3090 முடியானே! மூவுலகும் தொழுதேத்தும்சீ

ரடியானே! * ஆழ்கடலைக்கடைந்தாய்! புள்ளூர்

கொடியானே! * கொண்டல்வண்ணா! அண்டத்துஉம்பரில்

நெடியானே! * என்றுகிடக்கும் என்நெஞ்சமே. (2)

3091 நெஞ்சமேநீள்நகராக இருந்தஎன்

தஞ்சனே! * தண்ணிலங்கைக்கு இறையைச்செற்ற

நஞ்சனே! * ஞாலங்கொள்வான் குறளாகிய

வஞ்சனே! * என்னும்எப்போதும் என்வாசகமே.

3092 வாசகமேயேத்த அருள்செய்யும்வானவர்தம்

நாயகனே! * நாளிளந்திங்களைக் கோள்விடுத்து *

வேயகம்பால்வெண்ணெய்தொடுவுண்ட ஆனாயர்

தாயவனே! * என்று தடவும் என்கைகளே.

3093 கைகளாலாரத் தொழுதுதொழுதுஉன்னை *

வைகலும்மாத்திரைப்போதும் ஓர்வீடின்றி *

பைகொள்பாம்பேறி உறைபரனே! * உன்னை

மெய்கொள்ளக்காண விரும்பும்என்கண்களே.

3094 கண்களால்காண வருங்கொல்? என்றாசையால் *

மண்கொண்டவாமனன் ஏறமகிழ்ந்துசெல் *

பண்கொண்டபுள்ளின் சிறகொலிபாவித்து *

திண்கொள்ளஓர்க்கும் கிடந்துஎன்செவிகளே.

3095 செவிகளாலார நின்கீர்த்திக்கனியென்னும்

கவிகளே * காலப்பண்தேன் உறைப்பத்துற்று *

புவியின்மேல் பொன்னெடுஞ்சக்கரத்துன்னையே *

அவிவின்றியாதரிக்கும் எனதாவியே.

3096 ஆவியே! ஆரமுதே! என்னையாளுடை *

தூவியம்புள்ளுடையாய்! சுடர்நேமியாய்! *

பாவியேன்நெஞ்சம் புலம்பப்பலகாலும் *

கூவியும்காணப்பெறேன் உனகோலமே.

3097 கோலமே! தாமரைக்கண்ணது ஓரஞ்சன

நீலமே! * நின்றெனதாவியை ஈர்கின்ற

சீலமே! * சென்றுசொல்லாதன முன்னிலாம்

காலமே! * உன்னைஎந்நாள் கண்டுகொள்வனே?

3098 கொள்வன்நான்மாவலி! மூவடிதாவென்ற

கள்வனே! * கஞ்சனைவஞ்சித்து வாணனை

உள்வன்மைதீர * ஓராயிரந்தோள்துணித்த

புள்வல்லாய்! * உன்னையெஞ்ஞான்று பொருந்துவனே?

3099 பொருந்தியமாமருதினிடைபோய * எம்

பெருந்தகாய்! * உன்கழல்காணிய பேதுற்று *

வருந்திநான் வாசகமாலைகொண்டு * உன்னையே

இருந்திருந்து எத்தனைகாலம்புலம்புவனே?

3100 புலம்புசீர்ப் பூமியளந்தபெருமானை *

நலங்கொள்சீர் நன்குருகூர்ச்சடகோபன் * சொல்

வலங்கொண்டவாயிரத்துள் இவையுமோர் பத்து *

இலங்குவான் யாவருமேறுவர் சொன்னாலே. (2)