2934 ஆடியாடி அகம்கரைந்து * இசை

பாடிப்பாடிக் கண்ணீர்மல்கி * எங்கும்

நாடிநாடி நரசிங்கா! என்று *

வாடிவாடும் இவ்வாணுதலே. (2)

2935 வாணுதல் இம்மடவரல் * உம்மைக்

காணுமாசையுள் நைகின்றாள் * விறல்

வாணன் ஆயிரந்தோள்துணித்தீர்! * உம்மைக்

காண நீரிரக்கமிலீரே.

2936 இரக்கமனத்தோடு எரியணை *

அரக்கும்மெழுகும் ஒக்குமிவள் *

இரக்கமெழீர் இதற்கென்செய்கேன்? *

அரக்கனிலங்கை செற்றீருக்கே.

2937 இலங்கைசெற்றவனே! என்னும் * பின்னும்

வலங்கொள் புள்ளுயர்த்தாய்! என்னும் * உள்ளம்

மலங்க வெவ்வுயிர்க்கும் * கண்ணீர்மிகக்

கலங்கிக் கைதொழும்நின்றிவளே.

2938 இவளிராப்பகல் வாய்வெரீஇ * தன

குவளையொண் கண்ணநீர்கொண்டாள் * வண்டு

திவளும் தண்ணந்துழாய்கொடீர் * என

தவளவண்ணர் தகவுகளே.

2939 தகவுடையவனே! என்னும் * பின்னும்

மிகவிரும்பும் பிரான்என்னும் * எனது

அகவுயிர்க்கு அமுதே! என்னும் * உள்ளம்

உகவுருகி நின்றுள்ளுளே.

2940 உள்ளுளாவி உலர்ந்துலர்ந்து * என

வள்ளலே! கண்ணனே! என்னும் * பின்னும்

வெள்ளநீர்க் கிடந்தாய்! என்னும் * என

கள்விதான்பட்ட வஞ்சனையே!

2941 வஞ்சனே! என்னும் கைதொழும் * தன

நெஞ்சம்வேவ நெடிதுயிர்க்கும் * விறற்

கஞ்சனை வஞ்சனைசெய்தீர்! * உம்மைத்

தஞ்சமென்று இவள்பட்டனவே!

2942 பட்டபோது எழுபோதறியாள் * விரை

மட்டலர் தண்துழாயென்னும் * சுடர்

வட்டவாய் நுதிநேமியீர் * நுமது

இட்டமென்கொல்? இவ்வேழைக்கே.

2943 ஏழைபேதை இராப்பகல் * தன

கேழி லொண்கண்ணநீர்கொண்டாள் * கிளர்

வாழ்வைவேவ இலங்கைசெற்றீர்? * இவள்

மாழைநோக்கொன்றும் வாட்டேன்மினே.

2944 வாட்டமில்புகழ் வாமனனை * இசை

கூட்டி வண்சடகோபன்சொல் * அமை

பாட்டு ஓராயிரத்திப்பத்தால் * அடி

சூட்டலாகும் அந்தாமமே. (2)