3145 கோவைவாயாள்பொருட்டு ஏற்றினெருத்தமிறுத்தாய் * மதிளிலங்கைக்

கோவைவீயச்சிலைகுனித்தாய்! குலநல்யானைமருப்பொசித்தாய்! *

பூவைவீயாநீர்தூவிப் போதால்வணங்கேனேலும் * நின்

பூவைவீயாமேனிக்குப் பூசுஞ்சாந்து என்னெஞ்சமே. (2)

3146 பூசுஞ்சாந்துஎன்னெஞ்சமே புனையுங்கண்ணிஎனதுடைய *

வாசகம்செய்மாலையே வான்பட்டாடையும்அஃதே *

தேசமானவணிகலனும் என்கைகூப்புச்செய்கையே *

ஈசன்ஞாலமுண்டுமிழ்ந்த எந்தையேகமூர்த்திக்கே.

3147 ஏகமூர்த்தியிருமூர்த்தி மூன்றுமூர்த்திபலமூர்த்தி

யாகி * ஐந்துபூதமாய் இரண்டுசுடராயருவாகி *

நாகமேறிநடுக்கடலுள்துயின்ற நாராயணனே! * உன்

ஆகமுற்றுமகத்தடக்கி ஆவியல்லல்மாய்த்ததே.

3148 மாய்த்தலெண்ணிவாய்முலைதந்த மாயப்பேயுயிர்

மாய்த்த * ஆயமாயனே! வாமனனே மாதவா! *

பூத்தண்மாலைகொண்டுஉன்னைப் போதால் வணங்கேனேலும் * நின்

பூத்தண்மாலைநெடுமுடிக்குப் புனையுங்கண்ணிஎனதுயிரே.

3149 கண்ணிஎனதுயிர் காதல்கனகச்சோதிமுடிமுதலா *

எண்ணில்பல்கலன்களும் ஏலுமாடையும்அஃதே *

நண்ணிமூவுலகும் நவிற்றும்கீர்த்தியும்அஃதே *

கண்ணனெம்பிரானெம்மான் காலசக்கரத்தானுக்கே.

3150 காலசக்கரத்தொடு வெண்சங்கம்கையேந்தினாய்! *

ஞாலமுற்றுமுண்டுமிழ்ந்த நாராயணனே! என்றென்று *

ஓலமிட்டு நானழைத்தால் ஒன்றும்வாராயாகிலும் *

கோலமாமென்சென்னிக்கு உன்கமலமன்னகுரைகழலே.

3151 குரைகழல்கள்நீட்டி மண்கொண்டகோலவாமனா! *

குரைகழல்கைகூப்புவார்கள் கூடநின்றமாயனே! *

விரைகொள்பூவும்நீரும்கொண்டு ஏத்தமாட்டேனேலும் * உன்

உரைகொள்சோதித்திருவுருவம் என்னதாவிமேலதே.

3152 என்னதாவிமேலையாய் ஏர்கொளேழுலகமும் *

துன்னிமுற்றுமாகிநின்ற சோதிஞானமூர்த்தியாய் *

உன்னதென்னதாவியும் என்னதுன்னதாவியும் *

இன்னவண்ணமேநின்றாய் என்றுரைக்கவல்லேனே?

3153 உரைக்கவல்லேன்அல்லேன்உன்னுலப்பில்கீர்த்தி வெள்ளத்தின் *

கரைக்கணென்றுசெல்வன்நான்? காதல்மையலேறினேன் *

புரைப்பிலாதபரம்பரனே! பொய்யிலாதபரஞ்சுடரே! *

இரைத்துநல்லமேன்மக்களேத்த யானுமேத்தினேன்.

3154 யானுமேத்தி ஏழுலகும்முற்றுமேத்தி * பின்னையும்

தானுமேத்திலும் தன்னையேத்தவேத்தவெங்கெய்தும்? *

தேனும்பாலும்கன்னலும் அமுதுமாகித்தித்திப்ப *

யானுமெம்பிரானையேயேத்தினேன் யானுய்வானே.

3155 உய்வுபாயம்மற்றின்மைதேறிக் கண்ணனொண்கழல்கள் மேல் *

செய்யதாமரைப்பழனத் தென்னன்குருகூர்ச்சடகோபன் *

பொய்யில்பாடலாயிரத்துள் இவையும்பத்தும்வல்லார்கள் *

வையம்மன்னிவீற்றிருந்து விண்ணுமாள்வர் மண்ணூடே. (2)