3046 புகழுநல்லொருவன் என்கோ! பொருவில்சீர்ப் பூமியென்கோ? *

திகழும்தண்பரவையென்கோ? தீயென்கோ வாயுவென்கோ? *

நிகழுமாகாசமென்கோ? நீள்சுடரிரண்டுமென்கோ? *

இகழ்விலிவ்வனைத்துமென்கோ? கண்ணனைக்கூவுமாறே. (2)

3047 கூவுமாறறியமாட்டேன் குன்றங்கள்அனைத்துமென்கோ? *

மேவுசீர்மாரியென்கோ? விளங்குதாரகைகளென்கோ? *

நாவியல்கலைகளென்கோ? ஞானநல்லாவியென்கோ? *

பாவுசீர்க்கண்ணனெம்மான் பங்கயக்கண்ணனையே.

3048 பங்கையக்கண்ணனென்கோ? பவளச்செவ்வாயனென்கோ? *

அங்கதிரடியனென்கோ? அஞ்சனவண்ணனென்கோ? *

செங்கதிர்முடியனென்கோ? திருமறுமார்வனென்கோ? *

சங்குசக்கரத்தனென்கோ? சாதிமாணிக்கத்தையே.

3049 சாதிமாணிக்கமென்கோ? சவிகொள்பொன் முத்தமென்கோ? *

சாதிநல்வயிரமென்கோ? தவிவில்சீர்விளக்கமென்கோ? *

ஆதியஞ்சோதியென்கோ? ஆதியம்புருடனென்கோ? *

ஆதுமில்காலத்தெந்தை அச்சுதனமலனையே.

3050 அச்சுதனமலனென்கோ? அடியவர்வினைகெடுக்கும் *

நச்சுமாமருந்தமென்கோ? நலங்கடலமுதமென்கோ? *

அச்சுவைக்கட்டியென்கோ? அறுசுவையடிசிலென்கோ? *

நெய்ச்சுவைத்தேறலென்கோ? கனியென்கோ? பாலென்கேனோ.

3051 பாலென்கோ? நான்குவேதப்பயனென்கோ? சமயநீதி *

நூலென்கோ? நுடங்குகேள்வியிசையென்கோ? * இவற்றுள்நல்ல

மேலென்கோ? வினையின்மிக்கபயனென்கோ? * கண்ணனென்கோ?

மாலென்கோ? மாயனென்கோ? வானவராதியையே.

3052 வானவராதியென்கோ? வானவர்தெய்வமென்கோ? *

வானவர்போகமென்கோ? வானவர்முற்றுமென்கோ? *

ஊனமில்செல்வமென்கோ? ஊனமில்சுவர்க்கமென்கோ? *

ஊனமில்மோக்கமென்கோ? ஒளிமணிவண்ணனையே.

3053 ஒளிமணிவண்ணனென்கோ? ஒருவனென்றேத்தநின்ற *

நளிர்மதிச்சடையனென்கோ? நான்முகக்கடவுளென்கோ? *

அளிமகிழ்ந்துலகமெல்லாம் படைத்தவையேத்தநின்ற *

களிமலர்த்துளவனெம்மான் கண்ணனைமாயனையே.

3054 கண்ணனைமாயன்தன்னைக் கடல்கடைந்தமுதங்கொண்ட *

அண்ணலைஅச்சுதனை அனந்தனை அனந்தன்தன்மேல் *

நண்ணிநன்குறைகின்றானை ஞாலமுண்டுமிழ்ந்தமாலை *

எண்ணுமாறறியமாட்டேன்யாவையும்யவரும்தானே.

3055 யாவையும்யவரும்தானாய் அவரவர்சமயந்தோறும் *

தோய்விலன்புலனைந்துக்கும் சொலப்படான்உணர்வின் மூர்த்தி *

ஆவிசேருயிரினுள்ளால் ஆதுமோர்பற்றிலாத *

பாவனையதனைக்கூடில் அவனையுங்கூடலாமே.

3056 கூடிவண்டறையும்தண்தார்க் கொண்டல்போல் வண்ணன்தன்னை *

மாடலர்பொழில்குருகூர் வண்சடகோபன்சொன்ன *

பாடலோராயிரத்துள் இவையுமொருபத்தும்வல்லார் *

வீடிலபோகமெய்தி விரும்புவரமரர்மொய்த்தே (2)