2923 ஊனில்வாழுயிரே! நல்லைபோஉன்னைப்பெற்று *

வானுளார்பெருமான் மதுசூதனென்னம்மான் *

தானும்யானுமெல்லாம் தன்னுள்ளேகலந்தொழிந்தோம் *

தேனும்பாலும்நெய்யும் கன்னலும்அமுதுமொத்தே. (2)

2924 ஒத்தார்மிக்காரை இலையாயமாமாய! *

ஒத்தாயெப்பொருட்கும் உயிராய் * என்னைப்பெற்ற

அத்தாயாய்த்தந்தையாய் அறியாதன வறிவித்த *

அத்தா! நீசெய்தன அடியேனறியேனே.

2925 அறியாக்காலத்துள்ளே அடிமைக்கணன்புசெய்வித்து *

அறியாமாமாயத்து அடியேனைவைத்தாயால் *

அறியாமைக்குறளாய் நிலம்மாவலி! மூவடியென்று *

அறியாமைவஞ்சித்தாய் எனதாவியுள்கலந்தே.

2926 எனதாவியுள்கலந்த பெருநல்லுதவிக்கைம்மாறு *

எனதாவிதந்தொழிந்தேன் இனிமீள்வதென்பதுண்டே? *

எனதாவியாவியும்நீ பொழிலேழுமுண்டவெந்தாய்! *

எனதாவியார்? யான்ஆர்? தந்தநீகொண்டாக்கினையே.

2927 இனியார்ஞானங்களால் எடுக்கலெழாதவெந்தாய்! *

கனிவார்வீட்டின்பமே! என்கடல்படாவமுதே! *

தனியேன்வாழ்முதலே! பொழிலேழுமேனமொன்றாய் *

நுனியார் கோட்டில்வைத்தாய்! உனபாதம் சேர்ந்தேனே.

2928 சேர்ந்தார்தீவினைகட்கு அருநஞ்சைத் திண்மதியை *

தீர்ந்தார்தம்மனத்துப் பிரியாதவருயிரை *

சோர்ந்தேபோகல்கொடாச்சுடரை அரக்கியைமூக்கு

ஈர்ந்தாயை * அடியேனடைந்தேன் முதல்முன்னமே.

2929 முன்நல்யாழ்பயில்நூல் நரம்பின்முதிர்சுவையே! *

பன்னலார்பயிலும் பரனே!பவித்திரனே! *

கன்னலே! அமுதே! கார்முகிலே! என்கண்ணா! *

நின்னலாலிலேன்காண் என்னைநீகுறிக்கொள்ளே.

2930 குறிக்கொள்ஞானங்களால் எனையூழிசெய்தவமும் *

கிறிக்கொண்டிப்பிறப்பே சிலநாளிலெய்தினன்யான் *

உறிக்கொண்டவெண்ணெய்பால் ஒளித்துண்ணு மம்மான்பின் *

நெறிக்கொண்டநெஞ்சனாய்ப் பிறவித்துயர்கடிந்தே.

2931 கடிவார்தண்ணந்துழாய்க்கண்ணன் விண்ணவர் பெருமான் *

படிவானமிறந்த பரமன்பவித்திரன்சீர் *

செடியார்நோய்கள்கெடப் படிந்துகுடைந்தாடி *

அடியேன்வாய்மடுத்துப் பருகிக்களித்தேனே.

2932 களிப்பும்கவர்வுமற்றுப் பிறப்புப்பிணிமூப்பிறப்பற்று *

ஒளிக்கொண்டசோதியுமாய் உடன்கூடுவதென்று கொலோ? *

துளிக்கின்ற வானிந்நிலம் சுடராழிசங்கேந்தி *

அளிக்கின்றமாயப்பிரான் அடியார்கள்குழாங்களையே.

2933 குழாங்கொள்பேரரக்கன் குலம்வீயமுனிந்தவனை *

குழாங்கொள்தென்குருகூர்ச் சடகோபன்தெரிந்துரைத்த *

குழாங்கொளாயிரத்துள் இவைபத்தும்உடன்பாடி *

குழாங்களாய்அடியீருடன் கூடிநின்றாடுமினே. (2)