2082 வையம்தகளியா வார்கடலேநெய்யாக *

வெய்யகதிரோன்விளக்காக * - செய்ய

சுடராழியானடிக்கே சூட்டினேன்சொல்மாலை *

இடராழி நீங்குகவேயென்று. (2) 1

2083 என்றுகடல்கடைந்தது? எவ்வுலகம்நீரேற்றது? *

ஒன்றுமதனையுணரேன்நான் * - அன்றுஅது

அடைத்துடைத்துக் கண்படுத்தவாழி * இதுநீ

படைத்திடந்துஉண்டுமிழ்ந்தபார்.

2084 பாரளவும்ஓரடிவைத்து ஓரடியும்பாருடுத்த *

நீரளவும்செல்லநிமிர்ந்ததே * - சூருருவில்

பேயளவுகண்டபெருமான்! அறிகிலேன் *

நீயளவுகண்டநெறி.

2085 நெறிவாசல் தானேயாய்நின்றானை * ஐந்து

பொறிவாசல்போர்க்கதவம் சார்த்தி * - அறிவானாம்

ஆலமரநீழல் அறம்நால்வர்க்கன்றுரைத்த *

ஆலமமர்கண்டத்தரன்.

2086 அரன்நாரணன்நாமம் ஆன்விடைபுள்ளூர்தி *

உரைநூல்மறையுறையும்கோயில் * -வரைநீர்

கருமம்அழிப்பளிப்புக் கையதுவேல்நேமி *

உருவமெரிகார்மேனிஒன்று.

2087 ஒன்றும்மறந்தறியேன் ஓதநீர்வண்ணனைநான் *

இன்றுமறப்பனோ? ஏழைகாள்! - அன்று

கருவரங்கத்துட்கிடந்து கைதொழுதேன்கண்டேன் *

திருவரங்கமேயான்திசை.

2088 திசையும் திசையுறுதெய்வமும் * தெய்வத்

திசையும்கருமங்களெல்லாம் * -அசைவில்சீர்க்

கண்ணன்நெடுமால் கடல்கடைந்த * காரோத

வண்ணன் படைத்தமயக்கு.

2089 மயங்கவலம்புரி வாய்வைத்து * வானத்

தியங்கும்எறிகதிரோன்தன்னை * - முயங்கமருள்

தேராழியால்மறைத்தது என்? நீ திருமாலே! *

போராழிக்கையால் பொருது.

2090 பொருகோட்டோரேனமாய்ப்புக்கிடந்தாய்க்கு * அன்றுஉன்

ஒருகோட்டின்மேல்கிடந்ததன்றே * - விரிதோட்ட

சேவடியைநீட்டித் திசைநடுங்கவிண்துளங்க *

மாவடிவின்நீயளந்தமண்.

2091 மண்ணும்மலையும் மறிகடலும்மாருதமும் *

விண்ணும்விழுங்கியதுமெய்யென்பர் * - எண்ணில்

அலகளவுகண்ட சீராழியாய்க்கு * அன்றுஇவ்

வுலகளவும்உண்டோ? உன்வாய்.

2092 வாயவனையல்லது வாழ்த்தாது * கையுலகம்

தாயவனையல்லது தான்தொழா * - பேய்முலைநஞ்சு

ஊணாகவுண்டான் உருவொடுபேரல்லால் *

காணாகண் கேளாசெவி.

2093 செவிவாய்கண்மூக்கு உடலென்றைம்புலனும் * செந்தீ

புவிகால் நீர்விண்பூதமைந்தும் * - அவியாத

ஞானமும்வேள்வியும் நல்லறமும்என்பரே *

ஏனமாய்நின்றாற்குஇயல்வு.

2094 இயல்வாக ஈன்துழாயானடிக்கேசெல்ல *

முயல்வாரியலமரர்முன்னம் * - இயல்வாக

நீதியாலோதி நியமங்களால்பரவ *

ஆதியாய்நின்றாரவர்.

2095 அவரவர்தாம்தாம் அறிந்தவாறேத்தி *

இவரிவரெம்பெருமானென்று * - சுவர்மிசைச்

சார்த்தியும் வைத்தும்தொழுவர் * உலகளந்த

மூர்த்தியுருவேமுதல்.

2096 முதலாவார்மூவரே * அம்மூவருள்ளும்

முதலாவான் மூரிநீர்வண்ணன் * - முதலாய

நல்லானருளல்லால் நாமநீர்வையகத்து *

பல்லாரருளும்பழுது.

2097 பழுதேபலபகலும் போயினவென்று * அஞ்சி

அழுதேன் அரவணைமேல்கண்டு - தொழுதேன் *

கடலோதம்காலலைப்பக் கண்வளரும் * செங்கண்

அடலோதவண்ணரடி.

2098 அடியும் படிகடப்பத் தோள்திசைமேல்செல்ல *

முடியும்விசும்பளந்ததென்பர் * - வடியுகிரால்

ஈர்ந்தான் இரணியனதாகம் * இருஞ்சிறைப்புள்

ஊர்ந்தான் உலகளந்தநான்று.

2099 நான்றமுலைத்தலை நஞ்சுண்டு * உறிவெண்ணெய்

தோன்றவுண்டான் வென்றிசூழ்களிற்றை - ஊன்றி *

பொருதுடைவுகண்டானும் புள்ளின்வாய்கீண்டானும் *

மருதிடைபோய்மண்ணளந்தமால்.

2100 மாலுங்கருங்கடலே! என்நோற்றாய்? * வையகமுண்டு

ஆலினிலைத்துயின்றவாழியான் * - கோலக்

கருமேனிச் செங்கண்மால்கண்படையுள் * என்றும்

திருமேனி நீதீண்டப்பெற்று.

2101 பெற்றார்தளைகழலப் பேர்ந்தோர்குறளுருவாய் *

செற்றார்படிகடந்தசெங்கண்மால் * - நற்றா

மரைமலர்ச்சேவடியை வானவர்கைகூப்பி *

நிரைமலர்கொண்டுஏத்துவரால்நின்று.

2102 நின்றுநிலமங்கை நீரேற்றுமூவடியால் *

சென்றுதிசையளந்தசெங்கண்மாற்கு * - என்றும்

படையாழிபுள்ளூர்தி பாம்பணையான்பாதம் *

அடையாழிநெஞ்சே! அறி.

2103 அறியுமுலகெல்லாம் யானேயுமல்லேன் *

பொறிகொள்சிறையுவணமூர்ந்தாய் * - வெறிகமழும்

காம்பேய்மென்தோளி கடைவெண்ணெயுண்டாயை *

தாம்பேகொண்டார்த்ததழும்பு.

2104 தழும்பிருந்தசார்ங்கநாண் தோய்ந்தவாமங்கை *

தழும்பிருந்த தாள்சகடம்சாடி * - தழும்பிருந்த

பூங்கோதையாள்வெருவப் பொன்பெயரோன் மார்பிடந்த *

வீங்கோதவண்ணர்விரல்.

2105 விரலொடுவாய்தோய்ந்த வெண்ணெய்கண்டு * ஆய்ச்சி

உரலோடுஉறப்பிணித்தநான்று * - குரலோவாது

ஏங்கிநினைந்து அயலார்காணவிருந்திலையே? *

ஓங்கோதவண்ணா! உரை.

2106 உரைமேற்கொண்டு என்னுள்ளமோவாது * எப்போதும்

வரைமேல் மரதகமேபோல * - திரைமேல்

கிடந்தானைக் கீண்டானை * கேழலாய்ப்பூமி

யிடந்தானை யேத்தியெழும்.

2107 எழுவார்விடைகொள்வார் ஈன்துழாயானை *

வழுவாவகைநினைந்து வைகல் - தொழுவார் *

வினைச்சுடரைநந்துவிக்கும் வேங்கடமே * வானோர்

மனச்சுடரைத் தூண்டும்மலை.

2108 மலையால்குடைகவித்து மாவாய்பிளந்து *

சிலையால் மராமரமேழ்செற்று * - கொலையானைப்

போர்க்கோடொசித்தனவும் பூங்குருந்தம்சாய்த்தனவும்

கார்க்கோடுபற்றியான்கை.

2109 கையவலம்புரியும்நேமியும் * கார்வண்ணத்து

ஐய! மலர்மகள்நின்ஆகத்தாள் * - செய்ய

மறையான்நின்உந்தியான் மாமதிள்மூன்றெய்த *

இறையான்நின்னாகத்திறை.

2110 இறையும்நிலனும் இருவிசும்பும்காற்றும் *

அறைபுனலும் செந்தீயுமாவான் * - பிறைமருப்பின்

பைங்கண்மால்யானை படுதுயரம்காத்தளித்த *

செங்கண்மால்கண்டாய்தெளி.

2111 தெளிதாக உள்ளத்தைச்செந்நிறீஇ * ஞானத்

தெளிதாக நன்குணர்வார்சிந்தை * - எளிதாகத்

தாய்நாடுகன்றேபோல் தண்டுழாயானடிக்கே *

போய்நாடிக்கொள்ளும்புரிந்து.

2112 புரியொருகைபற்றி ஓர்பொன்னாழியேந்தி *

அரியுருவும்ஆளுருவுமாகி * - எரியுருவ

வண்ணத்தான்மார்பிடந்த மாலடியையல்லால் * மற்று

எண்ணத்தானாமோ? இமை.

2113 இமையாதகண்ணால் இருளகலநோக்கி *

அமையாப்பொறிபுலன்களைந்தும் - நமையாமல் *

ஆகத்தணைப்பார் அணைவரே * ஆயிரவாய்

நாகத்தணையான்நகர்.

2114 நகரமருள்புரிந்து நான்முகற்குப் * பூமேல்

பகரமறைபயந்தபண்பன் * - பெயரினையே

புந்தியால்சிந்தியாது ஓதிஉருவெண்ணும் *

அந்தியாலாம்பயனங்கென்?

2115 என்! ஒருவர்மெய்யென்பர் ஏழுலகுண்டு * ஆலிலையில்

முன்னொருவனாய முகில்வண்ணா! * - நின்னுருகிப்

பேய்த்தாய்முலைதந்தாள் பேர்ந்திலளால் * பேரமர்க்கண்

ஆய்த்தாய் முலைதந்தவாறு!

2116 ஆறியவன்பில் அடியார்தமார்வத்தால் *

கூறியகுற்றமாக்கொள்ளல்நீ - தேறி *

நெடியோய்! அடி அடைதற்கன்றே * ஈரைந்து

முடியான்படைத்தமுரண்.

2117 முரணவலி தொலைதற்காமென்றே * முன்னம்

தரணிதனதாகத்தானே * - இரணியனைப்

புண்நிரந்தவள்ளுகிரால் பொன்னாழிக்கையால் * நீ

மண்ணிரந்துகொண்டவகை.

2118 வகையறுநுண்கேள்வி வாய்வார்கள் * நாளும்

புகைவிளக்கும் பூம்புனலுமேந்தி * - திசைதிசையின்

வேதியர்கள் சென்றிறைஞ்சும்வேங்கடமே * வெண்சங்கம்

ஊதியவாய் மாலுகந்தவூர்.

2119 ஊரும்வரியரவம் ஒண்குறவர்மால்யானை *

பேரவெறிந்த பெருமணியை * - காருடைய

மின்னென்று புற்றடையும்வேங்கடமே * மேலசுரர்

எம்மென்றமாலதிடம்.

2120 இடந்தது பூமி எடுத்ததுகுன்றம் *

கடந்ததுகஞ்சனைமுன்னஞ்ச * - கிடந்ததுவும்

நீரோதமாகடலே நின்றதுவும்வேங்கடமே *

பேரோதவண்ணர்பெரிது.

2121 பெருவில்பகழிக் குறவர்கைச்செந்தீ *

வெருவிப்புனம்துறந்தவேழம் * - இருவிசும்பில்

மீன்வீழக் கண்டஞ்சும்வேங்கடமே * மேலசுரர்

கோன்வீழக்கண்டுகந்தான்குன்று.

2122 குன்றனையகுற்றம்செய்யினும் குணங்கொள்ளும் *

இன்றுமுதலாகவென்னெஞ்சே! * - என்றும்

புறனுரையேயாயினும் பொன்னாழிக்கையான் *

திறனுரையேசிந்தித்திரு.

2123 திருமகளும்மண்மகளும் ஆய்மகளும்சேர்ந்தால் *

திருமகட்கேதீர்ந்தவாறென்கொல்? * - திருமகள்மேல்

பாலோதம்சிந்தப் படநாகணைக்கிடந்த *

மாலோதவண்ணர்மனம்.

2124 மனமாசுதீரும் அருவினையும்சாரா *

தனமாய தானேகைகூடும் * - புனமேய

பூந்துழாயானடிக்கே போதொடுநீரேந்தி *

தாம்தொழாநிற்பார்தமர்.

2125 தமருகந்ததுஎவ்வுருவம் அவ்வுருவம்தானே *

தமருகந்ததஎப்பேர் மற்றப்பேர் * - தமருகந்தது

எவ்வண்ணம்சிந்தித்து இமையாதிருப்பரே *

அவ்வண்ணமாழியானாம்.

2126 ஆமே, அமரர்க்கு அறிய? அதுநிற்க *

நாமேயறிகிற்போம் நன்னெஞ்சே! * - பூமேய

மாதவத்தோன்தாள்பணிந்த வாளரக்கன்நீண்முடியை *

பாதமத்தால்எண்ணினான்பண்பு.

2127 பண்புரிந்தநான்மறையோன் சென்னிப்பலியேற்ற *

வெண்புரிநூல்மார்பன்வினைதீர * - புண்புரிந்த

ஆகத்தான் தாள்பணிவார்கண்டீர் * அமரர்தம்

போகத்தால் பூமியாள்வார்.

2128 வாரிசுருக்கி மதக்களிறைந்தினையும் *

சேரிதிரியாமல் செந்நிறீஇ * - கூரிய

மெய்ஞ்ஞானத்தால் உணர்வார்காண்பரே * மேலொருநாள்

கைந்நாகம்காத்தான்கழல்.

2129 கழலொன்றெடுத்து ஒருகைசுற்றிஓர்கைமேல் *

சுழலும்சுராசுரர்களஞ்ச * - அழலும்

செருவாழியேந்தினான் சேவடிக்கேசெல்ல *

மருவாழிநெஞ்சே! மகிழ்.

2130 மகிழலகொன்றேபோல் மாறும்பல்யாக்கை *

நெகிழமுயல்கிற்பார்க்கல்லால் * - முகிழ்விரிந்த

சோதிபோல்தோன்றும் சுடர்ப்பொன்நெடுமுடி * எம்

ஆதிகாண்பார்க்குமரிது.

2131 அரியபுலனைந்தடக்கி ஆய்மலர்கொண்டு * ஆர்வம்

புரியப் பரிசினால்புல்கில் * - பெரியனாய்

மாற்றாதுவீற்றிருந்த மாவலிபால் * வண்கைநீர்

ஏற்றானைக் காண்பதெளிது.

2132 எளிதிலிரண்டடியும் காண்பதற்கு * என்னுள்ளம்

தெளியத் தெளிந்தொழியும்செவ்வே * - களியில்

பொருந்தாதவனைப் பொரலுற்று * அரியா

யிருந்தான் திருநாமமெண்.

2133 எண்மர்பதினொருவர் ஈரறுவரோரிருவர் *

வண்ணமலரேந்திவைகலும் * - நண்ணி

ஒருமாலையால் பரவியோவாது * எப்போதும்

திருமாலைக்கைதொழுவர்சென்று.

2134 சென்றால்குடையாம் இருந்தால்சிங்காசனமாம் *

நின்றால்மரவடியாம் நீள்கடலுள் * - என்றும்

புணையாம்மணிவிளக்காம் பூம்பட்டாம்புல்கும்

அணையாம் * திருமாற்குஅரவு. (2)

2135 அரவமடல்வேழம் ஆன்குருந்தம்புள்வாய்

குரவைகுடமுலைமற்குன்றம் * - கரவின்றி

விட்டிறுத்துமேய்த்தொசித்துக் கீண்டுகோத்தாடி * உண்

டட்டெடுத்தசெங்கணவன்.

2136 அவன்தமர் எவ்வினையராகிலும் * எங்கோ

னவன்தமரே என்றொழிவதல்லால் * - நமன்தமரால்

ஆராயப்பட்டு அறியார்கண்டீர் * அரவணைமேல்

பேராயற்காட்பட்டார்பேர்.

2137 பேரேவரப் பிதற்றலல்லால் என்பெம்மானை *

ஆரேயறிவார்? அதுநிற்க * - நேரே

கடிக்கமலத்துள்ளிருந்தும் காண்கிலான் * கண்ணன்

அடிக்கமலந்தன்னையயன்.

2138 அயல்நின்றவல்வினையை அஞ்சினேனஞ்சி *

உயநின்திருவடியேசேர்வான் * - நயம்நின்ற

நன்மாலைகொண்டு நமோநாரணாவென்னும் *

சொன்மாலைகற்றேன்தொழுது.

2139 தொழுதுமலர்கொண்டு தூபம்கையேந்தி *

எழுதுமெழுவாழிநெஞ்சே! * - பழுதின்றி

மந்திரங்கள்கற்பனவும் மாலடியேகைதொழுவான் *

அந்தரமொன்றில்லையடை.

2140 அடைந்தவருவினையோடு அல்லல்நோய்பாவம் *

மிடைந்தவைமீண்டொழியவேண்டில் * - நுடங்கிடையை

முன்னிலங்கைவைத்தான் முரணழிய * முன்னொருநாள்

தன்வில்அங்கைவைத்தான்சரண்.

2141 சரணாமறைபயந்த தாமரையானோடு *

மரணாயமன்னுயிர்கட்கெல்லாம் * - அரணாய

பேராழிகொண்ட பிரானன்றிமற்றறியாது *

ஓராழிசூழ்ந்தவுலகு.

2142 உலகும் உலகிறந்தவூழியும் * ஒண்கேழ்

விலகுகருங்கடலும்வெற்பும் * - உலகினில்

செந்தீயும் மாருதமும்வானும் * திருமால்தன்

புந்தியிலாயபுணர்ப்பு.

2143 புணர்மருதினூடுபோய்ப் பூங்குருந்தம்சாய்த்து *

மணமருவமால்விடையேழ்செற்று * - கணம்வெருவ

ஏழுலகும்தாயினவும் எண்திசையும்போயினவும் *

சூழரவப்பொங்கணையான்தோள்.

2144 தோளவனையல்லால்தொழா * என்செவியிரண்டும்

கேளவனது இன்மொழியேகேட்டிருக்கும் * - நாநாளும்

கோணாகணையான் குரைகழலேகூறுவதே *

நாணாமைநள்ளேன்நயம்.

2145 நயவேன்பிறர்பொருளை நள்ளேன்கீழாரோடு *

உயவேன்உயர்ந்தவரோடல்லால் * - வியவேன்

திருமாலையல்லது தெய்வமென்றேத்தேன் *

வருமாறென்நம்மேல்வினை? 64

2146 வினையாலடர்ப்படார் வெந்நரகில்சேரார் *

தினையேனும்தீக்கதிக்கண்செல்லார் * - நினைதற்

கரியானைச் சேயானை * ஆயிரம்பேர்ச்செங்கண்

கரியானைக் கைதொழுதக்கால்.

2147 காலையெழுந்து உலகங்கற்பனவும் * கற்றுணர்ந்த

மேலைத்தலைமறையோர் வேட்பனவும் * - வேலைக்கண்

ஓராழியானடியே ஓதுவதுமோர்ப்பனவும் *

பேராழிகொண்டான் பெயர்.

2148 பெயரும் கருங்கடலே நோக்குமாறு * ஒண்பூ

உயரும் கதிரவனே நோக்கும் * -உயிரும்

தருமனையே நோக்குமொண் டாமரையாள் கேள்வன் *

ஒருவனையே நோக்கும் உணர்வு.

2149 உணர்வாரார்உன்பெருமை? ஊழிதோறூழி *

உணர்வாரார் உன்னுருவந்தன்னை? * உணர்வாரார்?

விண்ணகத்தாய்! மண்ணகத்தாய்! வேங்கடத்தாய்! நால்வேதப்

பண்ணகத்தாய்! நீகிடந்தபால்.

2150 பாலன்தனதுருவாய் ஏழுலகுண்டு * ஆலிலையின்

மேலன்று நீவளர்ந்தமெய்யென்பர் * - ஆலன்று

வேலைநீருள்ளதோ? விண்ணதோ? மண்ணதோ?

சோலைசூழ்குன்றெடுத்தாய்! சொல்லு.

2151 சொல்லுந்தனையும் தொழுமின் * விழுமுடம்பு

செல்லுந்தனையும்திருமாலை * - நல்லிதழ்த்

தாமத்தால்வேள்வியால் தந்திரத்தால்மந்திரத்தால் *

நாமத்தாலேத்துதிரேல்நன்று.

2152 நன்றுபிணிமூப்புக் கையகற்றி, நான்கூழி *

நின்றுநிலமுழுதுமாண்டாலும் * என்றும்

விடலாழிநெஞ்சமே! வேண்டினேன்கண்டாய் *

அடலாழிகொண்டான்மாட்டன்பு.

2153 அன்பாழியானை அணுகென்னும் * நாஅவன்தன்

பண்பாழித்தோள்பரவியேத்தென்னும் * முன்பூழி

காணானைக்காணென்னும்கண் செவிகேளென்னும் *

பூணாரம்பூண்டான்புகழ்.

2154 புகழ்வாய்பழிப்பாய்நீ பூந்துழாயானை *

இகழ்வாய்கருதுவாய் நெஞ்சே! * - திகழ்நீர்க்

கடலும்மலையும் இருவிசும்பும்காற்றும் *

உடலுமுயிருமேற்றான்.

2155 ஏற்றான்புள்ளூர்ந்தான் எயிலெரித்தான்மார்விடந்தான் *

நீற்றான்நிழல்மணிவண்ணத்தான் * - கூற்றொருபால்

மங்கையான் பூமகளான்வார்சடையான் * நீள்முடியான்

கங்கையான் நீள்கழலான்காப்பு.

2156 காப்புன்னையுன்னக் கழியும் * அருவினைகள்

ஆப்புன்னையுன்ன அவிழ்ந்தொழியும் * - மூப்புன்னைச்

சிந்திப்பார்க்கில்லை திருமாலே! * நின்னடியை

வந்திப்பார் காண்பர்வழி.

2157 வழிநின்று நின்னைத்தொழுவார் * வழுவா

மொழிநின்ற மூர்த்தியரேயாவர் * - பழுதொன்றும்

வாராதவண்ணமே விண்கொடுக்கும் * மண்ணளந்த

சீரான்திருவேங்கடம்.

2158 வேங்கடமும் விண்ணகரும்வெஃகாவும் * அஃகாத

பூங்கிடங்கின் நீள்கோவல்பொன்னகரும் * - நான்கிடத்தும்

நின்றான்இருந்தான் கிடந்தான்நடந்தானே *

என்றால்கெடுமாம் இடர்.

2159 இடரார்படுவார்? எழுநெஞ்சே! * வேழம்

தொடர்வான் கொடுமுதலைசூழ்ந்த * - படமுடைய

பைந்நாகப்பள்ளியான் பாதமேகைதொழுதும் *

கொய்ந்நாகப்பூம்போதுகொண்டு.

2160 கொண்டானையல்லால் கொடுத்தாரையார்பழிப்பார்? *

மண்தாவெனவிரந்து மாவலியை * ஒண்தாரை

நீரங்கைதோய நிமிர்ந்திலையே * நீள்விசும்பி

லாரங்கைதோயவடுத்து.

2161 அடுத்தகடும்பகைஞர்க்கு ஆற்றேனென்றோடி *

படுத்தபொரும்பாழிசூழ்ந்த - விடத்தரவை *

வல்லாளன்கைக்கொடுத்த மாமேனிமாயவனுக்கு *

அல்லாதுமாவரோ ஆள்?

2162 ஆளமர்வென்றி அடுக்களத்துளஞ்ஞான்று *

வாளமர்வேண்டிவரைநட்டு * - நீளரவைச்

சுற்றிக்கடைந்தான் பெயரன்றே? * தொன்னரகைப்

பற்றிக்கடத்தும்படை.

2163 படையாரும்வாட்கண்ணார் பாரசிநாள் * பைம்பூந்

தொடையலோடு ஏந்தியதூபம் * - இடையிடையில்

மீன்மாய மாசூணும்வேங்கடமே * மேலொருநாள்

மான்மாயவெய்தான்வரை.

2164 வரைகுடைதோள்காம்பாக ஆநிரைகாத்து * ஆயர்

நிரைவிடையேழ்செற்றவாறென்னே! * - உரவுடைய

நீராழியுள்கிடந்து நேராநிசாசரர்மேல் *

பேராழிகொண்டபிரான்!

2165 பிரான்! உன்பெருமை பிறராரறிவார்? *

உராய்உலகளந்தஞான்று * - வராகத்

தெயிற்றளவு போதாவாறென்கொலோ * எந்தை

அடிக்களவுபோந்தபடி.

2166 படிகண்டறிதியே? பாம்பணையினான் * புள்

கொடிகண்டறிதியே? கூறாய் * - வடிவிற்

பொறியைந்துமுள்ளடக்கிப் போதொடுநீரேந்தி *

நெறிநின்றநெஞ்சமே! நீ.

2167 நீயும்திருமகளும் நின்றாயால் * குன்றெடுத்துப்

பாயும் பனி மறுத்தபண்பாளா! * - வாசல்

கடைகழியாவுள்புகாக் காமர்பூங்கோவல் *

இடைகழியேபற்றியினி.

2168 இனியார்புகுவார் எழுநரகவாசல்? *

முனியாதுமூரித்தாள்கோமின் * - கனிசாயக்

கன்றெறிந்ததோளான் கனைகழலேகாண்பதற்கு *

நன்கறிந்தநாவலம்சூழ்நாடு.

2169 நாடிலும் நின்னடியேநாடுவன் * நாள்தோறும்

பாடிலும் நின்புகழேபாடுவன் * சூடிலும்

பொன்னாழியேந்தினான் பொன்னடியேசூடுவேற்கு *

என்னாகிலென்னேயெனக்கு?

2170 எனக்காவார் ஆரொருவரே! * எம்பெருமான்

தனக்காவான் தானேமற்றல்லால் * - புனக்காயாம்

பூமேனிகாணப் பொதியவிழும்பூவைப்பூ *

மாமேனிகாட்டும்வரம்.

2171 வரத்தால்வலிநினைந்து மாதவ! நின்பாதம் *

சிரத்தால் வணங்கானாமென்றே? * - உரத்தினால்

ஈரரியாய் நேர்வலியோனாயவிரணியனை *

ஓரரியாய்நீயிடந்ததூன்.

2172 ஊனக்குரம்பையின் உள்புக்கிருள்நீக்கி *

ஞானச்சுடர்கொளீஇ நாள்தோறும்- * ஏனத்

துருவாயுலகிடந்த ஊழியான்பாதம் *

மருவாதார்க்குண்டாமோவான்?

2173 வானாகித்தீயாய் மறிகடலாய்மாருதமாய்

தேனாகிப்பாலாம் திருமாலே! * - ஆனாய்ச்சி

வெண்ணெய்விழுங்க நிறையுமே? * முன்னொருநாள்

மண்ணையுமிழ்ந்தவயிறு.

2174 வயிறழலவாளுருவி வந்தானையஞ்ச *

எயிறிலகவாய்மடுத்ததென் நீ * - பொறியுகிரால்

பூவடியையீடழித்த பொன்னாழிக்கையா! * நின்

சேவடிமேலீடழியச்செற்று.

2175 செற்றெழுந்துதீவிழித்துச் சென்றவிந்தவேழுலகும் *

மற்றிவைஆவென்று வாயங்காந்து * முற்றும்

மறையவற்குக்காட்டிய மாயவனையல்லால் *

இறையேனுமேத்தாதுஎன்நா.

2176 நாவாயிலுண்டே நமோநாரணாவென்று *

ஓவாதுரைக்கும்உரையுண்டே * - மூவாத

மாக்கதிக்கண்செல்லும் வகையுண்டே * என்னொருவர்

தீக்கதிக்கண்செல்லுந்திறம்?

2177 திறம்பாதென்னெஞ்சமே! செங்கண்மால்கண்டாய் *

அறம்பாவமென்றிரண்டுமாவான் * புறந்தான்இம்

மண்தான் மறிகடல்தான்மாருதந்தான் * வான்தானே

கண்டாய் கடைக்கட்பிடி.

2178 பிடிசேர் களிறளித்தபேராளா! * உன்தன்

அடிசேர்ந்தருள்பெற்றாளன்றே * - பொடிசேர்

அனற்கங்கையேற்றான் அவிர்சடைமேல்பாய்ந்த *

புனல்கங்கையென்னும்பேர்ப்பொன்.

2179 பொன்திகழும்மேனிப் புரிசடையம்புண்ணியனும் *

நின்றுலகந்தாயநெடுமாலும் * - என்றும்

இருவரங்கத்தால் திரிவரேலும் * ஒருவன்

ஒருவனங்கத்தென்றுமுளன்.

2180 உளன்கண்டாய்நன்னெஞ்சே! உத்தமனென்றும்

உளன்கண்டாய் * உள்ளூவாருள்ளத்து-உளன்கண்டாய் *

வெள்ளத்தினுள்ளானும் வேங்கடத்துமேயானும் *

உள்ளத்தினுள்ளானென்றுஓர். (2)

2181 ஓரடியும்சாடுதைத்த ஒண்மலர்ச்சேவடியும் *

ஈரடியும்காணலாம் என்னெஞ்சே! * - ஓரடியின்

தாயவனைக்கேசவனைத் தண்துழாய்மாலைசேர் *

மாயவனையேமனத்துவை. (2)