1808 தந்தைதாய்மக்களே சுற்றமென்றுற்றவர்பற்றிநின்ற *

பந்தமார்வாழ்க்கையை நொந்துநீபழியெனக்கருதினாயேல் *

அந்தமாய்ஆதியாய் ஆதிக்குமாதியாய்ஆயனாய *

மைந்தனார்வல்லவாழ் சொல்லுமாவல்லையாய்மருவுநெஞ்சே. (2)

1809 மின்னுமாவல்லியும்வஞ்சியும்வென்ற நுண்ணிடைநுடங்கும் *

அன்னமென்னடையினார்கலவியை அருவருத்தஞ்சினாயேல் *

துன்னுமாமணிமுடிப்பஞ்சவர்க்காகி முன்தூதுசென்ற *

மன்னனார்வல்லவாழ் சொல்லுமாவல்லையாய்மருவுநெஞ்சே!

1810 பூணுலாமென்முலைப்பாவைமார் பொய்யினைமெய்யிதென்று *

பேணுவார்பேசும்அப்பேச்சை நீபிழையெனக்கருதினாயேல் *

நீணிலாவெண்குடைவாணனார் வேள்வியில்மண்ணிரந்த *

மாணியார்வல்லவாழ் சொல்லுமாவல்லையாய்மருவுநெஞ்சே!

1811 பண்ணுலாம்மென்மொழிப்பாவைமார் பணைமுலையணைதும்நாமென்று *

எண்ணுவாரெண்ணமதொழித்து நீபிழைத்துயக்கருதினாயேல் *

விண்ணுளார்விண்ணின்மீதியன்றவேங்கடத்துளார்வளங்கொள்முந்நீர் *

வண்ணனார்வல்லவாழ் சொல்லுமாவல்லையாய்மருவுநெஞ்சே!

1812 மஞ்சுதோய்வெண்குடைமன்னராய் வாரணம்சூழ வாழ்ந்தார் *

துஞ்சினாரென்பதோர்சொல்லைநீ துயரெனக்கருதினாயேல் *

நஞ்சுதோய்கொங்கைமேல்அங்கைவாய்வைத்து அவள் நாளையுண்ட *

மைந்தனார்வல்லவாழ் சொல்லுமாவல்லையாய்மருவுநெஞ்சே!

1813 உருவினார்பிறவிசேர் ஊன்பொதிநரம்புதோற்குரம்பையுள்புக்கு *

அருவிநோய்செய்துநின்று ஐவர்தாம் வாழ்வதற்குஅஞ்சினாயேல் *

திருவினார்வேதநான்கு ஐந்துதீவேள்வியோடுஅங்கமாறும் *

மருவினார்வல்லவாழ் சொல்லுமாவல்லையாய்மருவுநெஞ்சே!

1814 நோயெலாம்பெய்ததோராக்கையை மெய்யெனக் கொண்டு * வாளா

பேயர்தாம்பேசும்அப்பேச்சை நீபிழையெனக்கருதினாயேல் *

தீயுலாவெங்கதிர்த்திங்களாய் மங்குல்வானாகிநின்ற *

மாயனார்வல்லவாழ் சொல்லுமாவல்லையாய்மருவுநெஞ்சே!

1815 மஞ்சுசேர்வானெரி நீர்நிலம்காலிவைமயங்கிநின்ற *

அஞ்சுசேராக்கையை அரணமன்றென்றுயக்கருதினாயேல் *

சந்துசேர்மென்முலைப் பொன்மலர்ப்பாவையும்தாமும் * நாளும்

வந்துசேர்வல்லவாழ் சொல்லுமாவல்லையாய்மருவுநெஞ்சே!

1816 வெள்ளியார்பிண்டியார் போதியாரென்றிவர்ஓதுகின்ற *

கள்ளநூல்தன்னையும் கருமமன்றென்றுயக்கருதினாயேல் *

தெள்ளியார்கைதொழும்தேவனார் மாமுநீர்அமுதுதந்த *

வள்ளலார்வல்லவாழ் சொல்லுமாவல்லையாய்மருவுநெஞ்சே!

1817 மறைவலார்குறைவிலாருறையுமூர் வல்லவாழடிகள்தம்மை *

சிறைகுலாவண்டறைசோலைசூழ் கோலநீளாலிநாடன் *

கறையுலாவேல்வல்ல கலியன்வாய்ஒலியிவைகற்றுவல்லார் *

இறைவராய்இருநிலம்காவல்பூண்டு இன்பம்நன்கெய்துவாரே. (2)