1218 நந்தாவிளக்கே! அளத்தற்கு அரியாய்!

நரநாரணனே! கருமாமுகில் போல்

எந்தாய்! * எமக்கே அருளாயெனநின்று

இமையோர் பரவும் இடம் * எத்திசையும்

கந்தாரம் அந்தேன் இசைபாடமாடே

களிவண்டுமிழற்ற நிழல்துதைந்து *

மந்தாரம் நின்று மணமல்குநாங்கூர்

மணிமாடக் கோயில் வணங்கு என்மனனே! (2)

1219 முதலைத்தனிமாமுரண்தீரஅன்று

முதுநீர்த்தடத்துச்செங்கண்வேழம்உய்ய *

விதலைத்தலைச்சென்றுஅதற்கே உதவி

வினைதீர்த்தஅம்மானிடம் * விண்ணணவும்

பதலைக்கபோதத்தொளிமாடநெற்றிப்

பவளக்கொழுங்கால்பைங்கால்புறவம் *

மதலைத்தலைமென்பெடைகூடுநாங்கூர்

மணிமாடக் கோயில் வணங்கு என்மனனே!

1220 கொலைப்புண்தலைக்குன்றமொன்றுஉய்ய அன்று

கொடுமாமுதலைக்குஇடர்செய்து * கொங்குஆர்

இலைப்புண்டரீகத்தவளின்பம் அன்போடு

அணைந்திட்டஅம்மானிடம் * ஆளரியால்

அலைப்புண்டயானைமருப்பும்அகிலும்

அணிமுத்தும்வெண்சாமரையோடு * பொன்னி

மலைப்பண்டமண்டத்திரையுந்து நாங்கூர்

மணிமாடக் கோயில் வணங்கு என்மனனே!

1221 சிறையார்உவணப்புள்ளொன்றுஏறி அன்று

திசைநான்கும்நான்கும்இரிய * செருவில்

கறையார்நெடுவேலரக்கர்மடியக்

கடல்சூழிலங்கை கடந்தான்இடந்தான் *

முறையால்வளர்க்கின்ற முத்தீயர்நால்வேதர்

ஐவேள்வியாறங்கர் ஏழினிசையோர் *

மறையோர்வணங்கப்புகழெய்து நாங்கூர்

மணிமாடக் கோயில் வணங்கு என்மனனே!

1222 இழையாடுகொங்கைத்தலைநஞ்சம்உண்டிட்டு

இளங்கன்றுகொண்டுவிளங்காய்எறிந்து *

தழைவாடவந்தாள்குருந்தம்ஓசித்துத்

தடந்தாமரைப்பொய்கைபுக்கான்இடந்தான் *

குழையாடவல்லிக்குலமாட மாடே

குயில்கூவநீடுகொடிமாடம்மல்கு *

மழையாடுசோலைமயிலாலு நாங்கூர் *

மணிமாடக் கோயில் வணங்கு என்மனனே!

1223 பண்நேர்மொழிஆய்ச்சியர்அஞ்ச வஞ்சப்

பகுவாய்க்கழுதுக்குஇரங்காது * அவள்தன்

உண்ணாமுலைமற்றவளாவியோடும்

உடனேசுவைத்தானிடம் * ஓங்குபைந்தாள்

கண்ணார்கரும்பின்கழைதின்றுவைகிக்

கழுநீரில்மூழ்கிச்செழுநீர்த்தடத்து *

மண்ணேந்துஇளமேதிகள்வைகு நாங்கூர்

மணிமாடக் கோயில் வணங்கு என்மனனே!

1224 தளைக்கட்டவிழ்தாமரைவைகுபொய்கைத்

தடம்புக்கு, அடங்காவிடங்கால்அரவம் *

இளைக்கத்திளைத்திட்டுஅதனுச்சிதன்மேல்

அடிவைத்தஅம்மானிடம் * மாமதியம்

திளைக்கும்கொடிமாளிகைசூழ் தெருவில்

செழுமுத்துவெண்ணெற்கெனச்சென்று * முன்றில்

வளைக்கைநுளைப்பாவையர்மாறு நாங்கூர்

மணிமாடக் கோயில் வணங்கு என்மனனே!

1225 துளையார் கருமென்குழல்ஆய்ச்சியர்தம்

துகில்வாரியும்சிற்றில்சிதைத்தும் * முற்றா

இளையார்விளையாட்டொடுகாதல்வெள்ளம்

விளைவித்தஅம்மானிடம் * வேல்நெடுங்கண்

முளைவாளெயிற்றுமடவார்பயிற்று

மொழிகேட்டிருந்துமுதிராதவின்சொல் *

வளைவாயகிள்ளைமறைபாடு நாங்கூர்

மணிமாடக் கோயில் வணங்கு என்மனனே!

1226 விடையோடவென்றுஆய்ச்சிமெந்தோள்நயந்த

விகிர்தா! விளங்குசுடராழியென்னும் *

படையோடுசங்கொன்றுஉடையாய்! எனநின்று

இமையோர்பரவும்இடம் * பைந்தடத்துப்

பெடையோடுசெங்காலஅன்னம்துகைப்பத்

தொகைப்புண்டரீகத்திடைச்செங்கழுநீர் *

மடையோடநின்றுமதுவிம்மு நாங்கூர்

மணிமாடக் கோயில் வணங்கு என்மனனே!

1227 வண்டார்பொழில்சூழ்ந்து அழகாயநாங்கூர்

மணிமாடக்கோயில்நெடுமாலுக்கு * என்றும்

தொண்டாயதொல்சீர் வயல்மங்கையர்க்கோன்

கலியன்ஒலிசெய் தமிழ்மாலை வல்லார் *

கண்டார்வணங்கக் களியானைமீதே

கடல்சூழுலகுக்கு ஒருகாவலராய் *

விண்தோய் நெடுவெண்குடை நீழலின்கீழ்

விரிநீருலகாண்டு விரும்புவரே. (2)