன் தொல்சீரைநல்நெஞ்சே! *

ஓவாதவூணாகவுண்.

2663 உள்நாட்டுத் தேசன்றே! ஊழ்வினையையஞ்சுமே? *

விண்ணாட்டையொன்றாகமெச்சுமே? * - மண்ணாட்டில்

ஆராகி எவ்விழிவிற்றானாலும் * ஆழியங்கைப்

பேராயற்கு ஆளாம்பிறப்பு.

2664 பிறப்பிறப்பு மூப்புப் பிணிதுறந்து * பின்னும்

இறக்கவுமின்புடைத்தாமேலும் * - மறப்பெல்லாம்

ஏதமே என்றல்லால் எண்ணுவனே? * மண்ணளந்தான்

பாதமேயேத்தாப்பகல்.

2665 பகலிராவென்பதுவும் பாவியாது * எம்மை

இகல்செய்து இருபொழுதுமாள்வர் * - தகவாத்

தொழும்பரிவர்சீர்க்கும் துணையிலரென்றோரார் *

செழும்பரவைமேயார்தெரிந்து.

2666 தெரிந்துணர்வொன்றின்மையால் தீவினையேன் * வாளா

இருந்தொழிந்தேன் கீழ்நாள்களெல்லாம் * - கரந்துருவின்

அம்மானை அந்நான்றுபின் தொடர்ந்த * ஆழியங்கை

அம்மானையேத்தாதயர்ந்து.

2667 அயர்ப்பாயயராப்பாய் நெஞ்சமே! சொன்னேன் *

உயப்போம்நெறியிதுவேகண்டாய் * - செயற்பால

வல்லவேசெய்கிறுதி நெஞ்சமே! அஞ்சினேன் *

மல்லர்நாள் வவ்வினனை வாழ்த்து.

2668 வாழ்த்தியவனடியைய்ப் பூப்புனைந்து * நின்தலையைத்

தாழ்த்திருகைகூப்பென்றால் கூப்பாத - பாழ்த்தவிதி! *

எங்குற்றாயென்றவனை ஏத்தாதென்னெஞ்சமே! *

தங்கத்தானாமேலுந்தங்கு.

2669 தங்காமுயற்றியவாய்த் தாழ்விசும்பின் மீதுபாய்ந்து *

எங்கேபுக்கு எத்தவம்செய்திட்டனகொல்? * - பொங்கோதத்

தண்ணம்பால் வேலைவாய்க் கண்வளரும் * என்னுடைய

கண்ணன்பால் நல்நிறங்கொள்கார்.

2670 கார்க்கலந்தமேனியான் கைகலந்தவாழியான் *

பார்க்கலந்தவல்வயிற்றான் பாம்பணையான் * - சீர்கலந்த

சொல் நினைந்துபோக்காரேல் சூழ்வினையினாழ்துயரை *

என்னினைந்துபோக்குவரிப்போது? (2)

2671 இப்போதும் இன்னும் இனிச்சிறிது நின்றாலும் *

எப்போதும் ஈதேசொல் என்னெஞ்சே! - எப்போதும்

கைகழலாநேமியான் நம்மேல்வினை கடிவான் *

மெய்கழலேயேத்தமுயல். (2)