2980 அணைவதரவணைமேல் பூம்பாவையாகம்

புணர்வது * இருவரவர்முதலும் தானே *

இணைவனாமெப்பொருட்கும், வீடுமுதலாம் *

புணைவன் பிறவிக்கடல்நீந்துவார்க்கே. (2)

2981 நீந்தும்துயர்ப்பிறவி உட்படமற்றெவ்வெவையும் *

நீந்தும்துயரில்லா வீடுமுதலாம் *

பூந்தண்புனற்பொய்கை யானையிடர்கடிந்த *

பூந்தண்துழாய் என்தனிநாயகன்புணர்ப்பே.

2982 புணர்க்குமயனாம் அழிக்குமரனாம் *

புணர்த்ததன்னுந்தியோடு ஆகத்துமன்னி *

புணர்த்ததிருவாகித் தன்மார்வில்தான்சேர் *

புணர்ப்பன் பெரும்புணர்ப்பு எங்கும்புலனே.

2983 புலனைந்துமேயும் பொறியைந்தும்நீக்கி *

நலமந்தமில்லது ஓர்நாடுபுகுவீர் *

அலமந்துவீய அசுரரைச் செற்றான் *

பலமுந்துசீரில் படிமினோவாதே.

2984 ஒவாத்துயர்ப்பிறவி உட்பட மற்றெவ்வெவையும் *

மூவாத்தனிமுதலாய் மூவுலகும் காவலோன் *

மாவாகி ஆமையாய் மீனாகிமானிடமாம் *

தேவாதிதேவபெருமான் என்தீர்த்தனே.

2985 தீர்த்தனுலகளந்த சேவடிமேல்பூந்தாமம்

சேர்த்தியவையே * சிவன்முடிமேல்தான்கண்டு *

பார்த்தன்தெளிந்தொழிந்த பைந்துழாயான்பெருமை *

பேர்த்துமொருவரால் பேசக்கிடந்ததே?

2986 கிடந்திருந்துநின்றளந்து கேழலாய்க்கீழ்புக்

கிடந்திடும் * தன்னுள் கரக்கும் உமிழும் *

தடம்பெருந்தோளாரத்தழுவும் பாரென்னும்

மடந்தையை * மால்செய்கின்றமால் ஆர்காண்பாரே?

2987 காண்பாரார்? எம்மீசன் கண்ணனையென்காணுமாறு? *

ஊண்பேசில் எல்லாவுலகுமோர்துற்றாற்றா *

சேண்பாலவீடோ உயிரோமற்றெப்பொருட்கும் *

ஏண்பாலும்சோரான்பரந்துளனாமெங்குமே.

2988 எங்கும்முளன் கண்ணனென்றமகனைக்காய்ந்து *

இங்கில்லையாலென்று இரணியன் தூண்புடைப்ப *

அங்கப்பொழுதே அவன்வீயத்தோன்றிய * என்

சிங்கப்பிரான் பெருமை ஆராயும்சீர்மைத்தே?

2989 சீர்மைகொள்வீடு சுவர்க்கம்நரகீறா *

ஈர்மைகொள்தேவர்நடுவா மற்றெப்பொருட்கும் *

வேர்முதலாய்வித்தாய்ப் பரந்துதனிநின்ற *

கார்முகில்போல்வண்ணன் என்கண்ணனைநான் கண்டேனே.

2990 கண்தலங்கள் செய்ய கருமேனியம்மானை *

வண்டலம்பும்சோலை வழுதிவளநாடன் *

பண்தலையிற்சொன்னதமிழ் ஆயிரத்து இப்பத்தும் வல்லார் *

விண்தலையில்வீற்றிருந்தாள்வர் எம்மாவீடே. (2)