3387 துவளில்மாமணிமாடமோங்கு

தொலைவில்லிமங்கலம்தொழு

மிவளை * நீரினியன்னைமீர்

உமக்காசையில்லைவிடுமினோ *

தவளவொண்சங்குசக்கரமென்றும்

தாமரைத்தடங்கணென்றும் *

குவளையொண்மலர்க்கண்கள்நீர்மல்க

நின்றுநின்றுகுமுறுமே. (2)

3388 குமுறுமோசைவிழவொலித்

தொலைவில்லிமங்கலம்கொண்டுபுக்கு *

அமுதமென்மொழியாளை

நீருமக்குஆசையின்றியகற்றினீர் *

திமிர்கொண்டாலொத்துநிற்கும் மற்றிவள்

தேவதேவபிரானென்றே *

நிமியும்வாயொடுகண்கள்நீர்மல்க

நெக்கொசிந்துகரையுமே.

3389 கரைகொள்பைம்பொழில்தண்பணைத் தொலை

வில்லிமங்கலம்கொண்டுபுக்கு *

உரைகொளின்மொழியாளை

நீருமக்காசை யின்றியகற்றினீர் *

திரைகொள்பௌவத்துச்சேர்ந்ததும்

திசைஞாலம்தாவியளந்ததும் *

நிரைகள்மேய்த்ததுமேபிதற்றி

நெடுங்கண்நீர்மல்கநிற்குமே.

3390 நிற்கும்நான்மறைவாணர்வாழ்

தொலைவில்லிமங்கலங்கண்டபின் *

அற்கமொன்றுமறவுறாள்

மலிந்தாள்கண்டீரிவளன்னைமீர் *

கற்குங்கல்வியெல்லாம் கருங்கடல்

வண்ணன்கண்ணபிரானென்றே *

ஒற்கமொன்றுமிலள் உகந்துகந்து

உள்மகிழ்ந்துகுழையுமே.

3391 குழையும்வாள்முகத்தேழையைத்

தொலைவில்லிமங்கலம் கொண்டுபுக்கு *

இழைகொள்சோதிச்செந்தாமரைக்கண்ணபிரான்

இருந்தமைகாட்டினீர் *

மழைபெய்தாலொக்குங்கண்ணநீரினொடு

அன்றுதொட்டும்மையாந்து * இவள்

நுழையுஞ்சிந்தையளன்னைமீர்! தொழும்

அத்திசையுற்றுநோக்கியே.

3392 நோக்கும்பக்கமெல்லாம் கரும்பொடு

செந்நெலோங்கு செந்தாமரை *

வாய்க்கும்தண்பொருநல் வடகரை

வண்தொலைவில்லிமங்கலம் *

நோக்குமேல்அத்திசையல்லால்

மறுநோக்கிலள்வைகல்நாடொறும் *

வாய்க்கொள்வாசகமும் மணிவண்ணன்

நாமமேயிவளன்னைமீர்.

3393 அன்னைமீர்! அணிமாமயில் சிறுமானிவள்

நம்மைக்கைவலிந்து *

என்னவார்த்தையுங்கேட்குறாள்

தொலைவில்லிமங்கலமென்றல்லால் *

முன்னம்நோற்றவிதிகொலோ? முகில்

வண்ணன்மாயங்கொலோ? * அவன்

சின்னமும்திருநாமமும் இவள்

வாயனகள்திருந்தவே.

3394 திருந்துவேதமும்வேள்வியும்

திருமாமகளிரும்தாம் * மலிந்

திருந்துவாழ்பொருநல்

வடகரைவண்தொலைவில்லிமங்கலம் *

கருந்தடங்கண்ணிகைதொழுத

அந்நாள்தொடங்கிஇந்நாள்தொறும் *

இருந்திருந்துதரவிந்தலோசன!

என்றேன்றே நைந்திரங்குமே. (2)

3395 இரங்கிநாள்தொறும்வாய்வெரீஇ

இவள்கண்ணநீர்களலமர *

மரங்களுமிரங்குவகை

மணிவண்ணவோ! என்று கூவுமால் *

துரங்கம்வாய்பிளந்தானுறை

தொலைவில்லிமங்கலமென்று * தன்

கரங்கள் கூப்பித்தொழும் அவ்வூர்த்

திருநாமங்கற்றதற்பின்னையே.

3396 பின்னைகொல்? நிலமாமகள்கொல்?

திருமகள்கொல்? பிறந்திட்டாள் *

என்னமாயங்கொலோ? இவள்நெடுமா

லென்றேநின்றுகூவுமால் *

முன்னிவந்தவன் நின்றிருந்துறையும்

தொலைவில்லிமங்கலம்

சென்னியால்வணங்கும் * அவ்வூர்த்திருநாமம்

கேட்பதுசிந்தையே.

3397 சிந்தையாலும்சொல்லாலும்

செய்கையினாலும் தேவபிரானையே *

தந்தைதாயென்றடைந்த

வண்குருகூரவர்சடகோபன் *

முந்தையாயிரத்துள்இவை

தொலைவில்லிமங்கலத்தைச்சொன்ன *

செந்தமிழ்பத்தும்வல்லார்

அடிமைசெய்வார்திருமாலுக்கே. (2)