3211 நண்ணாதார்முறுவலிப்ப நல்லுற்றார்கரைந்தேங்க *

எண்ணாராத்துயர்விளைக்கும் இவையென்ன உலகியற்கை? *

கண்ணாளா! கடல்கடைந்தாய்! உனகழற்கேவரும்பரிசு *

தண்ணாவாதடியேனைப் பணிகண்டாய்சாமாறே. (2)

3212 சாமாறும்கெடுமாறும் தமருற்றார் தலைத்தலைப்பெய்து *

ஏமாறிக்கிடந்தலற்றும் இவையென்ன உலகியற்கை? *

ஆமாறொன்றறியேன்நான் அரவணையாய்! அம்மானே! *

கூமாறேவிரைகண்டாய் அடியேனைக்குறிக்கொண்டே.

3213 கொண்டாட்டும்குலம்புனைவும் தமருற்றார் விழுநிதியும் *

வண்டார்பூங்குழலாளும் மனையொழிய உயிர்மாய்தல் *

கண்டாற்றேன்உலகியற்கை கடல்வண்ணா! அடியேனை *

பண்டேபோற்கருதாது உன்னடிக்கேகூய்ப்பணி கொள்ளே.

3214 கொள்ளென்றுகிளர்ந்தெழுந்த பெருஞ்செல்வம் நெருப்பாக *

கொள்ளென்றுதமம்மூடும் இவையென்ன உலகியற்கை? *

வள்ளலே! மணிவண்ணா! உனகழற்கேவரும்பரிசு *

வள்ளல்செய்தடியேனை உனதருளால்வாங்காயே.

3215 வாங்குநீர்மலருலகில் நிற்பனவும்திரிவனவும் *

ஆங்குயிர்கள்பிறப்பிறப்புப் பிணிமூப்பால்தகர்ப்புண்ணும் *

ஈங்கிதன்மேல்வெந்நரகம் இவையென்ன உலகியற்கை? *

வாங்கெனைநீமணிவண்ணா! அடியேனை மறுக்கேலே.

3216 மறுக்கிவல்வலைப்படுத்திக் குமைத்திட்டுக்கொன்றுண்பர் *

அறப்பொருளையறிந்தோரார் இவையென்ன உலகியற்கை? *

வெறித்துளவமுடியானே! வினையேனைஉனக்கடிமை

அறக்கொண்டாய் * இனியென்னாரமுதே! கூயருளாயே.

3217 ஆயே! இவ்வுலகத்து நிற்பனவும்திரிவனவும் *

நீயேமற்றொருபொருளும் இன்றிநீநின்றமையால் *

நோயேமூப்பிறப்பிறப்புப் பிணியேயென்றிவையொழிய *

கூயேகொள்ளடியேனைக் கொடுவுலகம்காட்டேலே.

3218 காட்டிநீகரந்துமிழும் நிலம்நீர்தீவிசும்புகால் *

ஈட்டீநீவைத்தமைத்த இமையோர்வாழ்தனிமுட்டை *

கோட்டையினில்கழித்து என்னைஉன்கொழுஞ்சோதியுயரத்து *

கூட்டரியதிருவடிக்கள் எஞ்ஞான்றுகூட்டுதியே?

3219 கூட்டுதிநின்குரைகழல்கள் இமையோரும் தொழாவகைசெய்து *

ஆட்டுதிநீஅரவணையாய்! அடியேனுமஃதறிவன் *

வேட்கையெல்லாம்விடுத்து என்னைஉன்திருவடியேசுமந்துழல *

கூட்டரியதிருவடிக்கள் கூட்டினைநான்கண்டேனே.

3220 கண்டுகேட்டுற்றுமோந்துண்டுழலும் ஐங்கருவி

கண்டவின்பம் * தெரிவரிய அளவில்லாச்சிற்றின்பம் *

ஒண்தொடியாள்திருமகளும் நீயுமேநிலாநிற்ப *

கண்டசதிர்கண்டொழிந்தேன் அடைந்தேன் உன்திருவடியே.

3221 திருவடியைநாரணனைக் கேசவனைப்பரஞ்சுடரை *

திருவடிசேர்வதுகருதிச் செழுங்குருகூர்ச்சடகோபன் *

திருவடிமேலுரைத்ததமிழ் ஆயிரத்துள்இப்பத்தும் *

திருவடியேயடைவிக்கும் திருவடிசேர்ந்தொன்றுமினே. (2)