978 ஏனமுனாகி இருநிலமிடந்து *

அன்று இணையடி இமையவர் வணங்க *

தானவனாகம் தரணியில் புரளத் *

தடஞ்சிலை குனித்தவென்தலைவன் **

தேனமர்சோலைக் கற்பகம் பயந்த *

தெய்வநல்நறுமலர் கொணர்ந்து *

வானவர்வணங்கும் கங்கையின் கரைமேல் *

வதரியாச்சிராமத்துள்ளானே (2)

979 கானிடையுருவைச் சுடுசரம் துரந்து *

கண்டுமுன்கொடுந்தொழிலுரவோன் *

ஊனுடையகலத்து அடுகணைகுளிப்ப *

உயிர்க்கவர்ந்துகந்தஎம்ஒருவன் **

தேனுடைக்கமலத்தயனொடுதேவர் *

சென்றுசென்றிறைஞ்சிட *

பெருகு வானிடைமுதுநீர்க்கங்கையின்கரைமேல் *

வதரியாச்சிராமத்துள்ளானே

980 இலங்கையும்கடலும்அடலருந்துப்பின் *

இருநிதிக்கிறைவனும் *

அரக்கர் குலங்களும்கெடமுன் கொடுந்தொழில்புரிந்த கொற்றவன் * கொழுஞ்சுடர்சுழன்ற **

விலங்கலிலுரிஞ்சிமேல்நின்றவிசும்பில் *

வெண்துகிற்கொடியெனவிரிந்து *

வலந்தருமணிநீர்க்கங்கையின் கரைமேல் *

வதரியாச்சிராமத்துள்ளானே

981 துணிவுஇனிஉனக்குச்சொல்லுவன்மனமே! *

தொழுதெழுதொண்டர்கள்தமக்கு *

பிணியொழித்துஅமரர்பெருவிசும்பருளும் *

பேரருளாளன்எம்பெருமான் *

அணிமலர்க்குழலாரரம்பையர்துகிலும் *

ஆரமும்வாரிவந்து *

அணிநீர் மணிகொழித்திழிந்தகங்கையின்கரைமேல் *

வதரியாச்சிராமத்துள்ளானே

982 பேயிடைக்கிருந்துவந்தமற்றவள்தன் *

பெருமுலைசுவைத்திட *

பெற்ற தாயிடைக்கிருத்தலஞ்சுவனென்று தளர்ந்திட * வளர்ந்தஎன்தலைவன் **

சேய்முகட்டுச்சியண்டமும்சுமந்த *

செம்பொன்செய்விலங்கலிலிலங்கு *

வாய்முகட்டிழிந்தகங்கையின்கரைமேல் *

வதரியாச்சிராமத்துள்ளானே

983 தேரணங்கல்குல்செழுங்கையற்கண்ணி

திறத்துஒருமறத்தொழில் புரிந்து *

பாரணங்கிமிலேறேழுமுன்னடர்த்த

பனிமுகில்வண்ணன் எம்பெருமான் *

காரணந்தன்னால்கடும்புனல்கயத்த

கருவரைபிளவெழக்குத்தி *

வாரணங்கொணர்ந்தகங்கையின்கரைமேல்

வதரியாச்சிராமத்துள்ளானே.

984 வெந்திறல்களிறும்வேலைவாயமுதும்

விண்ணொடுவிண்ணவர்க்கரசும் *

இந்திரற்கருளியெமக்குமீந்தருளும்

எந்தைஎம்மடிகள்எம்பெருமான் *

அந்தரத்தமரரடியிணைவணங்க

ஆயிரமுகத்தினாலருளி *

மந்தரத்திழிந்தகங்கையின்கரைமேல்

வதரியாச்சிராமத்துள்ளானே.

985 மான்முனிந்தொருகால்வரிசிலைவளைத்த

மன்னவன் பொன்னிறத்து உரவோன் *

ஊன்முனிந்துஅவனதுடல் இருபிளவா

உகிர்நுதிமடுத்து * அயன்அரனைத்

தான்முனிந்திட்ட வெந்திறல்சாபம்

தவிர்த்தவன் * தவம்புரிந்துயர்ந்த

மாமுனிகொணர்ந்தகங்கையின்கரைமேல்

வதரியாச்சிராமத்துள்ளானே.

986 கொண்டல்மாருதங்கள் குலவரைதொகுநீர்க்

குரைகடலுலகுடன் அனைத்தும் *

உண்டமாவயிற்றோன் ஒண்சுடரேய்ந்த

உம்பரும் ஊழியும் ஆனான் *

அண்டமூடறுத்துஅன்று அந்தரத்துஇழிந்து

அங்குஅவனியாள் அலமர * பெருகும்

மண்டுமாமணிநீர்க்கங்கையின் கரைமேல்

வதரியாச்சிராமத்துள்ளானே.

987 வருந்திரைமணிநீர்க்கங்கையின் கரைமேல்

வதரியாச்சிராமத்துள்ளானை *

கருங்கடல்முந்நீர்வண்ணனை எண்ணிக்

கலியன்வாயொலி செய்தபனுவல் *

வரஞ்செய்தவைந்துமைந்தும் வல்லார்கள்

வானவருலகுடன்மருவி *

இருங்கடலுலகம்ஆண்டு வெண்குடைக்கீழ்

இமையவராகுவர்தாமே. (2)