1972 மன்னிலங்குபாரதத்துத் தேரூர்ந்து * மாவலியைப்

பொன்னிலங்குதிண்விலங்கில்வைத்து * பொருகடல்சூழ்

தென்னிலங்கையீடழித்த தேவர்க்குஇதுகாணீர் *

என்னிலங்குசங்கோடு எழில்தோற்றிருந்தேனே. (2)

1973 இருந்தான்என்னுள்ளத்து இறைவன் * கறைசேர்

பருந்தாட்களிற்றுக்குஅருள்செய்த * செங்கண்

பெருந்தோள்நெடுமாலைப் பேர்பாடியாட *

வருந்தாதுஎன்கொங்கை ஒளிமன்னும்அன்னே!

1974 அன்னே! இவரை அறிவன் * மறைநான்கும்

முன்னேயுரைத்த முனிவரிவர்வந்து *

பொன்னேய்வளைகவர்ந்துபோகார் மனம்புகுந்து *

என்னே? இவரெண்ணும்எண்ணம் அறியோமே.

1975 அறியோமேயென்று உரைக்கலாமே? எமக்கு *

வெறியார்பொழில்சூழ் வியன்குடந்தைமேவி *

சிறியானோர்பிள்ளையாய் மெள்ளநடந்திட்டு *

உறியார்நறுவெண்ணெய் உண்டுகந்தார்தம்மையே.

1976 தம்மையேநாளும் வணங்கித்தொழுவார்க்கு *

தம்மையேயொக்க அருள்செய்வராதலால் *

தம்மையேநாளும் வணங்கித்தொழுதிறைஞ்சி *

தம்மையேபற்றா மனத்துஎன்றும்வைத்தோமே.

1977 வைத்தார்அடியார் மனத்தினில்வைத்து * இன்பம்

உற்றார்ஒளிவிசும்பில் ஓரடிவைத்து * ஓரடிக்கும்

எய்த்தாதுமண்ணென்று இமையோர்தொழுதிறைஞ்சி *

கைத்தாமரைகுவிக்கும் கண்ணன்என்கண்ணனையே.

1978 கண்ணன் மனத்துள்ளேநிற்கவும் * கைவளைகள்

என்னோகழன்ற? இவையென்னமாயங்கள்? *

பெண்ணானோம் பெண்மையோம்நிற்க * அவன்மேய

அண்ணல்மலையும் அரங்கமும்பாடோமே.

1979 பாடோமே? எந்தைபெருமானை * பாடிநின்று

ஆடோமே? ஆயிரம்பேரானை * பேர்நினைந்து

சூடோமே? சூடும்துழாயலங்கல்சூடி * நாம்

கூடோமே? கூடக்குறிப்பாகில்நன்னெஞ்சே!

1980 நன்னெஞ்சே! நம்பெருமான் நாளும்இனிதமரும் *

அன்னம்சேர்கானல் அணியாலிகைதொழுது *

முன்னம்சேர்வல்வினைகள்போக முகில்வண்ணன் *

பொன்னஞ்சேர்சேவடிமேல் போதணியப்பெற்றோமே.

1981 பெற்றாரார் ஆயிரம்பேரானை * பேர்பாடப்

பெற்றான் கலியனொலிசெய்தமிழ்மாலை *

கற்றார்ஓ! முற்றுலகாள்வர் * இவைகேட்க

லுற்றார்க்கு உறுதுயரில்லைஉலகத்தே. (2)