3431 நீராய்நிலனாய்த் தீயாய்க்காலாய்நெடுவானாய் *

சீரார்சுடர்க்களிரண்டாய்ச் சிவனாயனானாய்! *

கூராராழிவெண்சங்கேந்திக் கொடியேன்பால்

வாராய் * ஒருநாள் மண்ணும்விண்ணும்மகிழவே. (2)

3432 மண்ணும்விண்ணும்மகிழக் குறளாய்வலங்காட்டி *

மண்ணும்விண்ணும்கொண்ட மாயவம்மானே? *

நண்ணியுனைநான் கண்டுகந்துகூத்தாட *

நண்ணியொருநாள் ஞாலத்தூடேநடவாயே.

3433 ஞாலத்தூடேநடந்தும்நின்றும் கிடந்திருந்தும் *

சாலப்பலநாள் உகந்தோறுஉயிர்கள்காப்பானே! *

கோலத்திருமாமகளோடு உன்னைக்கூடாதே *

சாலப்பலநாள் அடியேன்இன்னம்தளர்வேனோ?

3434 தளர்ந்தும்முறிந்தும் சகடவசுரருடல்வேறா *

பிளந்துவீயத் திருக்காலாண்டபெருமானே! *

கிளர்ந்துபிரமன்சிவன் இந்திரன்விண்ணவர்சூழ *

விளங்கவொருநாள் காணவாராய்விண்மீதே.

3435 விண்மீதிருப்பாய்! மலைமேல் நிற்பாய்! கடல்சேர்ப்பாய்! *

மண்மீதுழல்வாய்! இவற்றுளெங்கும்மறைந்துறைவாய்! *

எண்மீதியன்றபுறவண்டத்தாய்! எனதாவி *

உள்மீதாடி உருக்காட்டாதேஒளிப்பாயோ?

3436 பாயோரடிவைத்து அதன்கீழ்ப் பரவைநிலமெல்லாம்

தாய் * ஓரடியால் எல்லாவுலகும்தடவந்த

மாயோன்! * உன்னைக்காண்பான் வருந்தியெனைநாளும் *

தீயோடுடன்சேர்மெழுகாய் உலகில்திரிவேனோ?

3437 உலகில்திரியுங்கருமகதியாய் உலகமாய் *

உலகுக்கேயோருயிருமானாய்! புறவண்டத்து *

அலகில்பொலிந்த திசைபத்தாயஅருவேயோ *

அலகில்பொலிந்த அறிவிலேனுக்கருளாயே.

3438 அறிவிலேனுக்கருளாய் அறிவாருயிரானாய் *

வெறிகொள்சோதிமூர்த்தி! அடியேன்நெடுமாலே! *

கிறிசெய்தென்னைப்புறத்திட்டு இன்னம்கெடுப்பாயோ? *

பிறிதொன்றறியாஅடியேன் ஆவிதிகைக்கவே.

3439 ஆவிதிகைக்க ஐவர்குமைக்கும்சிற்றின்பம் *

பாவியேனைப் பலநீகாட்டிப்படுப்பாயோ *

தாவிவையங்கொண்ட தடந்தாமரைகட்கே *

கூவிக்கொள்ளும்காலம் இன்னங்குறுகாதோ?

3440 குறுகாநீளா இறுதிகூடாஎனையூழி *

சிறுகாபெருகா அளவிலின்பம்சேர்ந்தாலும் *

மறுகாலின்றிமாயோன் உனக்கேயாளாகும் *

சிறுகாலத்தையுறுமோ? அந்தோ! தெரியிலே.

3441 தெரிதல்நினைதல் எண்ணலாகாத்திருமாலுக்கு *

உரியதொண்டர்தொண்டர் தொண்டன்சடகோபன் *

தெரியச்சொன்ன ஓராயிரத்துள் இப்பத்தும் *

உரியதொண்டராக்கும் உலகமுண்டாற்கே. (2)