2991 எம்மாவீட்டுத் திறமும்செப்பம் * நின்

செம்மாபாதபற்புத் தலைசேர்த்து ஒல்லை *

கைம்மாதுன்பம் கடிந்தபிரானே *

அம்மா! அடியேன் வேண்டுவதீதே. (2)

2992 ஈதேயானுன்னைக் கொள்வதெஞ்ஞான்றும் * என்

மைதோய்சோதி மணிவண்ணவெந்தாய்! *

எய்தாநின்கழல் யானெய்த * ஞானக்

கைதா காலக்கழிவுசெய்யேலே.

2993 செய்யேல்தீவினையென்று அருள்செய்யும் * என்

கையார்சக்கரக் கண்ணபிரானே! *

ஐயார்கண்டமடைக்கிலும் நின்கழல்

எய்யாதேத்த * அருள்செய்எனக்கே.

2994 எனக்கேயாட்செய் எக்காலத்துமென்று * என்

மனக்கேவந்து இடைவீடின்றிமன்னி *

தனக்கேயாக எனைக்கொள்ளுமீதே *

எனக்கேகண்ணனை யான்கொள்சிறப்பே.

2995 சிறப்பில்வீடு சுவர்க்கம்நரகம் *

இறப்பிலெய்துக வெய்தற்க * யானும்

பிறப்பில் பல்பிறவிப்பெருமானை *

மறப்பொன்றின்றி என்னும்மகிழ்வேனே.

2996 மகிழ்கொள்தெய்வம் உலோகமலோகம் *

மகிழ்கொள்சோதி மலர்ந்தவம்மானே! *

மகிழ்கொள்சிந்தை சொல்செய்கைகொண்டு * என்றும்

மகிழ்வுற்று உன்னைவணங்கவாராயே.

2997 வாராயுன் திருப்பாதமலர்க்கீழ் *

பேராதேயான்வந்து அடையும்படி

தாராதாய்! * உன்னையென்னுள்வைப்பில் என்றும்

ஆராதாய்! * எனக்குஎன்றும்எக்காலே.

2998 எக்காலத்தெந்தையாய் என்னுள்மன்னில் * மற்

றெக்காலத்திலும் யாதொன்றும்வேண்டேன் *

மிக்கார் வேதவிமலர்விழுங்கும் * என்

அக்காரக்கனியே! * உன்னையானே.

2999 யானேயென்னை அறியகிலாதே *

யானேயென்தனதே என்றிருந்தேன் *

யானேநீ என்னுடைமையும்நீயே *

வானேயேத்தும் எம்வானவரேறே!

3000 ஏறேலேழும்வென்று ஏர்கொளிலங்கையை *

நீறேசெய்த நெடுஞ்சுடர்ச்சோதி! *

தேறேலென்னை உன்பொன்னடிச்சேர்த்துஒல்லை *

வேறேபோக எஞ்ஞான்றும்விடலே.

3001 விடலில் சக்கரத்தண்ணலை * மேவல்

விடலில் வண்குருகூர்ச்சடகோபன்சொல் *

கெடலிலாயிரத்துள் இவைபத்தும் *

கெடலில்வீடுசெய்யும் கிளர்வார்க்கே. (2)