162 பின்னைமணாளனைப் பேரில்கிடந்தானை *

முன்னையமரர் முதல்தனிவித்தினை *

என்னையும் எங்கள்குடிமுழுதுஆட்கொண்ட *

மன்னனைவந்துகுழல்வாராய்அக்காக்காய்!

மாதவன்தன்குழல்வாராய்அக்காக்காய். (2)

173 கொங்குங்குடந்தையும் கோட்டியூரும்பேரும் *

எங்கும்திரிந்து விளையாடும்என்மகன் *

சங்கம்பிடிக்கும் தடக்கைக்குத்தக்க * நல்

அங்கமுடையதோர்கோல்கொண்டுவா

அரக்குவழித்ததோர்கோல்கொண்டுவா.

205 கொண்டல்வண்ணா! இங்கேபோதராயே

கோயிற்பிள்ளாய்! இங்கேபோதராயே *

தெண்திரைசூழ்திருப்பேர்க்கிடந்த

திருநாரணா! இங்கேபோதராயே *

உண்டுவந்தேன்அம்மமென்றுசொல்லி

ஓடிஅகம்புகஆய்ச்சிதானும் *

கண்டெதிரேசென்றெடுத்துக்கொள்ளக்

கண்ணபிரான்கற்றகல்விதானே.

991 ஊராங்குடந்தையுத்தமன் ஒருகாலிருகால்சிலைவளைய *

தேரா அரக்கர்தேர்வெள்ளம்செற்றான் வற்றாவருபுனல்சூழ்

பேரான் * பேராயிரமுடையான் பிறங்குசிறைவண்டு அறைகின்ற

தாரான் * தாராவயல்சூழ்ந்த சாளக்கிராமம் அடைநெஞ்சே!

1399 பேரானைக் குறுங்குடியெம்பெருமானை * திருதண்கா

லூரானைக் கரம்பனூருத்தமனை * முத்திலங்கு

காரார்திண்கடலேழும் மலையேழிவ்வுலகேழுண்டும் *

ஆராதென்றிருந்தானைக் கண்டதுதென்னரங்கத்தே. (2)

1428 கையிலங்காழி சங்கன் கருமுகில்திருநிறத்தன் *

பொய்யிலன்மெய்யன் தந்தாளடைவரேல்அடிமையாக்கும் *

செய்யலர்கமலமோங்கு செறிபொழில்தென்திருப்பேர் *

பையரவணையான்நாமம் பரவிநானுய்ந்தவாறே! (2)

1429 வங்கமார்கடல்களேழும் மலையும்வானகமும்மற்றும் *

அங்கண்மாஞாலமெல்லாம் அமுதுசெய்துமிழ்ந்தஎந்தை *

திங்கள்மாமுகிலணவு செறிபொழில்தென்திருப்பேர் *

எங்கள்மாலிறைவன்நாமம் ஏத்திநானுய்ந்தவாறே!

1430 ஒருவனைஉந்திப்பூமேல் ஓங்குவித்து, ஆகந்தன்னால் *

ஒருவனைச்சாபம்நீக்கி உம்பராளென்றுவிட்டான் *

பெருவரைமதிள்கள்சூழ்ந்தபெருநகரரவணைமேல் *

கருவரைவண்ணன் தென்பேர்கருதிநானுய்ந்தவாறே!

1431 ஊனமர்தலையொன்றேந்தி உலகெலாம்திரியும்ஈசன் *

ஈனமர்சாபம்நீக்காயென்ன ஒண்புனலையீந்தான் *

தேனமர்பொழில்கள்சூழ்ந்த செறிவயல்தென்திருப்பேர் *

வானவர்தலைவன்நாமம் வாழ்த்திநானுய்ந்தவாறே!

1432 வக்கரன்வாய்முன்கீண்டமாயனே! என்றுவானேர்

புக்கு * அரண்தந்தருளாயென்னப்பொன்னாகத்தானை *

நக்கரியுருவமாகி நகம்கிளர்ந்திடந்துகந்த *

சக்கரச்செல்வன்தென்பேர்த் தலைவன்தாளடைந்துய்ந்தேனே!

1433 விலங்கலால்கடலடைத்து விளங்கிழைபொருட்டு * வில்லால்

இலங்கைமாநகர்க்கிறைவன் இருபது புயம்துணித்தான் *

நலங்கொள்நான்மறைவல்லார்கள் ஒத்தொலியேத்தக்கேட்டு *

மலங்குபாய்வயல்திருப்பேர் மருவிநான்வாழ்ந்தவாறே!

1434 வெண்ணெய்தானமுதுசெய்ய வெகுண்டுமத்தாய்ச்சியோச்சி *

கண்ணியர்குறுங்கயிற்றால் கட்டவெட்டென்றிருந்தான் *

திண்ணமாமதிள்கள்சூழ்ந்த தென்திருப்பேருள் * வேலை

வண்ணனார்நாமம் நாளும்வாய்மொழிந்துய்ந்தவாறே!

1435 அம்பொனாருலகமேழுமறிய ஆய்ப்பாடிதன்னுள் *

கொம்பனார்பின்னைகோலம் கூடுதற்கேறுகொன்றான் *

செம்பொனார்மதிள்கள்சூழ்ந்த தென்திருப்பேருள்மேவும் *

எம்பிரான்நாமம் நாளும்ஏத்திநானுய்ந்தவாறே!

1436 நால்வகைவேதமைந்துவேள்வி ஆறங்கம்வல்லார் *

மேலைவானவரின்மிக்க வேதியர்ஆதிகாலம் *

சேலுகள்வயல்திருப்பேர்ச் செங்கண்மாலோடும்வாழ்வார் *

சீலமாதவத்தர்சிந்தையாளி என்சிந்தையானே.

1437 வண்டறைபொழில்திருப்பேர் வரியரவணையில்பள்ளி

கொண்டு * உறைகின்றமாலைக் கொடிமதிள்மாடமங்கை *

திண்திறல்தோள்கலியன் செஞ்சொலால்மொழிந்தமாலை *

கொண்டிவைபாடியாடக் கூடுவார்நீள்விசும்பே. (2)

1606 பேரானைக் குடந்தைப்பெருமானை * இலங்குஒளிசேர்

வாரார்வனமுலையாள் மலர்மங்கைநாயகனை *

ஆராவின்னமுதைத் தென்னழுந்தையில்மன்னிநின்ற *

காரார்கருமுகிலைக் கண்டுகொண்டுகளித்தேனே. (2)

1851 துளக்கமில்சுடரை * அவுணனுடல்

பிளக்கும்மைந்தனைப் பேரில்வணங்கிப்போய் *

அளப்பிலாரமுதை அமரர்க்குஅருள்

விளக்கினை * சென்று வெள்ளறைக்காண்டுமே.

1857 பெற்ற மாளியைப் பேரில்மணாளனை *

கற்றநூல் கலிகன்றிஉரைசெய்த *

சொற்திறமிவை சொல்லியதொண்டர்கட்கு *

அற்றமில்லை அண்டம்அவர்க்குஆட்சியே. (2)

2050 பிண்டியார்மண்டையேந்திப் பிறர்மனைதிரிதந்துண்ணும்

முண்டியான் * சாபம்தீர்த்த ஒருவனூர் * உலகமேத்தும்

கண்டியூர்அரங்கம்மெய்யம் கச்சிபேர்மல்லையென்று

மண்டினார் * உய்யலல்லால் மற்றையார்க்கு உய்யலாமே? (2)

2059 நீரகத்தாய் நெடுவரையி னுச்சிமேலாய்!

நிலாத்திங்கள்துண்டகத்தாய்! நிறைந்தகச்சி

ஊரகத்தாய்! * ஒண்துரைநீர்வெஃகாவுள்ளாய்

உள்ளுவாருள்ளத்தாய்! * உலகமேத்தும்

காரகத்தாய்! கார்வானத்துள்ளாய்! கள்வா!

காமருபூங்காவிரியின்தென்பால்மன்னு

பேரகத்தாய்! * பேராதுஎன்நெஞ்சினுள்ளாய்!

பெருமான்உன்திருவடியேபேணினேனே. (2)

2060 வங்கத்தால்மாமணிவந்துந்துமுந்நீர்

மல்லையாய்! மதிள்கச்சியூராய்! பேராய்! *

கொங்கத்தார்வளங்கொன்றையலங்கல்மார்வன்

குலவரையன்மடப்பாவைஇடப்பால்கொண்டான்

பங்கத்தாய்! * பாற்கடலாய்! பாரின்மேலாய்!

பனிவரையினுச்சியாய்! பவளவண்ணா! *

எங்குற்றாய்? எம்பெருமான்! உன்னைநாடி

ஏழையேன்இங்ஙனமேஉழிதருகேனே.

2070 முற்றாராவனமுலையாள்பாவை மாயன்

மொய்யகலத்துள்ளிருப்பாள் அஃதும்கண்டும்

அற்றாள் * தன் நிறையழிந்தாள் ஆவிக்கின்றாள்

அணியரங்கமாடுதுமோ? தோழீ! என்னும் *

பெற்றேன்வாய்ச்சொல்இறையும்பேசக்கேளாள்

பேர்பாடித்தண்குடந்தைநகரும்பாடி *

பொற்றாமரைக்கயம்நீராடப்போனாள்

பொருவற்றாள்என்மகள்உம்பொன்னும்அஃதே.

2417 நாகத்தணைக்குடந்தை வெஃகாதிருவெவ்வுள் *

நாகத்தணையரங்கம் பேரன்பில் * - நாகத்

தணைப்பாற்கடல்கிடக்கும் ஆதிநெடுமால் *

அணைப்பார்கருத்தனாவான்.

2706 ## காரார்திருமேனி காணுமளவும்போய் *

சீரார் திருவேங்கடமே திருக்கோவ (2)

லூரே * - மதிட்கச்சியூரகமே பேரகமே *

பேராமருதிறுத்தான் வெள்ளறையேவெஃகாவே *

பேராலிதண்கால் நறையூர்திருப்புலியூர் *

ஆராமம்சூழ்ந்த அரங்கம் * - கணமங்கை (2)

2774 வல்லவாழ்ப்

பின்னைமணாளனைப் பேரில்பிறப்பிலியை * (2)

தொன்னீர்க்கடல்கிடந்த தோளாமணிச்சுடரை *

என்மனத்துமாலை இடவெந்தையீசனை *

மன்னுங்கடல்மல்லை மாயவனை * -

3860 திருமாலிருஞ்சோலைமலை என்றேன் என்ன *

திருமால்வந்து என்னெஞ்சுநிறையப்புகுந்தான் *

குருமாமணியுந்துபுனல் பொன்னித்தென்பால் *

திருமால்சென்றுசேர்விடம் தென்திருப்பேரே. (2)

3861 பேரேயுறைகின்றபிரான் இன்றுவந்து *

பேரேனென்று என்னெஞ்சுநிறையப்புகுந்தான் *

காரேழ்கடலேழ் மலையேழுலகுண்டும் *

ஆராவயிற்றானை அடங்கப்பிடித்தேனே.

3862 பிடித்தேன்பிறவிகெடுத்தேன் பிணிசாரேன் *

மடித்தேன்மனைவாழ்க்கையுள் நிற்பதோர்மாயையை *

கொடிக்கோபுரமாடங்கள்சூழ் திருப்பேரான் *

அடிச்சேர்வது எனக்கெளிதாயினவாறே.

3863 எளிதாயினவாறென்று எங்கண்கள்களிப்ப *

களிதாகியசிந்தையனாய்க் களிக்கின்றேன் *

கிளிதாவியசோலைகள்சூழ் திருப்பேரான் *

தெளிதாகியசேண்விசும்புதருவானே.

3864 வானேதருவான் எனக்காஎன்னோடொட்டி *

ஊனேய்குரம்பை யிதனுள்புகுந்து * இன்று

தானேதடுமாற்றவினைகள் தவிர்த்தான் *

தேனேபொழில் தென் திருப்பேர்நகரானே.

3865 திருப்பேர்நகரான் திருமாலிருஞ்சோலை *

பொருப்பேயுறைகின்றபிரான் இன்றுவந்து *

இருப்பேனென்று என்னெஞ்சுநிறையப்புகுந்தான் *

விருப்பேபெற்று அமுதமுண்டுகளித்தேனே. (2)

3866 உண்டுகளித்தேற்கு உம்பரென்குறை? * மேலைத்

தொண்டுகளித்து அந்திதொழும்சொல்லுப்பெற்றேன் *

வண்டுகளிக்கும்பொழில்சூழ் திருப்பேரான் *

கண்டுகளிப்பக் கண்ணுள்நின்றகலானே.

3867 கண்ணுள்நின்றகலான் கருத்தின்கண்பெரியன் *

எண்ணில்நுண்பொருள் ஏழிசையின்சுவைதானே *

வண்ணநன்மணிமாடங்கள்சூழ் திருப்பேரான் *

திண்ணமென்மனத்துப் புகுந்தான்செறிந்தின்றே.

3868 இன்றென்னைப்பொருளாக்கித் தன்னைஎன்னுள் வைத்தான் *

அன்றென்னைப்புறம்போகப்புணர்த்தது என்செய்வான்? *

குன்றென்னத்திகழ்மாடங்கள்சூழ் திருப்பேரான் *

ஒன்றெனக்கருள்செய்ய உணர்த்தலுற்றேனே.

3869 உற்றேன்உகந்துபணிசெய்து உனபாதம்

பெற்றேன் * ஈதேயின்னம்வேண்டுவதுஎந்தாய்! *

கற்றார்மறைவாணர்கள்வாழ் திருப்பேராற்கு *

அற்றாரடியார்தமக்கு அல்லல்நில்லாவே. (2)

3870 நில்லாவல்லல் நீள்வயல்சூழ்திருப்பேர்மேல் *

நல்லார்பலர்வாழ் குருகூர்ச்சடகோபன் *

சொல்லார்தமிழ் ஆயிரத்துள்இவைபத்தும்

வல்லார் * தொண்டராள்வது சூழ்பொன்விசும்பே. (2)