3255 மாசறுசோதி என்செய்யவாய்மணிக்குன்றத்தை *

ஆசறுசீலனை ஆதிமூர்த்தியைநாடியே *

பாசறவெய்தி அறிவிழந்தெனைநாளையம்? *

ஏசறுமூரவர்கவ்வை தோழீ! என்செய்யுமே? (2)

3256 என்செய்யுமூரவர்கவ்வை? தோழீ! இனிநம்மை *

என்செய்யதாமரைக்கண்ணன் என்னைநிறைகொண்டான் *

முன்செய்யமாமையிழந்து மேனிமெலிவெய்தி *

என்செய்யவாயும்கருங்கண்ணும் பயப்பூர்ந்தவே.

3257 ஊர்ந்தசகடம்உதைத்தபாதத்தன் * பேய்முலை

சார்ந்துசுவைத்தசெவ்வாயன் என்னைநிறைகொண்டான் *

பேர்ந்தும்பெயர்ந்தும் அவனோடன்றியோர்சொல்லிலேன் *

தீர்ந்தவென்தோழீ! என்செய்யும்ஊரவர்கவ்வையே?

3258 ஊரவர்கவ்வையெருவிட்டு அன்னைசொல்நீர்படுத்து *

ஈரநெல்வித்திமுளைத்த நெஞ்சப்பெருஞ்செய்யுள் *

பேரமர்காதல் கடல்புரையவிளைவித்த *

காரமர்மேனி! நங்கண்ணன்தோழீ! கடியனே.

3259 கடியன்கொடியன்நெடியமால் உலகங்கொண்ட

அடியன் * அறிவருமேனிமாயத்தன் * ஆகிலும்

கொடியவென்னெஞ்சம் அவனென்றேகிடக்கும்எல்லே! *

துடிகொளிடைமடத்தோழீ! அன்னையென்செய்யுமே?

3260 அன்னையென்செய்யிலென்? ஊரென்சொல்லிலென்? தோழிமீர்! *

என்னையினியுமக்காசையில்லை அகப்பட்டேன் *

முன்னையமரர்முதல்வன் வண்துவராபதி

மன்னன் * மணிவண்ணன் வாசுதேவன்வலையுளே.

3261 வலையுளகப்படுத்து என்னைநன்நெஞ்சம்கூவிக்கொண்டு *

அலைகடற்பள்ளியம்மானை ஆழிப்பிரான்தன்னை *

கலைகொளகலல்குல்தோழீ! நம்கண்களால்கண்டு *

தலையில்வணங்கவும்ஆங்கொலோ? தையலார்முன்பே.

3262 பேய்முலையுண்டுசகடம்பாய்ந்து மருதிடைப்

போய்முதல்சாய்த்து * புள்வாய்பிளந்துகளிறட்ட *

தூமுறுவல் தொண்டைவாய்ப்பிரானை எந்நாள்கொலோ? *

யாமுறுகின்றதுதோழீ! அன்னையர்நாணவே.

3263 நாணும்நிறையும்கவர்ந்து என்னைநல்நெஞ்சம்கூவிக் கொண்டு *

சேணுயர்வானத்திருக்கும்தேவபிரான்தன்னை *

ஆணையென்? தோழீ! உலகுதோறலர் தூற்றி * ஆம்

கோணைகள்செய்து குதிரியாய்மடலூர்துமே.

3264 யாமடலூர்ந்தும் எம்மாழியங்கைப்பிரானுடை *

தூமடல்தண்ணந்துழாய் மலர்கொண்டுசூடுவோம் *

யாமடமின்றித் தெருவுதோறு அயல்தையலார் *

நாமடங்கப்பழிதூற்றி நாடுமிரைக்கவே.

3265 இரைக்குங்கருங்கடல்வண்ணன் கண்ணபிரான்தன்னை *

விரைக்கொள்பொழில் குருகூர்ச்சடகோபன்சொன்ன *

நிரைக்கொளந்தாதி ஓராயிரத்துள்இப்பத்தும் *

உரைக்கவல்லார்க்கு வைகுந்தமாகும்தம்மூரெல்லாம். (2)