3112 சன்மம்பலபலசெய்துவெளிப்பட்டுச் சங்கொடுசக்கரம்வில் *

ஒண்மையுடையவுலக்கையொள்வாள் தண்டுகொண்டு புள்ளூர்ந்து * உலகில்

வன்மையுடையவரக்கர்அசுரரை மாளப்படைபொருத *

நன்மையுடையவன்சீர்ப்பரவப்பெற்ற நானோர் குறைவிலனே. (2)

3113 குறைவில்தடங்கடல்கோளரவேறித் தன்கோலச் செந்தாமரைக்கண் *

உறைபவன்போலவோர்யோகுபுணர்ந்த ஒளிமணிவண்ணன் கண்ணன் *

கறையணிமூக்குடைப்புள்ளைக்கடாவி அசுரரைக்காய்ந்த அம்மான் *

நிறைபுகழேத்தியும்பாடியுமாடியும் யானொருமுட்டிலனே.

3114 முட்டில்பல்போகத்தொருதனிநாயகன் மூவுலகுக்குரிய *

கட்டியைத்தேனையமுதை நன்பாலைக்கனியைக் கரும்பு தன்னை *

மட்டவிழ்தண்ணந்துழாய்முடியானைவணங்கி அவன் திறத்துப்

பட்டபின்னை * இறையாகிலும் யானென்மனத்துப் பரிவிலனே.

3115 பரிவின்றிவாணனைக் காத்துமென்று அன்றுபடையொடும் வந்தெதிர்ந்த *

திரிபுரஞ்செற்றவனும்மகனும் பின்னுமங்கியும்போர் தொலைய *

பொருசிறைப்புள்ளைக்கடாவிய மாயனையாயனைப்பொற் சக்கரத்

தரியினை * அச்சுதனைப்பற்றி யானிறையேனுமிடரிலனே.

3116 இடரின்றியேயொருநாளொருபோழ்தில் எல்லாவுலகும் கழிய *

படர்புகழ்ப்பார்த்தனும்வைதிகனும் உடனேறத்திண்தேர்கடவி *

சுடரொளியாய்நின்றதன்னுடைச்சோதியில் வைதிகன் பிள்ளைகளை *

உடலொடும்கொண்டுகொடுத்தவனைப்பற்றி ஒன்றும் துயரிலனே.

3117 துயரில்சுடரொளிதன்னுடைச்சோதி நின்றவண்ணம் நிற்கவே *

துயரில்மலியும்மனிசர்பிறவியில் தோன்றிக்கண் காணவந்து *

துயரங்கள்செய்துதன்தெய்வநிலையுலகில் புகவுய்க்குமம் மான் *

துயரமில்சீர்க்கண்ணன்மாயன்புகழ்துற்ற யானோர் துன்பமிலனே.

3118 துன்பமுமின்பமுமாகிய செய்வினையாய்உலகங்களுமாய் *

இன்பமில்வெந்நரகாகி இனியநல்வான்சுவர்க்கங்களுமாய் *

மன்பல்லுயிர்களுமாகிப் பலபலமாயமயக்குகளால் *

இன்புறுமிவ்விளையாட்டுடையானைப்பெற்று ஏதுமல்லலிலனே.

3119 அல்லலிலின்பமளவிறந்தெங்கும் அழகமர்சூழொளியன் *

அல்லிமலர்மகள்போகமயக்குக்கள் ஆகியும்நிற்குமம்மான் *

எல்லையில்ஞானத்தன்ஞானமஃதேகொண்டு எல்லாக் கருமங்களும்செய் *

எல்லையில்மாயனைக்கண்ணனைத்தாள்பற்றி யானோர் துக்கமிலனே.

3120 துக்கமில்ஞானச்சுடரொளிமூர்த்தி துழாயலங்கல்பெருமான் *

மிக்கபன்மாயங்களால்விகிர்தஞ்செய்து வேண்டு முருவுகொண்டு *

நக்கபிரானோடயன்முதலாக எல்லாருமெவையும் * தன்னுள்

ஒக்கவொடுங்கவிழுங்கவல்லானைப்பெற்று ஒன்றும் தளர்விலனே.

3121 தளர்வின்றியேயென்றுமெங்கும்பரந்த தனிமுதல் ஞானமொன்றாய் *

அளவுடையைம்புலன்கள் அறியாவகையால் அருவாகி நிற்கும் *

வளரொளியீசனைமூர்த்தியைப் பூதங்களைந்தை இருசுடரை *

கிளரொளிமாயனைக்கண்ணனைத்தாள்பற்றி யானென்றும் கேடிலனே.

3122 கேடில்விழுப்புகழ்க்கேசவனைக் குருகூர்ச்சடகோபன் சொன்ன *

பாடலோராயிரத்துள் இவையுமொருபத்தும்பயிற்ற வல்லார்கட்கு * அவன்

நாடும்நகரமும்நன்குடன்காண நலனிடையூர்திபண்ணி *

வீடும்பெறுத்தித்தன்மூவுலகுக்கும்தரும் ஒருநாயகமே. (2)