1778 காவார்மடல்பெண்ணை அன்றிலரிகுரலும் *

ஏவாயினூடியங்கும் எஃகில்கொடிதாலோ! *

பூவார்மணம்கமழும் புல்லாணிகைதொழுதேன் *

பாவாய்! இதுநமக்கு ஓர்பான்மையேயாகாதே. (2)

1779 முன்னம்குறளுருவாய் மூவடிமண்கொண்டளந்த *

மன்னன்சரிதைக்கே மாலாகிப்பொன்பயந்தேன் *

பொன்னங்கழிக்கானல் புள்ளினங்காள் புல்லாணி *

அன்னமாய்நூல்பயந்தாற்கு ஆங்கிதனைச் செப்புமினே.

1780 வவ்வித்துழாயதன்மேல் சென்றதனிநெஞ்சம் *

செவ்வியறியாது நிற்குங்கொல்? நித்திலங்கள் *

பவ்வத்திரையுலவு புல்லாணிகைதொழுதேன் *

தெய்வச்சிலையாற்கு என்சிந்தைநோய்செப்புமினே.

1781 பரியஇரணியனதுஆகம் அணியுகிரால் *

அரியுருவாய்க்கீண்டான் அருள்தந்தவா! நமக்கு *

பொருதிரைகள்போந்துலவு புல்லாணிகைதொழுதேன் *

அரிமலர்க்கண்ணீர்ததும்ப அந்துகிலும்நில்லாவே.

1782 வில்லால்இலங்கைமலங்கச் சரம்துரந்த *

வல்லாளன்பின்போன நெஞ்சம்வருமளவும் *

எல்லாரும்என்தன்னை ஏசிலும்பேசிடினும் *

புல்லாணியெம்பெருமான் பொய்கேட்டிருந்தேனே.

1783 சுழன்றிலங்கு வெங்கதிரோன் தேரோடும் போய்மறைந்தான் *

அழன்றுகொடிதாகி அஞ்சுடரில் தானடுமால் *

செழுந்தடம் பூஞ்சோலைசூழ் புல்லாணிகைதொழுதேன் *

இழந்திருந்தேன் என்தன் எழில்நிறமும் சங்குமே.

1784 கனையாரிடிகுரலின் கார்மணியின்நாவாடல் *

தினையேனும்நில்லாது தீயிற்கொடிதாலோ *

புனையார்மணிமாடப் புல்லாணிகைதொழுதேன் *

வினையேன்மேல்வேலையும் வெந்தழலேவீசுமே.

1785 தூம்புடைக்கைவேழம் வெருவமருப்பொசித்த *

பாம்பினணையான் அருள்தந்தவா! நமக்கு *

பூஞ்செருந்திபொன்சொரியும் புல்லாணிகைதொழுதேன் *

தேம்பலிளம்பிறையும் என்தனக்குஓர்வெந்தழலே.

1786 வேதமும்வேள்வியும் விண்ணும் இருசுடரும் *

ஆதியுமானான் அருள்தந்தவா! நமக்கு *

போதலரும்புன்னைசூழ் புல்லாணிகைதொழுதேன் *

ஓதமும்நானும் உறங்காதிருந்தேனே.

1787 பொன்னலரும்புன்னைசூழ் புல்லாணியம்மானை *

மின்னிடையார்வேட்கைநோய்கூர இருந்ததனை *

கன்னவிலும்திண்தோள் கலியனொலிவல்லார் *

மன்னவராய்மண்ணாண்டு வானாடுமுன்னுவரே. (2)