3486 ஆழியெழச் சங்கும்வில்லுமெழ * திசை

வாழியெழத் தண்டும்வாளுமெழ * அண்டம்

மோழையெழ முடிபாதமெழ * அப்பன்

ஊழியெழ உலகங்கொண்டவாறே. (2)

3487 ஆறுமலைக்கு எதிர்ந்தோடுமொலி * அர

வூறுசுலாய் மலைதேய்க்குமொலி * கடல்

மாறுசுழன்று அழைக்கின்றவொலி * அப்பன்

சாறுபட அமுதங்கொண்டநான்றே.

3488 நான்றில ஏழ்மண்ணும்தானத்தவே * பின்னும்

நான்றில ஏழ்மலைதானத்தவே * பின்னும்

நான்றில ஏழ்கடல்தானத்தவே * அப்பன்

ஊன்றியிடந்து எயிற்றில்கொண்டநாளே.

3489 நாளுமெழ நிலநீருமெழ * விண்ணும்

கோளுமெழே எரிகாலுமெழ * மலை

தாளுமெழச் சுடர்தானுமெழ * அப்பன்

ஊளியெழ உலகமுண்டவூணே.

3490 ஊணுடைமல்லர் ததர்ந்தவொலி * மன்னர்

ஆணுடைச்சேனை நடுங்குமொலி * விண்ணுள்

ஏணுடைத்தேவர் வெளிப்பட்டவொலி * அப்பன்

காணுடைப்பாரதம் கையறைபோழ்தே.

3491 போழ்துமெலிந்த புன்செக்கரில் * வான்திசை

சூழுமெழுந்து உதிரப்புனலா * மலை

கீழ்துபிளந்த சிங்கமொத்ததால் * அப்பன்

ஆழ்துயர்செய்து அசுரரைக்கொல்லுமாறே.

3492 மாறுநிரைத்து இரைக்கும்சரங்கள் * இன

நூறுபிணம் மலைபோல்புரள * கடல்

ஆறுமடுத்து உதிரப்புனலா * அப்பன்

நீறுபட இலங்கைசெற்றநேரே.

3493 நேர்சரிந்தான் கொடிக்கோழிகொண்டான் * பின்னும்

நேர்சரிந்தான் எரியுமனலோன் * பின்னும்

நேர்சரிந்தான் முக்கண்மூர்த்திகண்டீர் * அப்பன்

நேர்சரிவாணன் திண்தோள்கொண்டவன்றே.

3494 அன்றுமண்நீரெரிகால் விண்மலைமுதல் *

அன்றுசுடர்இரண்டும்பிறவும் * பின்னும்

அன்றுமழையுயிர்தேவும்மற்றும் * அப்பன்

அன்றுமுதல் உலகம்செய்ததுமே.

3495 மேய்நிரைகீழ்புக மாபுரள * சுனை

வாய்நிறைநீர் பிளிறிச்சொரிய * இன

ஆநிரைபாடி அங்கேயொடுங்க * அப்பன்

தீமழைகாத்துக் குன்றமெடுத்தானே.

3496 குன்றமெடுத்தபிரான் அடியாரொடும் *

ஒன்றிநின்ற சடகோபனுரைசெயல் *

நன்றிபுனைந்த ஓராயிரத்துள்ளிவை *

வென்றிதரும்பத்தும் மேவிக்கற்பார்க்கே. (2)