3607 மாயக்கூத்தா! வாமனா! வினையேன்கண்ணா! கண்கைகால் *

தூயசெய்யமலர்களாச் சோதிச்செவ்வாய்முகிழதா *

சாயல்சாமத்திருமேனி தண்பாசடையா * தாமரைநீள்

வாசத்தடம்போல்வருவானே!ஒருநாள்காணவாராயே! (2)

3608 காணவாராயென்றென்று கண்ணும்வாயும்துவர்ந்து * அடியேன்

நாணிநன்னாட்டுஅலமந்தால் இரங்கிஒருநாள்நீஅந்தோ! *

காணவாராய்கருநாயிறுதிக்கும் கருமாமாணிக்க *

நாள்நல்மலைபோல்சுடர்ச்சோதி முடிசேர்சென்னி யம்மானே!

3609 முடிசேர்சென்னியம்மா! நின்மொய்பூந்தாமத்தண்துழாய் *

கடிசேர்கண்ணிப்பெருமானே! என்றென்றேங்கி யழுதக்கால் *

படிசேர்மகரக்குழைகளும் பவளவாயும்நால்தோளும் *

துடிசேரிடையுமமைந்தது ஓர்தூநீர்முகில்போல் தோன்றாயே.

3610 தூநீர்முகில்போல்தோன்றும் நின்சுடர்கொள்வடிவும் கனிவாயும் *

தேநீர்க்கமலக்கண்களும் வந்தென்சிந்தைநிறைந்தவா! *

மாநீர்வெள்ளிமலைதன்மேல் வண்கார்நீலமுகில்போல *

தூநீர்க்கடலுள்துயில்வானே! எந்தாய்! சொல்ல மாட்டேனே.

3611 சொல்லமாட்டேனடியேன் உன்துளங்குசோதித்திருப்பாதம் *

எல்லையில்சீரிளஞாயிறு இரண்டுபோலென்னுள்ளவா *

அல்லலென்னுமிருள்சேர்தற்கு உபாயமென்னே? * ஆழிசூழ்

மல்லல்ஞாலமுழுதுண்ட மாநீர்க்கொண்டல் வண்ணனே!

3612 கொண்டல்வண்ணா! குடக்கூத்தா! வினையேன்கண்ணா! கண்ணா! * என்

அண்டவாணா! என்றென்னைஆளக்கூப்பிட்டழைத்தக்கால் *

விண்டன்மேல்தான்மண்மேல்தான் விரிநீர்க்கடல்தான் மற்றுத்தான் *

தொண்டனேனுன்கழல்காணஒருநாள்வந்துதோன்றாயே.

3613 வந்துதோன்றாயன்றேல் உன்வையம்தாயமலரடிக்கீழ் *

முந்திவந்துயான்நிற்ப முகப்பேகூவிப்பணிகொள்ளாய் *

செந்தண்கமலக்கண்கைகால் சிவந்தவாயோர்கருஞாயிறு *

அந்தமில்லாக்கதிர்பரப்பி அலர்ந்ததொக்குமம்மானே!

3614 ஒக்குமம்மானுருவமென்று உள்ளம்குழைந்துநாணாளும் *

தொக்கமேகப் பல்குழாங்கள் காணுந்தோறும்தொலைவன் நான் *

தக்கஐவர்தமக்காய்அன்று ஈரைம்பதின்மர்தாள் சாய *

புக்கநல்தேர்த்தனிப்பாகா! வாராய்இதுவோ பொருத்தமே?

3615 இதுவோ பொருத்தம்? மின்னாழிப்படையாய்! ஏறுமிருஞ்சிசிறைப்புள்

அதுவே * கொடியாவுயர்த்தானே! என்றென்றேங்கி யழுதக்கால் *

எதுவேயாகக்கருதுங்கொல்? இம்மாஞாலம்பொறை தீர்ப்பான் *

மதுவார்சோலை உத்தரமதுரைப்பிறந்தமாயனே.

3616 பிறந்தமாயா! பாரதம்பொருதமாயா! * நீ இன்னே

சிறந்தகால்தீநீர்வான் மண்பிறவுமாயபெருமானே! *

கறந்தபாலுள்நெய்யேபோல் இவற்றுளெங்கும்கண்டுகொள் *

இறந்துநின்றபெருமாயா! உன்னையெங்கேகாண்கேனே?

3617 எங்கேகாண்கேன்? ஈன்துழாயம்மான்தன்னை

யானென்றென்று *

அங்கேதாழ்ந்தசொற்களால்

அந்தண்குருகூர்ச்சடகோபன் *

செங்கேழ்சொன்னவாயிரத்துள்

இவையும்பத்தும் வல்லார்கள் *

இங்கேகாணஇப்பிறப்பே

மகிழ்வர்எல்லியும்காலையே. (2)