3497 கற்பார்இராமபிரானையல்லால் மற்றும்கற்பரோ? *

புற்பாமுதலாப் புல்லெறும்பாதியொன்றின்றியே *

நற்பாலயோத்தியில் வாழும் சராசரம்முற்றவும் *

நற்பாலுக்குய்த்தனன் நான்முகனார்பெற்றநாட்டுளே. (2)

3498 நாட்டிற்பிறந்தவர் நாரணற்காளன்றியாவரோ *

நாட்டிற்பிறந்து படாதனபட்டுமனிசர்க்கா *

நாட்டைநலியுமரக்கரை நாடித்தடிந்திட்டு *

நாட்டையளித்துய்யச்செய்து நடந்தமைகேட்டுமே.

3499 கேட்பார்கள்கேசவன்கீர்த்தியல்லால் மற்றும்கேட்பரோ? *

கேட்பார்செவிசுடு கீழ்மைவசவுகளேவையும் *

சேட்பாற்பழம்பகைவன் சிசுபாலன் * திருவடி

தாட்பாலடைந்த தன்மையறிவாரையறிந்துமே.

3500 தன்மையறிபவர்தாம் அவற்காளன்றியாவரோ? *

பன்மைப்படர்பொருள் ஆதுமில்பாழ்நெடுங்காலத்து *

நன்மைப்புனல்பண்ணி நான்முகனைப்பண்ணி * தன்னுள்ளே

தொன்மைமயக்கிய தோற்றிய சூழல்கள் சிந்தித்தே.

3501 சூழல்கள் சிந்திக்கில் மாயன்கழலன்றிச்சூழ்வரோ? *

ஆழப்பெரும்புனல்தன்னுள் அழுந்தியஞாலத்தை *

தாழப்படாமல் தன்பாலொருகோட்டிடைத்தான் கொண்ட *

கேழல்திருவுருவாயிற்றுக் கேட்டுமுணர்ந்துமே.

3502 கேட்டுமுணர்ந்தவர் கேசவற்காளன்றியாவரோ? *

வாட்டமிலாவண்கை மாவலிவாதிக்கவாதிப்புண்டு *

ஈட்டங்கொள்தேவர்கள் சென்றிரந்தார்க்கிடர்நீக்கிய *

கோட்டங்கைவாமனனாய்ச் செய்தகூத்துகள்கண்டுமே.

3503 கண்டும்தெளிந்தும்கற்றார் கண்ணற்காளன்றியாவரோ? *

வண்டுண்மலர்த்தொங்கல் மார்க்கண்டேயனுக்கு வாழுநாள் *

இண்டைச்சடைமுடி ஈசனுடன்கொண்டுஉசாச்சொல்ல *

கொண்டங்குத்தன்னொடும்கொண்டு உடன்சென்ற துணர்ந்துமே.

3504 செல்லவுணர்ந்தவர் செல்வன்தன்சீரன்றிக்கற்பரோ? *

எல்லையிலாதபெருந்தவத்தால் பலசெய்மிறை *

அல்லலமரரைச்செய்யும் இரணியனாகத்தை *

மல்லலரியுருவாய்ச் செய்தமாயமறிந்துமே.

3505 மாயமறிபவர் மாயவற்காளன்றியாவரோ? *

தாயஞ்செறுமொருநூற்றுவர்மங்க ஓரைவர்க்காய் *

தேசமறியவோர்சாரதியாய்ச்சென்று சேனையை

நாசஞ்செய்திட்டு * நடந்தநல்வார்த்தையறிந்துமே.

3506 வார்த்தையறிபவர் மாயவற்காளன்றியாவரோ? *

போர்த்தபிறப்பொடுநோயோடுமூப்பொடு இறப்பிவை

பேர்த்து * பெருந்துன்பம்வேரறநீக்கித் தன்தாளின்கீழ்ச்

சேர்த்து * அவன்செய்யும்சேமத்தையெண்ணித் தெளிவுற்றே. (2)

3507 தெளிவுற்றுவீவின்றிநின்றவர்க்கு இன்பக்கதிசெய்யும் *

தெளிவுற்றகண்ணனை தென்குருகூர்ச்சடகோபன்சொல் *

தெளிவுற்றவாயிரத்துள் இவைபத்தும்வல்லாரவர் *

தெளிவுற்றசிந்தையர் பாமருமூவுலகத்துள்ளே. (2)