1658 தெள்ளியீர்! தேவர்க்கும் தேவர் திருத்தக்கீர் *

வெள்ளியீர்! வெய்யவிழுநிதிவண்ணர் * ஓ!

துள்ளுநீர்க் கண்ணபுரம்தொழுதாளிவள்

கள்வியோ! * கைவளைகொள்வதுதக்கதே? (2)

1659 நீணிலாமுற்றத்து நின்றுஇவள்நோக்கினாள் *

காணுமோ! கண்ணபுரமென்றுகாட்டினாள் *

பாணனார்திண்ணமிருக்க இனிஇவள்

நாணுமோ? * நன்றுநன்றுநறையூரர்க்கே.

1660 அருவிசோர்வேங்கடம் நீர்மலையென்றுவாய்

வெருவினாள் * மெய்யம்வினவியிருக்கின்றாள் *

பெருகுசீர்க் கண்ணபுரமென்றுபேசினாள்

உருகினாள் * உள்மெலிந்தாள் இதுஎன்கொலோ? (2)

1661 உண்ணும்நாளில்லை உறக்கமுந்தானில்லை *

பெண்மையும் சாலநிறைந்திலள் பேதைதான் *

கண்ணனூர் கண்ணபுரம்தொழும், கார்க்கடல்

வண்ணர்மேல் * எண்ணம்இவட்கு இதுஎன்கொலோ?

1662 கண்ணனூர்கண்ணபுரம் தொழும்காரிகை *

பெண்மையும்தன்னுடை உண்மையுரைக்கின்றாள் *

வெண்ணெயுண்டுஆப்புண்ட வண்ணம்விளம்பினாள் *

வண்ணமும் பொன்னிறமாவதுஒழியுமே.

1663 வடவரைநின்றும்வந்து இன்றுகணபுரம் *

இடவகைகொள்வது யாமென்று பேசினாள் *

மடவரல்மாதர்என்பேதை இவர்க்குஇவள்

கடவதென்? * கண்துயில் இன்றுஇவர்கொள்ளவே.

1664 தரங்கநீர்பேசினும் தண்மதிகாயினும் *

இரங்குமோ? எத்தனைநாளிருந்துஎள்கினாள்? *

துரங்கம்வாய்கீண்டுகந்தானது தொன்மையூர் *

அரங்கமே யென்பது இவள்தனக்குஆசையே. (2)

1665 தொண்டெல்லாம்நின்னடியே தொழுதுய்யுமா

கண்டு * தான்கணபுரம் தொழப்போயினாள் *

வண்டுலாம்கோதைஎன்பேதை மணிநிறம்

கொண்டுதான் * கோயின்மைசெய்வது தக்கதே?

1666 முள்ளெயிறேய்ந்தில கூழைமுடிகொடா *

தெள்ளியளென்பதோர்தேசிலள் என்செய்கேன்? *

கள்ளவிழ்சோலைக் கணபுரம்கைதொழும்

பிள்ளையை * பிள்ளையென்றெண்ணப்பெறுவரே?

1667 கார்மலி கண்ணபுரத்தெம்மடிகளை *

பார்மலிமங்கையர்கோன் பரகாலன்சொல் *

சீர்மலிபாடல் இவைபத்தும்வல்லவர் *

நீர்மலிவையத்து நீடுநிற்பார்களே. (2)