3585 அங்குமிங்கும் வானவர்தானவர் யாவரும் *

எங்குமிணையையென்று உன்னையறியகிலாதுஅலற்றி *

அங்கஞ்சேரும் பூமகள்மண்மகளாய்மகள் *

சங்குசக்கரக்கையவனென்பர் சரணமே. (2)

3586 சரணமாகிய நான்மறைநூல்களும்சாராதே *

மரணம்தோற்றம் வான்பிணிமூப்பென்றிவைமாய்த்தோம் *

கரணப்பல்படை பற்றறவோடும்கனலாழி *

அரணத்திண்படையேந்திய ஈசற்காளாயே.

3587 ஆளுமாளார் ஆழியும்சங்கும்சுமப்பார்தாம் *

வாளும்வில்லுங்கொண்டு பின்செல்வார்மற்றில்லை *

தாளும்தோளும் கைகளையாரத்தொழக்காணேன் *

நாளும்நாளும்நாடுவன் அடியேன்ஞாலத்தே.

3588 ஞாலம்போனகம்பற்றி ஓர்முற்றாவுருவாகி *

ஆலம்பேரிலை அன்னவசஞ்செய்யும்அம்மானே! *

காலம்பேர்வது ஓர்காரிருள்ஊழியொத்துளதால் * உன்

கோலங்காரேழில் காணலுற்றுஆழுங்கொடியேற்கே.

3589 கொடியார்மாடக் கோளூரகத்தும்புளிங்குடியும் *

மடியாதின்னே நீதுயில்மேவிமகிழ்ந்ததுதான் *

அடியாரல்லல்தவிர்த்தஅசைவோ? அன்றேல்இப்

படிதான் * நீண்டுதாவிய அசைவோ? பணியாயே. (2)

3590 பணியாவமரர் பணிவும்பண்பும்தாமேயாம் *

அணியாராழியும் சங்கமும்ஏந்துமவர்காண்மின் *

தணியாவெந்நோய் உலகில்தவிர்ப்பான் * திருநீல

மணியார்மேனியோடு என்மனம்சூழவருவாரே.

3591 வருவார்செல்வார் வண்பரிசாரத்திருந்த * என்

திருவாழ்மார்வற்கு என்திறம்சொல்லார்செய்வதென்? *

உருவார்சக்கரம் சங்குசுமந்துஇங்கும்மோடு *

ஒருபாடுழல்வான் ஓரடியானுமுளனென்றே. (2)

3592 என்றே? என்னை உன்னேரார்கோலத்திருந்தடிக்கீழ் *

நின்றேயாட்செய்ய நீகொண்டருளநினைப்பதுதான் *

குன்றேழ்பாரேழ் சூழ்கடல்ஞாலம்முழுவேழும் *

நின்றேதாவிய நீள்கழலாழித்திருமாலே!

3593 திருமால்! நான்முகன் செஞ்சடையானென்றிவர்கள் * எம்

பெருமான்தன்மையை யாரறிகிற்பார்? பேசியென்? *

ஒருமாமுதல்வா! ஊழிப்பிரான்! என்னையாளுடை *

கருமாமேனியன்! என்பன் என்காதல்கலக்கவே.

3594 கலக்கமில்லாநல்தவமுனிவர் கரைகண்டோர் *

துளக்கமில்லா வானவரெல்லாம்தொழுவார்கள் *

மலக்கமெய்த மாகடல்தன்னைக்கடைந்தானை *

உலக்கநாம்புகழ்கிற்பது என்செய்வது? உரையீரே.

3595 உரையாவெந்நோய்தவிர அருள்நீண்முடியானை *

வரையார்மாட மன்னுகுருகூர்ச்சடகோபன் *

உரையேய்சொல்தொடை ஓராயிரத்துள்இப்பத்தும் *

நிரையேவல்லார் நீடுலகத்துப்பிறவாரே. (2)