2956 வைகுந்தா! மணிவண்ணனே! என்பொல்லாத் திருக்குறளா! என்னுள்மன்னி *

வைகும்வைகல்தோறும் அமுதாயவானேறே! *

செய்குந்தாவருந்தீமையுன்னடியார்க்குத்தீர்த்து அசுரர்க்குத்தீமைகள்

செய்குந்தா! * உன்னைநான் பிடித்தேன்கொள் சிக்கெனவே. (2)

2957 சிக்கெனச்சிறிதோரிடமும் புறப்படாத்தன்னுள்ளே * உலகுகள்

ஒக்கவேவிழுங்கிப் புகுந்தான்புகுந்ததற்பின் *

மிக்கஞானவெள்ளச்சுடர்விளக்காய்த் துளக்கற்றமுதமாய் * எங்கும்

பக்கம்நோக்கறியான் என்பைந்தாமரைக்கண்ணனே.

2958 தாமரைக்கண்ணனை விண்ணோர்பரவுந்தலைமகனை * துழாய்விரைப்

பூமருவுகண்ணி எம்பிரானைப்பொன்மலையை *

நாமருவிநன்கேத்தியுள்ளிவணங்கி நாம்மகிழ்ந்தாட * நாவலர்

பாமருவிநிற்கத்தந்த பான்மையே! வள்ளலே!

2959 வள்ளலே! மதுசூதனா! என்மரதகமலையே! * உனைநினைந்

தெள்கல்தந்தவெந்தாய்! உன்னையெங்ஙனம்விடுகேன்! *

வெள்ளமேபுரைநின்புகழ்குடைந்தாடிப்பாடிக் களித்துகந்துகந்து *

உள்ளநோய்களெல்லாம் துரந்து உய்ந்துபோந்திருந்தே.

2960 உய்ந்துபோந்தென்னுலப்பிலாத வெந்தீவினைகளைநாசஞ்செய்து * உனது

அந்தமிலடிமைஅடைந்தேன்விடுவேனோ *

ஐந்துபைந்தலையாடரவணைமேவிப் பாற்கடல்யோக நித்திரை *

சிந்தைசெய்தவெந்தாய்? உன்னைச்சிந்தைசெய்துசெய்தே.

2961 உன்னைச்சிந்தைசெய்து உன்நெடுமாமொழியிசை பாடியாடி * என்

முன்னைத்தீவினைகள் முழுவேரரிந்தனன்யான் *

உன்னைச்சிந்தையினாலிகழ்ந்த இரணியனகல்மார்வம் கீண்ட * என்

முன்னைக்கோளரியே!முடியாததென்எனக்கே?

2962 முடியாததென்? எனக்கேலினி முழுவேழுலகுமுண்டான் * உகந்துவந்து

அடியேனுள்புகுந்தான் அகல்வானுமல்லனினி *

செடியார்நோய்களெல்லாம்துரந்து எமர்கீழ்மேலெழு பிறப்பும் *

விடியாவெந்நரகத்து என்றும்சேர்தல்மாறினரே.

2963 மாறிமாறிப்பலபிறப்பும்பிறந்து அடியையடைந்துள்ளந்தேறி *

ஈறிலின்பத்திருவெள்ளம் யான்மூழ்கினன் *

பாறிப்பாறியசுரர்தம் பல்குழாங்கள் நீறெழ * பாய்பறவையொன்று

ஏறிவீற்றிருந்தாய்! உன்னையென்னுள்நீக்கேலெந்தாய்!

2964 எந்தாய்! தண்திருவேங்கடத்துள்நின்றாய்! இலங்கை செற்றாய்! * மராமரம்

பைந்தாளேழுருவ ஒருவாளிகோத்தவில்லா! *

கொந்தார்தண்ணந்துழாயினாய்! அமுதே! உன்னையென்னுள்ளேகுழைத்தவெம்

மைந்தா! * வானேறே! இனியெங்குப்போகின்றதே?

2965 போகின்றகாலங்கள்போயகாலங்கள் போகுகாலங்கள் * தாய்தந்தையுயி

ராகின்றாய்! உன்னைநானடைந்தேன்விடுவேனோ? *

பாகின்றதொல்புகழ்மூவுலகுக்கும் நாதனே! பரமா! * தண்வேங்கடம்

மேகின்றாய்! தண்துழாய்விரைநாறுகண்ணியனே!

2966 கண்ணித்தண்ணந்துழாய்முடிக் கமலத்தடம்பெருங் கண்ணனை * புகழ்

நண்ணித்தென்குருகூர்ச் சடகோபன்மாறன்சொன்ன *

எண்ணில்சோர்விலந்தாதி ஆயிரத்துள்ளிவையுமோர் பத்திசையொடும் *

பண்ணில்பாடவல்லாரவர் கேசவன்தமரே. (2)