2012 நீள்நாகம்சுற்றி நெடுவரைநட்டு * ஆழ்கடலைப்

பேணான்கடைந்து அமுதம்கொண்டுஉகந்தபெம்மானை *

பூணாரமார்வனைப் புள்ளூரும்பொன்மலையை *

காணாதார்கண்என்றும் கண்ணல்லகண்டாமே. (2)

2013 நீள்வான்குறளுருவாய் நின்றிரந்துமாவலிமண் *

தாளால்அளவிட்ட தக்கணைக்குமிக்கானை *

தோளாதமாமணியைத் தொண்டர்க்கினியானை *

கேளாச்செவிகள் செவியல்லகேட்டாமே.

2014 தூயானைத் தூயமறையானை * தென்னாலி

மேயானை மேவாளுயிருண்டுஅமுதுண்ட

வாயானை * மாலைவணங்கி அவன்பெருமை

பேசாதார் * பேச்சுஎன்றும் பேச்சல்லகேட்டாமே.

2015 கூடாஇரணியனைக் கூருகிரால்மார்விடந்த *

ஓடாஅடலரியை உம்பரார்கோமனை *

தோடார்நறுந்துழாய் மார்வனை, ஆர்வத்தால் *

பாடாதார்பாட்டுஎன்றும் பாட்டல்லகேட்டாமே.

2016 மையார்கடலும் மணிவரையும்மாமுகிலும் *

கொய்யார்குவளையும் காயாவும்போன்றுஇருண்ட

மெய்யானை * மெய்யமலையானைச் சங்கேந்தும்

கையானை * கைதொழா கையல்லகண்டாமே.

2017 கள்ளார்துழாயும் கணவலரும்கூவிளையும் *

முள்ளார்முளரியும் ஆம்பலுமுன்கண்டக்கால் *

புள்ளாய்ஓரேனமாய்ப் புக்கிடந்தான்பொன்னடிக்கென்று *

உள்ளாதாருள்ளத்தை உள்ளமாக்கொள்ளோமே.

2018 கனையார்கடலும் கருவிளையும்காயாவும்

அனையானை * அன்பினால் ஆர்வத்தால் * என்றும்

சுனையார்மலரிட்டுத் தொண்டராய்நின்று

நினையாதார் * நெஞ்சென்றும் நெஞ்சல்லகண்டாமே.

2019 வெறியார்கருங்கூந்தல் ஆய்ச்சியர்வைத்த *

உறியார்நறுவெண்ணெய் தானுகந்துஉண்ட

சிறியானை * செங்கணெடியானைச் சிந்தித்து

அறியாதார் * என்றும் அறியாதார்கண்டாமே.

2020 தேனோடுவண்டாலும் திருமாலிருஞ்சோலை *

தானிடமாக்கொண்டான் தடமலர்க்கண்ணிக்காய் *

ஆன்விடையேழன்றடர்த்தாற்கு ஆளானாரல்லாதார் *

மானிடவரல்லரென்று என்மனத்தேவைத்தேனே. (2)

2021 மெய்ந்நின்ற பாவம்அகல * திருமாலைக்

கைந்நின்றஆழியான் சூழும்கழல்சூடி *

கைந்நின்றவேற்கைக் கலியனொலிமாலை *

ஐயொன்றுமைந்தும் இவைபாடியாடுமினே. (2)