3024 முந்நீர்ஞாலம்படைத்த எம்முகில்வண்ணனே! *

அந்நாள்நீதந்த ஆக்கையின்வழியுழல்வேன் *

வெந்நாள்நோய்வீய வினைகளைவேரறப்பாய்ந்து *

எந்நாள்யானுன்னை இனிவந்துகூடுவனே? (2)

3025 வன்மாவையமளந்த எம்வாமனா! * நின்

பன்மாமாயப் பல்பிறவியில்படிகின்றயான் *

தொன்மாவல்வினைத் தொடர்களை முதலரிந்து *

நின்மாதாள்சேர்ந்து நிற்பது எஞ்ஞான்றுகொலோ?

3026 கொல்லாமாக்கோல் கொலைசெய்து, பாரதப்போர் *

எல்லாச்சேனையும் இருநிலத்தவித்தவெந்தாய்! *

பொல்லாவாக்கையின் புணர்வினையறுக்கலறா *

சொல்லாய்யானுன்னைச் சார்வதோர்சூழ்ச்சியே.

3027 சூழ்ச்சிஞானச் சுடரொளியாகி * என்றும்

ஏழ்ச்சிக்கேடின்றி எங்கணும்நிறைந்தவெந்தாய்! *

தாழ்ச்சிமற்றெங்கும்தவிர்ந்து நின்தாளிணக்கீழ்

வாழ்ச்சி * யான்சேரும்வகை அருளாய்வந்தே.

3028 வந்தாய்போலேவந்தும் என்மனத்தினைநீ *

சிந்தாமற்செய்யாய் இதுவேஇதுவாகில் *

கொந்தார்க்காயாவின் கொழுமலர்த்திருநிறத்த

எந்தாய் * யான்உன்னை எங்குவந்தணுகிற்பனே?

3029 கிற்பன்கில்லேனென்றிலன் முனநாளால் *

அற்பசாரங்களவை சுவைத்தகன்றொழிந்தேன் *

பற்பல்லாயிரம் உயிர்செய்தபரமா! * நின்

நற்பொற்சோதித்தாள் நணுகுவதெஞ்ஞான்றே?

3030 எஞ்ஞான்றுநாமிருந்திருந்து இரங்கிநெஞ்சே! *

மெய்ஞ்ஞானமின்றி வினையியல்பிறப்பழுந்தி *

எஞ்ஞான்றுமெங்கும் ஒழிவறநிறைந்துநின்ற *

மெய்ஞ்ஞானச்சோதிக் கண்ணனைமேவுதுமே?

3031 மேவுதுன்பவினைகளை விடுத்துமிலேன் *

ஓவுதலின்றி உன்கழல்வணங்கிற்றிலேன் *

பாவுதொல்சீர்க்கண்ணா! என்பரஞ்சுடரே! *

கூவுகின்றேன்காண்பான் எங்கெய்தக்கூவுவனே?

3032 கூவிக்கூவிக் கொடுவினைத்தூற்றுள்நின்று *

பாவியேன்பலகாலம் வழிதிகைத்தலமர்கின்றேன் *

மேவியன்றாநிரைகாத்தவன் உலகமெல்லாம்

தாவியவம்மானை * எங்கினித்தலைப்பெய்வனே?

3033 தலைப்பெய்காலம் நமன்தமர்பாசம்விட்டால் *

அலைப்பூணுண்ணும் அவ்வல்லலெல்லாமகல *

கலைப்பல்ஞானத்து என்கண்ணனைக்கண்டுகொண்டு *

நிலைப்பெற்றென்னெஞ்சம்பெற்றது நீடுயிரே.

3034 உயிர்களெல்லாவுலகமுமுடையவனை *

குயில்கொள்சோலைத் தென்குருகூர்ச்சடகோபன் *

செயிரில்சொல்லிசைமாலை ஆயிரத்துள்இப்பத்தும் *

உயிரின்மேலாக்கை ஊனிடையொழிவிக்குமே. (2)