3706 மையார்கருங்கண்ணி கமலமலர்மேல்

செய்யாள் * திருமார்வினில்சேர் திருமாலே! *

வெய்யார்சுடராழி சுரிசங்கமேந்தும்

கையா! * உன்னைக்காணக் கருதும்என்கண்ணே. (2)

3707 கண்ணே! உன்னைக் காணக்கருதி * என்னெஞ்சம்

எண்ணேகொண்ட சிந்தையதாய்நின்றியம்பும் *

விண்ணோர்முனிவர்க்கு என்றும்காண்பரியாயை *

நண்ணாதொழியேன்என்று நானழைப்பனே.

3708 அழைக்கின்றஅடிநாயேன் நாய்கூழைவாலால் *

குழைக்கின்றதுபோல என்னுள்ளம்குழையும் *

மழைக்குஅன்றுகுன்றமெடுத்து ஆநிரைகாத்தாய்! *

பிழைக்கின்றதருளென்று பேதுறுவேனே.

3709 உறுவதிதுவென்று உனக்காட்பட்டு * நின்கண்

பெறுவதெதுகொலென்று பேதையேன்நெஞ்சம் *

மறுகல்செய்யும் வானவர்தானவர்க்குஎன்றும் *

அறிவதரிய அரியாயவம்மானே.

3710 அரியாயவம்மானை அமரர்பிரானை *

பெரியானைப் பிரமனைமுன்படைத்தானை *

வரிவாளரவினணைப் பள்ளிகொள்கின்ற *

கரியான்கழல்காணக் கருதும்கருத்தே.

3711 கருத்தே! உன்னைக் காணக்கருதி * என்னெஞ்சத்து

இருத்தாகஇருத்தினேன் தேவர்கட்கெல்லாம்

விருத்தா! * விளங்கும்சுடர்ச்சோதி உயரத்

தொருத்தா! * உனையுள்ளும் என்னுள்ளம்உகந்தே.

3712 உகந்தேயுன்னை உள்ளும் என்னுள்ளத்து * அகம்பால்

அகந்தானமர்ந்தே இடங்கொண்டஅமலா! *

மிகுந்தானவன்மார்வகலம் இருகூறா

நகந்தாய் * நரசிங்கமதாயவுருவே!

3713 உருவாகிய ஆறுசமயங்கட்கெல்லாம் *

பொருவாகிநின்றானவன் எல்லாப்பொருட்கும் *

அருவாகியஆதியைத் தேவர்கட்கெல்லாம் *

கருவாகியகண்ணனைக் கண்டுகொண்டேனே.

3714 கண்டுகொண்டு என்கண்ணிணையாரக்களித்து *

பண்டைவினையாயின பற்றோடறுத்து *

தொண்டர்க்கமுதுண்ணச் சொன்மாலைகள்சொன்னேன் *

அண்டத்தமரர்பெருமான் அடியேனே.

3715 அடியானிவனென்று எனக்காரருள்செய்யும்

நெடியானை * நிறைபுகழ் அஞ்சிறைப்புள்ளின்

கொடியானை * குன்றாமல் உலகமளந்த

அடியானை * அடைந்து அடியேனுய்ந்தவாறே!

3716 ஆறாமதயானை அடர்த்தவன்தன்னை *

சேறார்வயல் தென்குருகூர்ச்சடகோபன் *

நூறேசொன்ன ஓராயிரத்துள்இப்பத்தும் *

ஏறேதரும் வானவர்தமின்னுயிர்க்கே. (2)