3695 ஓராயிரமாய் உலகேழளிக்கும் *

பேராயிரங்கொண்டது ஓர்பீடுடையன் *

காராயின காளநன்மேனியினன் *

நாராயணன் நங்கள்பிரானவனே. (2)

3696 அவனேயகல்ஞாலம் படைத்திடந்தான் *

அவனேயஃதுண்டு உமிழ்ந்தானளந்தான் *

அவனேயவனும் அவனும்அவனும் *

அவனேமற்றெல்லாமும் அறிந்தனமே.

3697 அறிந்தனவேத வரும்பொருள்நூல்கள் *

அறிந்தனகொள்க அரும்பொருளாதல் *

அறிந்தனரெல்லாம் அரியைவணங்கி *

அறிந்தனர் நோய்களறுக்கும்மருந்தே.

3698 மருந்தே நங்கள்போகமகிழ்ச்சிக்கென்று *

பெருந்தேவர்குழாங்கள் பிதற்றும்பிரான் *

கருந்தேவனெம்மான் கண்ணன் விண்ணுலகம் *

தரும்தேவனைச் சோரேல்கண்டாய்மனமே!

3699 மனமே! உன்னை வல்வினையேன் இரந்து *

கனமேசொல்லினேன் இதுசோரேல்கண்டாய் *

புனமேவிய பூந்தண்துழாயலங்கல் *

இனமேதுமிலானை அடைவதுமே.

3700 அடைவதும் அணியார்மலர்மங்கைதோள் *

மிடைவதும் அசுரர்க்குவெம்போர்களே *

கடைவதும் கடலுளமுதம் * என்மனம்

உடைவதும் அவற்கே ஒருங்காகவே.

3701 ஆகம்சேர் நரசிங்கமதாகி * ஓர்

ஆகம்வள்ளுகிரால் பிளந்தானுறை *

மாகவைகுந்தம் காண்பதற்கு * என்மனம்

ஏகமெண்ணும் இராப்பகலின்றியே.

3702 இன்றிப்போக இருவினையும்கெடுத்து *

ஒன்றியாக்கைபுகாமை உய்யக்கொள்வான் *

நின்றவேங்கடம் நீள்நிலத்துள்ளது *

சென்றுதேவர்கள் கைதொழுவார்களே.

3703 தொழுதுமாமலர் நீர்சுடர்தூபம்கொண்டு *

எழுதுமென்னும்இது மிகையாதலில் *

பழுதில்தொல்புகழ்ப் பாம்பணைப்பள்ளியாய்! *

தழுவுமாறறியேன் உனதாள்களே.

3704 தாளதாமரையான் உனதுந்தியான் *

வாள்கொள்நீள்மழுவாளி உன்னாகத்தான் *

ஆளராய்த்தொழுவாரும் அமரர்கள் *

நாளும்என்புகழ்கோ உனசீலமே.

3705 சீலமெல்லையிலான் அடிமேல் * அணி

கோலநீள் குருகூர்ச்சடகோபன் * சொல் *

மாலையாயிரத்துள் இவைபத்தினின்

பாலர் * வைகுந்தமேறுதல் பான்மையே. (2)