1418 ஏழைஏதலன்கீழ்மகனென்னாது

இரங்கி மற்றவற்குஇன்னருள்சுரந்து *

மாழைமான்மடநோக்கியுன்தோழி

உம்பிஎம்பியென்றொழிந்திலை * உகந்து

தோழன்நீஎனக்குஇங்கொழியென்ற

சொற்கள்வந்து அடியேன்மனத்திருந்திட *

ஆழிவண்ண! நின்னடியிணையடைந்தேன்

அணிபொழில்திருவரங்கத்தம்மானே. (2)

1419 வாதமாமகன்மர்க்கடம்விலங்கு

மற்றோர்சாதியென்றொழிந்திலை * உகந்து

காதலாதரம்கடலினும்பெருகச் செய்

தகவினுக்குஇல்லைகைம்மாறென்று *

கோதில்வாய்மையினாயொடும் உடனே

உண்பன்நானென்றஓண்பொருள் * எனக்கும்

ஆதல்வேண்டுமென்றுஅடியிணையடைந்தேன்

அணிபொழில்திருவரங்கத்தம்மானே!

1420 கடிகொள்பூம்பொழில்காமருபொய்கை

வைகுதாமரைவாங்கியவேழம் *

முடியும்வண்ணம்ஓர்முழுவலிமுதலை

பற்ற மற்றதுநின்சரண்நினைப்ப *

கொடியவாய்விலங்கின்னுயிர்மலங்கக்

கொண்டசீற்றமொன்றுண்டுளதறிந்து * உன்

அடியனேனும்வந்துஅடியிணையடைந்தேன்

அணிபொழில்திருவரங்கத்தம்மானே!

1421 நஞ்சுசோர்வதோர்வெஞ்சினவரவம்

வெருவிவந்துநின்சரணெனச்சரணா *

நெஞ்சில்கொண்டுநின்னஞ்சிறைப்பறவைக்கு

அடைக்கலம்கொடுத்து அருள்செய்ததறிந்து *

வெஞ்சொலாளர்கள்நமன்றமர்கடியர்

கொடியசெய்வனவுள * அதற்குஅடியேன்

அஞ்சிவந்துநின்னடியிணையடைந்தேன்

அணிபொழில்திருவரங்கத்தம்மானே!

1422 மாகமாநிலம்முழுவதும்வந்திறைஞ்சும்

மலரடிகண்டமாமறையாளன் *

தோகைமாமயிலன்னவரின்பம்

துற்றிலாமையில் அத்த! இங்குஒழிந்து *

போகம்நீயெய்திப்பின்னும்நம்மிடைக்கே

போதுவாயென்றபொன்னருள் * எனக்கும்

ஆகவேண்டுமென்றுஅடியிணையடைந்தேன்

அணிபொழில்திருவரங்கத்தம்மானே!

1423 மன்னுநான்மறைமாமுனிபெற்ற

மைந்தனை மதியாதவெங்கூற்றந்

தன்னையஞ்சி * நின்சரணெனச்சரணாய்த்

தகவில்காலனையுகமுனிந்தொழியா *

பின்னைஎன்றும்நின்திருவடிபிரியாவண்ணம்

எண்ணியபேரருள் * எனக்கும்

அன்னதாகுமென்றுஅடியிணையடைந்தேன்

அணிபொழில்திருவரங்கத்தம்மானே!

1424 ஓதுவாய்மையும்உவனியப்பிறப்பும்

உனக்குமுன்தந்தஅந்தணனொருவன் *

காதலென்மகன்புகலிடம்காணேன் *

கண்டுநீதருவாயெனக்குஎன்று *

கோதில்வாய்மையினான்உனைவேண்டிய

குறைமுடித்துஅவன்சிறுவனைக்கொடுத்தாய் *

ஆதலால்வந்துஉன்னடியிணையடைந்தேன்

அணிபொழில்திருவரங்கத்தம்மானே!

1425 வேதவாய்மொழி அந்தணனொருவன்

எந்தை! நின்சரண், என்னுடைமனைவி *

காதல்மக்களைப்பயத்தலும்காணாள்

கடியதோர்தெய்வங்கொண்டொளிக்கு மென்றழைப்ப *

ஏதலார்முன்னேஇன்னருள் அவற்குச்செய்து

உன்மக்கள்மற்றிவரென்றுகொடுத்தாய் *

ஆதலால்வந்துஉன்னடியிணையடைந்தேன்

அணிபொழில்திருவரங்கத்தம்மானே!

1426 துளங்குநீண்முடியரசர்தங்குரிசில்

தொண்டைமன்னவன்திண்திறலொருவற்கு

உளங்கொளன்பினோடுஇன்னருள்சுரந்து

அங்கோடுநாழிகையேழுடனிருப்ப *

வளங்கொள்மந்திரம்மற்றவற்குஅருளிச்

செய்தவாறு அடியேனறிந்து * உலக

மளந்தபொன்னடியேயடைந்துய்ந்தேன்

அணிபொழில்திருவரங்கத்தம்மானே! (2)

1427 மாடமாளிகைசூழ்திருமங்கை

மன்னன் ஒன்னலர்தங்களைவெல்லும் *

ஆடல்மாவலவன்கலிகன்றி

அணிபொழில்திருவரங்கத்தம்மானை *

நீடுதொல்புகழாழிவல்லானை

எந்தையைநெடுமாலைநினைந்த *

பாடல்பத்திவைபாடுமின்தொண்டீர்!

பாட நும்மிடைப்பாவம்நில்லாவே. (2)