3057 மொய்ம்மாம்பூம்பொழில்பொய்கை முதலைச் சிறைப்பட்டுநின்ற *

கைம்மாவுக்கருள்செய்த கார்முகில்போல்வண்ணன் கண்ணன் *

எம்மானைச்சொல்லிப்பாடி எழுந்தும்பரந்தும்துள்ளாதார்

தம்மால் * கருமமென்? சொல்லீர் தண்கடல்வட்டத்துள்ளீரே? (2)

3058 தண்கடல்வட்டத்துள்ளாரைத் தமக்கிரையாத்தடிந்துண்ணும் *

திண்கழற்காலசுரர்க்குத் தீங்கிழைக்கும்திருமாலை *

பண்கள்தலைக்கொள்ளப்பாடிப் பறந்தும் குனித்துழலாதார் *

மண்கொளுலகிற்பிறப்பார் வல்வினைமோதமலைந்தே

3059 மலையைஎடுத்துக்கல்மாரிகாத்துப் பசுநிரைதன்னை *

தொலைவுதவிர்த்தபிரானைச் சொல்லிச்சொல்லி நின்றெப்போதும் *

தலையினோடாதனந்தட்டத் தடுகுட்டமாய்ப்பறவாதார் *

அலைகொள்நரகத்தழுந்திக் கிடந்துழைக்கின்றவம்பரே.

3060 வம்பவிழ்கோதைபொருட்டா மால்விடையேழுமடர்த்த *

செம்பவளத்திரள்வாயன் சிரீதரன்தொல்புகழ்பாடி *

கும்பிடுநட்டமிட்டாடிக் கோகுகட்டுண்டுழலாதார் *

தம்பிறப்பால்பயனென்னே? சாதுசனங்களிடையே.

3061 சாதுசனத்தைநலியும் கஞ்சனைச்சாதிப்பதற்கு *

ஆதியஞ்சோதியுருவை அங்குவைத்திங்குப்பிறந்த *

வேதமுதல்வனைப்பாடி வீதிகள்தோறும்துள்ளாதார் *

ஓதியுணர்ந்தவர்முன்னா என்சவிப்பார்மனிசரே?

3062 மனிசரும்மற்றும்முற்றுமாய் மாயப்பிறவிபிறந்த *

தனியன்பிறப்பிலிதன்னைத் தடங்கடல்சேர்ந்தபிரானை *

கனியைக்கரும்பினின்சாற்றைக் கட்டியைத்தேனை யமுதை *

முனிவின்றியேத்திக்குனிப்பார் முழுதுணர் நீர்மையினாரே.

3063 நீர்மையில்நூற்றுவர்வீய ஐவர்க்கருள்செய்துநின்று *

பார்மல்குசேனையவித்த பரஞ்சுடரைநினைந்தாடி *

நீர்மல்குகண்ணினராகி நெஞ்சங்குழைந்துநையாதே *

ஊன்மல்கிமோடுபருப்பார் உத்தமர்கட்கென் செய்வாரே?

3064 வார்புனலந்தணருவி வடதிருவேங்கடத்தெந்தை *

பேர்பலசொல்லிப்பிதற்றிப் பித்தரென்றேபிறர்கூற *

ஊர்பலபுக்கும்புகாதும் உலோகர்சிரிக்கநின்றாடி *

ஆர்வம்பெருகிக்குனிப்பார் அமரர்தொழப்படுவாரே.

3065 அமரர்தொழப்படுவானை அனைத்துலகுக்கும்பிரானை *

அமரமனத்தினுள்யோகுபுணர்ந்து அவன் தன்னோடொன்றாக *

அமரத்துணியவல்லார்களொழிய அல்லாதவரெல்லாம் *

அமரநினைந்தெழுந்தாடி அலற்றுவதேகருமமே.

3066 கருமமும்கருமபலனுமாகிய காரணன்தன்னை *

திருமணிவண்ணனைச்செங்கண்மாலினைத் தேவபிரானை *

ஒருமைமனத்தினுள்வைத்து உள்ளங்குழைந்தெழுந்தாடி *

பெருமையும்நாணும்தவிர்ந்து பிதற்றுமின்பேதமை தீர்ந்தே.

3067 தீர்ந்தவடியவர்தம்மைத் திருத்திப்பணிகொள்ளவல்ல *

ஆர்ந்தபுகழச்சுதனை அமரர்பிரானையெம்மானை *

வாய்ந்தவளவயல்சூழ் தண்வளங்குருகூர்ச்சடகோபன் *

நேர்ந்தவோராயிரத்திப்பத்து அருவினைநீறுசெய்யுமே. (2)