3816 சார்வேதவநெறிக்குத் தாமோதரன்தாள்கள் *

கார்மேகவண்ணன் கமலநயனத்தன் *

நீர்வானம்மண்ணெரிகாலாய் நின்றநேமியான் *

பேர்வானவர்கள் பிதற்றும் பெருமையனே. (2)

3817 பெருமையனேவானத்திமையோர்க்கும்காண்டற்

கருமையனே * ஆகத்தணையாதார்க்கு * என்றும்

திருமெய்யுறைகின்ற செங்கண்மால் * நாளும்

இருமைவினைகடிந்து இங்கென்னையாள்கின்றானே.

3818 ஆள்கின்றானாழியான் ஆரால்குறைவுடையம்? *

மீள்கின்றதில்லைப் பிறவித்துயர்கடிந்தோம் *

வாள்கெண்டையொண்கண் மடப்பின்னைதன்கேள்வன் *

தாள்கண்டுகொண்டு என்தலைமேற்புனைந்தேனே.

3819 தலைமேற்புனைந்தேன் சரணங்கள் * ஆலின்

இலைமேல்துயின்றான் இமையோர்வணங்க *

மலைமேல்தான் நின்று என்மனத்துளிருந்தானை *

நிலைபேர்க்கலாகாமை நிச்சித்திருந்தேனே.

3820 நிச்சித்திருந்தேன் என்நெஞ்சம்கழியாமை *

கைச்சக்கரத்தண்ணல் கள்வம்பெரிதுடையன் *

மெச்சப்படான்பிறர்க்கு மெய்போலும்பொய்வல்லன் *

நச்சப்படும்நமக்கு நாகத்தணையானே.

3821 நாகத்தணையானை நாள்தோறும்ஞானத்தால் *

ஆகத்தணைப்பார்க்கு அருள்செய்யும்அம்மானை *

மாகத்திளமதியம் சேரும்சடையானை *

பாகத்துவைத்தான்தன் பாதம்பணிந்தேனே.

3822 பணிநெஞ்சே! நாளும் பரமபரம்பரனை *

பிணியொன்றும்சாரா பிறவிகெடுத்தாளும் *

மணிநின்றசோதி மதுசூதன்என்னம்மான் *

அணிநின்றசெம்பொன் அடலாழியானே.

3823 ஆழியான் ஆழியமரர்க்குமப்பாலான் *

ஊழியானூழிபடைத்தான் நிரைமேய்த்தான் *

பாழியந்தோளால் வரையெடுத்தான்பாதங்கள் *

வாழிஎன்நெஞ்சே! மறவாதுவாழ்கண்டாய்.

3824 கண்டேன்கமலமலர்ப்பாதம் காண்டலுமே *

விண்டேயொழிந்த வினையாயினவெல்லாம் *

தொண்டேசெய்து என்றும்தொழுதுவழியொழுக *

பண்டேபரமன்பணித்த பணிவகையே.

3825 வகையால்மனமொன்றி மாதவனை * நாளும்

புகையால்விளக்கால் புதுமலரால்நீரால் *

திசைதோறுஅமரர்கள் சென்றிறைஞ்சநின்ற *

தகையான்சரணம் தமர்கட்கோர்பற்றே.

3826 பற்றென்றுபற்றிப் பரமபரம்பரனை *

மல்திண்தோள்மாலை வழுதிவளநாடன் *

சொல்தொடையந்தாதி ஓராயிரத்துள் இப்பத்தும் *

கற்றார்க்கோர்பற்றாகும் கண்ணன்கழலிணையே. (2)