2879 இவையுமவையுமுவையும் இவருமவருமுவரும் *

எவையும்யவரும்தன்னுள்ளே ஆகியுமாக்கியும்காக்கும் *

அவையுள்தனிமுதலெம்மான் கண்ணபிரானென்னமுதம் *

சுவையன்திருவின்மணாளன் என்னுடைச்சூழலுளானே. (2)

2880 சூழல்பலபலவல்லான் தொல்லையங்காலத்துலகை *

கேழலொன்றாகியிடந்த கேசவனென்னுடையம்மான் *

வேழமருப்பையொசித்தான் விண்ணவர்க்கெண்ண லரியான் *

ஆழநெடுங்கடல்சேர்ந்தான் அவனென்னருகலிலானே.

2881 அருகலிலாயபெருஞ்சீர் அமரர்களாதிமுதல்வன் *

கருகியநீலநன்மேனிவண்ணன் செந்தாமரைக்கண்ணன் *

பொருசிறைப்புள்ளுவந்தேறும் பூமகளார்தனிக்கேள்வன் *

ஒருகதியின்சுவைதந்திட்டு ஒழிவிலனென்னோடுடனே.

2882 உடனமர்க்காதல்மகளிர் திருமகள்மண்மகளாயர்

மடமகள் * என்றிவர்மூவராளும் உலகமும்மூன்றே *

உடனவையொக்கவிழுங்கி ஆலிலைச்சேர்ந்தவனெம்மான் *

கடல்மலிமாயப்பெருமான் கண்ணன்என்ஒக்கலையானே.

2883 ஒக்கலைவைத்துமுலைப்பாலுண்ணென்று தந்திடவாங்கி *

செக்கஞ்செகஅன்று அவள்பால்உயிர்செகவுண்ட பெருமான் *

நக்கபிரானோடு அயனுமிந்திரனும்முதலாக *

ஒக்கவும்தோற்றியவீசன் மாயனென்னெஞ்சினுளானே.

2884 மாயனென்னெஞ்சினுள்ளான் மற்றும்யவர்க்கும்அதுவே *

காயமும்சீவனும்தானே காலுமெரியுமவனே *

சேயனணியன்யவர்க்கும் சிந்தைக்கும்கோசரமல்லன் *

தூயன்துயக்கன்மயக்கன் என்னுடைத்தோளிணையானே.

2885 தோளிணைமேலும்நன்மார்பின்மேலும் சுடர்முடிமேலும் *

தாளிணைமேலும்புனைந்த தண்ணந்துழாயுடையம்மான் *

கேளிணையொன்றுமிலாதான் கிளரும்சுடரொளிமூர்த்தி *

நாளணைந்தொன்றுமகலான் என்னுடைநாவினுளானே.

2886 நாவினுள்நின்றுமலரும் ஞானக்கலைகளுக்கெல்லாம் *

ஆவியுமாக்கையும்தானே அழிப்போடளிப்பவன்தானே *

பூவியல்நால்தடந்தோளன் பொருபடையாழிசங்கேந்தும் *

காவிநன்மேனிக்கமலக்கண்ணன் என்கண்ணினுளானே.

2887 கமலக்கண்ணனென்கண்ணினுள்ளான் காண்பனவன் கண்களாலே *

அமலங்களாகவிழிக்கும் ஐம்புலனும்அவன்மூர்த்தி *

கமலத்தயன்நம்பிதன்னைக் கண்ணுதலானொடும்தோற்றி *

அமலத்தெய்வத்தோடுலகமாக்கி என்நெற்றியுளானே.

2888 நெற்றியுள்நின்றென்னையாளும் நிரைமலர்ப்பாதங்கள்சூடி *

கற்றைத்துழாய்முடிக்கோலக் கண்ணபிரானைத் தொழுவார் *

ஒற்றைப்பிறையணிந்தானும் நான்முகனுமிந்திரனும் *

மற்றையமரருமெல்லாம்வந்து எனதுச்சியுளானே.

2889 உச்சியுள்ளேநிற்கும்தேவதேவற்குக் கண்ணபிராற்கு *

இச்சையுள்செல்லவுணர்த்தி வண்குருகூர்ச்சடகோபன் *

இச்சொன்னவாயிரத்துள் இவையுமோர்பத்து எம்பிராற்கு *

நிச்சலும்விண்ணப்பம்செய்ய நீள்கழல்சென்னி பொருமே. (2)