1553 பனியேய்பரங்குன்றின் பவளத்திரளே! *

முனியே! திருமூழிக்களத்துவிளக்கே! *

இனியாய்தொண்டரோம் பருகுஇன்னமுதாய

கனியே! * உன்னைக்கண்டுகொண்டு உய்ந்தொழிந்தேனே.

2061 பொன்னானாய்! பொழிலேழும்காவல்பூண்ட

புகழானாய்! இகழ்வாயதொண்டனேன்நான் *

என்னானாய்! என்னானாய்! என்னலல்லால்

என்னறிவன்ஏழையேன் * உலகமேத்தும்

தென்னானாய்! வடவானாய்! குடபாலானாய்!

குணபாலமதயானாய்! இமையோர்க்குஎன்றும்

முன்னானாய்! * பின்னானார்வணங்கும்சோதி!

திருமூழிக்களத்தானாய்! முதலானாயே! (2)

2781 மூழிக்களத்துவிளக்கினை *

அன்னவனை ஆதனூராண்டாளக்குமையனை *

நென்னலையின்றினை நாளையை * - நீர்மலைமேல் முன்னவனை

3739 எங்கானலகங்கழிவாய் இரைத்தேர்ந்திங்கினிதமரும் *

செங்காலமடநாராய்! திருமூழிக்களத்துறையும் *

கொங்கார்பூந்துழாய்முடி எங்குடக்கூத்தர்க்கு என் தூதாய் *

நுங்கால்கள்என்தலைமேல் கெழுமீரோநுமரோடே. (2)

3740 நுமரோடும்பிரியாதே நீரும்நும்சேவலுமாய் *

அமர்காதல்குருகி னங்காள்! அணிமூழிக்களத்துறையும் *

எமராலும்பழிப்புண்டு இங்கென்? தம்மாலிழிப்புண்டு *

தமரோடங்குறைவார்க்குத் தக்கிலமே? கேளீரே.

3741 தக்கிலமே? கேளீர்கள் தடம்புனல்வாயிரைதேரும் *

கொக்கினங்காள்! குருகினங்காள்! குளிர்மூழிக்களத்துறையும் *

செக்கமலத்தலர்போலும் கண்கைகால்செங்கனிவாய் *

அக்கமலத்திலைபோலும் திருமேனியடிகளுக்கே.

3742 திருமேனியடிகளுக்குத் தீவினையேன்விடுதூதாய் *

திருமூழிக்களமென்னும் செழுநகர்வாயணிமுகில்காள்! *

திருமேனியவட்கருளீர் என்றக்கால் * உம்மைத்தன்

திருமேனியொளியகற்றித் தெளிவிசும்புகடியுமே?

3743 தெளிவிசும்புகடிதோடித் தீவளைத்துமின்னிலகும் *

ஒளிமுகில்காள்! திருமூழிக்களத்துறையுமொண்சுடர்க்கு *

தெளிவிசும்புதிருநாடாத் தீவினையேன்மனத்துறையும் *

துளிவார்கட்குழலார்க்கு என்தூதுரைத்தல்செப்புமினே.

3744 தூதுரைத்தல்செப்புமின்கள் தூமொழிவாய் வண்டினங்காள்! *

போதிரைத்துமதுநுகரும் பொழில்மூழிக்களத்துறையும் *

மாதரைத்தம்மார்வகத்தே வைத்தார்க்கென்வாய்மாற்றம் *

தூதுரைத்தல்செப்புதிரேல் சுடர்வளையும்கலையுமே.

3745 சுடர்வளையும்கலையுங்கொண்டு அருவினையேன்தோள் துறந்த *

படர்புகழான் திருமூழிக்களத்துறையும்பங்கயக்கண் *

சுடர்பவளவாயனைக்கண்டு ஒருநாளோர்தூய்மாற்றம் *

படர்பொழில்வாய்க்குருகினங்காள்! எனக்கொன்று பணியீரே.

3746 எனக்கொன்றுபணியீர்கள் இரும்பொழில்வாயிரை தேர்ந்து *

மனக்கின்பம்படமேவும் வண்டினங்காள்! தும்பிகாள்! *

கனக்கொள்திண்மதிள்புடைசூழ் திருமூழிக்களத்துறையும் *

புனக்கொள்காயாமேனிப் பூந்துழாய்முடியார்க்கே.

3747 பூந்துழாய்முடியார்க்குப் பொன்னாழிக்கையாருக்கு *

ஏந்துநீரிளங்குருகே! திருமூழிக்களத்தாருக்கு *

ஏந்துபூண்முலைபயந்து என்னிணைமலர்க்கண்நீர்ததும்ப *

தாம்தம்மைக்கொண்டகல்தல் தகவன்றென்றுரையீரே.

3748 தகவன்றென்றுரையீர்கள் தடம்புனல்வாயிரைதேர்ந்து *

மிகவின்பம்படமேவும் மென்னடையஅன்னங்காள் *

மிகமேனிமெலிவெய்தி மேகலையும்ஈடழிந்து * என்

அகமேனியொழியாமே திருமூழிக்களத்தார்க்கே.

3749 ஒழிவின்றித்திருமூழிக்களத்துறையும் ஒண்சுடரை *

ஒழிவில்லாவணிமழலைக் கிளிமொழியாளலற்றியசொல் *

வழுவில்லாவண்குருகூர்ச் சடகோபன்வாய்ந்துரைத்த *

அழிவில்லாவாயிரத்து இப்பத்தும்நோயறுக்குமே. (2)