1520 தூவாயபுள்ளூர்ந்துவந்து துறைவேழம் *

மூவாமைநல்கி முதலைதுணித்தானை *

தேவாதிதேவனைச் செங்கமலக்கண்ணானை *

நாவாயுளானை நறையூரில்கண்டேனே.

1856 கம்பமாகளிறு அஞ்சிக்கலங்க * ஓர்

கொம்புகொண்ட குரைகழல்கூத்தனை *

கொம்புலாம்பொழில் கோட்டியூர்க்கண்டுபோய் *

நம்பனைச்சென்றுகாண்டும் நாவாயுளே.

3750 அறுக்கும்வினையாயின ஆகத்தவனை *

நிறுத்தும்மனத்துஒன்றிய சிந்தையினார்க்கு *

வெறித்தண்மலர்ச்சோலைகள்சூழ் திருநாவாய் *

குறுக்கும்வகையுண்டுகொலோ? கொடியேற்கே. (2)

3751 கொடியேரிடைக் கோகனகத்தவள்கேள்வன் *

வடிவேல்தடங்கண் மடப்பின்னைமணாளன் *

நெடியானுறைசோலைகள்சூழ் திருநாவாய் *

அடியேனணுகப்பெறுநாள் எவைகொலொ?

3752 எவைகொல்அணுகப்பெறுநாள்? என்றுஎப்போதும் *

கவையில்மனமின்றிக் கண்ணீர்கள்கலுழ்வன் *

நவையில்திருநாரணன்சேர் திருநாவாய் *

அவையுள்புகலாவது ஓர்நாளறியேனே.

3753 நாளேலறியேன் எனக்குள்ளன * நானும்

மீளாவடிமைப்பணி செய்யப்புகுந்தேன் *

நீளார்மலர்ச்சோலைகள்சூழ் திருநாவாய் *

வாளேய்தடங்கண் மடப்பின்னைமணாளா!

3754 மணாளன்மலர்மங்கைக்கும் மண்மடந்தைக்கும் *

கண்ணாளன் உலகத்துயிர்தேவர்கட்கெல்லாம் *

விண்ணாளன்விரும்பியுறையும் திருநாவாய் *

கண்ணாரக்களிக்கின்றது இங்கென்றுகொல்கண்டே?

3755 கண்டேகளிக்கின்றது இங்குஎன்றுகொல்? கண்கள் *

தொண்டேயுனக்காய்ஒழிந்தேன் துரிசின்றி *

வண்டார்மலர்ச்சோலைகள்சூழ் திருநாவாய் *

கொண்டேயுறைகின்ற எங்கோவலர்கோவே!

3756 கோவாகியமாவலியை நிலங்கொண்டாய்! *

தேவாசுரம்செற்றவனே! திருமாலே! *

நாவாயுறைகின்ற என்நாரண நம்பீ! *

ஆவா! அடியான் இவனென்று அருளாயே.

3757 அருளாதொழிவாய் அருள்செய்து * அடியேனைப்

பொருளாக்கி உன்பொன்னடிக்கீழ்ப்புகவைப்பாய் *

மருளேயின்றி உன்னைஎன்னெஞ்சத்திருத்தும் *

தெருளேதரு தென்திருநாவாயென்தேவே!

3758 தேவர்முனிவர்க்குஎன்றும்காண்டற்கரியன் *

மூவர்முதல்வன் ஒருமூவுலகாளி *

தேவன்விரும்பியுறையும் திருநாவாய் *

யாவரணுகப்பெறுவார்? இனியந்தோ!

3759 அந்தோ! அணுகப்பெறுநாள்என்று எப்போதும் *

சிந்தைகலங்கித் திருமாலென்றழைப்பன் *

கொந்தார்மலர்ச்சோலைகள்சுழ் திருநாவாய் *

வந்தேயுறைகின்ற எம்மாமணிவண்ணா!

3760 வண்ணம்மணிமாட நல்நாவாயுள்ளானை *

திண்ணம்மதிள் தென்குருகூர்ச்சடகோபன் *

பண்ணர்தமிழ் ஆயிரத்துஇப்பத்தும்வல்லார் *

மண்ணாண்டு மணங்கமழ்வர் மல்லிகையே. (2)