2824 அஞ்சிறையமடநாராய்! அளியத்தாய் * நீயும்நின்

அஞ்சிறையசேவலுமாய் ஆவா! என்றெனக்கருளி *

வெஞ்சிறைப்புள்ளுயர்த்தார்க்கு என்விடுதூதாய்ச் சென்றக்கால் *

வன்சிறையிலவன்வைக்கில் வைப்புண்டாலென் செய்யுமோ? (2)

2825 என்செய்யதாமரைக்கண் பெருமானார்க்கென்தூதாய் *

என்செய்யும்? உரைத்தக்கால் இனக்குயில்காள்! நீரலிரே? *

முன்செய்தமுழுவினையால் திருவடிக்கீழ்க்குற்றேவல் *

முன்செய்யமுயலாதேன் அகல்வதுவோ? விதியினமே.

2826 விதியினால்பெடைமணக்கும் மென்னடையஅன்னங்காள்! *

மதியினால்குறள்மாணாய் உலகிரந்தகள்வற்கு *

மதியிலேன்வல்வினையே மாளாதோ? என்று * ஒருத்தி

மதியெல்லாமுள்கலங்கி மயங்குமாலென்னீரே.

2827 என்நீர்மைகண்டிரங்கி இதுதகாதென்னாத *

என்நீலமுகில்வண்ணற்கு என்சொல்லியான் சொல்லுகேனோ? *

நன்னீர்மையினியவர்கண் தங்காதென்றொருவாய்ச்சொல் *

நன்னீலமகன்றில்காள்! நல்குதிரோ? நல்கீரோ?

2828 நல்கித்தான்காத்தளிக்கும் பொழிலேழும்வினையேற்கே *

நல்கத்தானாகாதோ? நாரணனைக்கண்டக்கால் *

மல்குநீர்ப்புனற்படப்பை இரைதேர்வண்சிறுகுருகே *

மல்குநீர்க்கண்ணேற்கு ஓர்வாசகங்கொண்டருளாயே.

2829 அருளாதநீரருளி அவராவிதுவராமுன் *

அருளாழிப்புட்கடவீர் அவர்வீதியொருநாளென்று *

அருளாழியம்மானைக் கண்டக்காலிதுசொல்லி

யருள் * ஆழிவரிவண்டே! யாமும்என்பிழைத்தோமே?

2830 என்பிழைகோப்பதுபோலப் பனிவாடை யீர்கின்ற *

என்பிழையேநினைந்தருளி அருளாததிருமாலார்க்கு *

என்பிழைத்தாள்திருவடியின்தகவினுக்கு என்றொருவாய்ச்சொல் *

என்பிழைக்குமிளங்கிளியே! யான்வளர்த்தநீயலையே?

2831 நீயலையே? சிறுபூவாய்! நெடுமாலார்க்கென்தூதாய் *

நோயெனதுநுவலென்னநுவலாதேயிருந்தொழிந்தாய் *

சாயலொடுமணிமாமை தளர்ந்தேன்நான் * இனிஉனது

வாயலகிலின்னடிசில் வைப்பாரைநாடாயே.

2832 நாடாதமலர்நாடி நாள்தோறும்நாரணன்தன் *

வாடாதமலரடிக்கீழ் வைக்கவேவகுக்கின்று *

வீடாடிவீற்றிருத்தல் வினையற்றதென்செய்வதோ? *

ஊடாடுபனிவாடாய்! உரைத்தீராயெனதுடலே.

2833 உடலாழிப்பிறப்புவீடு உயிர்முதலாமுற்றுமாய் *

கடலாழிநீர்தோற்றி அதனுள்ளேகண்வளரும் *

அடலாழியம்மானைக் கண்டக்காலிதுசொல்லி *

விடல் ஆழிமடநெஞ்சே! வினையோமொன்றாமளவே.

2834 அளவியன்றவேழுலகத்தவர் பெருமான்கண்ணனை *

வளவயல்சூழ் வண்குருகூர்ச் சடகோபன்வாய்ந்துரைத்த *

அளவியன்றவந்தாதி ஆயிரத்துள்இப்பத்தின் *

வளவுரையால்பெறலாகும் வானோங்குபெருவளமே. (2)