1398 கைம்மானமழகளிற்றைக் கடல்கிடந்தகருமணியை *

மைம்மானமரதகத்தை மறையுரைத்ததிருமாலை *

எம்மானைஎனக்குஎன்றும்இனியானைப் பனிகாத்த

அம்மானை * யான்கண்டது அணிநீர்த்தென்னரங்கத்தே. (2)

1399 பேரானைக் குறுங்குடியெம்பெருமானை * திருதண்கா

லூரானைக் கரம்பனூருத்தமனை * முத்திலங்கு

காரார்திண்கடலேழும் மலையேழிவ்வுலகேழுண்டும் *

ஆராதென்றிருந்தானைக் கண்டதுதென்னரங்கத்தே. (2)

1400 ஏனாகிஉலகிடந்து அன்றிருநிலனும்பெருவிசும்பும் *

தானாயபெருமானைத் தன்னடியார்மனத்துஎன்றும் *

தேனாகியமுதாகித்திகழ்ந்தானை * மகிழ்ந்துஒருகால்

ஆனாயனானைக் கண்டதுதென்னரங்கத்தே.

1401 வளர்ந்தவனைத்தடங்கடலுள் வலியுருவில்திரிசகடம் *

தளர்ந்துதிரஉதைத்தவனைத் தரியாதுஅன்றுஇரணியனைப்

பிளந்தவனை * பெருநிலம்ஈரடிநீட்டிப் பண்டொருநாள்

அளந்தவனை * யான்கண்டது அணிநீர்த் தென்னரங்கத்தே.

1402 நீரழலாய் நெடுநிலனாய்நின்றானை * அன்று அரக்க

னூர் அழலாலுண்டானைக் கண்டார்பின்காணாமே *

பேரழலாய்ப்பெருவிசும்பாய்ப் பின்மறையோர் மந்திரத்தின் *

ஆரழலால்உண்டானைக் கண்டதுதென்னரங்கத்தே.

1403 தஞ்சினத்தைத்தவிர்த்தடைந்தார் தவநெறியை * தரியாது

கஞ்சனைக்கொன்று அன்றுஉலகமுண்டுஉமிழ்ந்த கற்பகத்தை *

வெஞ்சினத்தகொடுந்தொழிலோன் விசையுருவை அசைவித்த *

அஞ்சிறைப்புட்பாகனை யான்கண்டதுதென்னரங்கத்தே.

1404 சிந்தனையைத்தவநெறியைத் திருமாலை * பிரியாது

வந்துஎனதுமனத்துஇருந்த வடமலையை * வரிவண்டார்

கொந்தணைந்தபொழில்கோவல் உலகளப்பான் அடிநிமிர்த்த

அந்தணனை * யான்கண்டது அணிநீர்த்தென்னரங்கத்தே. (2)

1405 துவரித்தஉடையார்க்கும் தூய்மையில்லாச்சமணர்க்கும் *

அவர்கட்குஅங்குஅருளில்லா அருளானை * தன்னடைந்த

எமர்கட்கும்அடியேற்கும் எம்மாற்கும்எம்மனைக்கும் *

அமரர்க்கும்பிரானாரைக் கண்டதுதென்னரங்கத்தே.

1406 பொய்வண்ணம்மனத்தகற்றிப் புலனைந்தும்செலவைத்து *

மெய்வண்ணம்நினைந்தவர்க்கு மெய்ந்நின்றவித்தகனை *

மைவண்ணம்கருமுகில்போல் திகழ்வண்ணமரதகத்தின் *

அவ்வண்ணவண்ணனை யான்கண்டதுதென்னரங்கத்தே.

1407 ஆமருவிநிரைமேய்த்த அணியரங்கத்தம்மானை *

காமருசீர்க்கலிகன்றி ஒலிசெய்தமலிபுகழ்சேர் *

நாமருவுதமிழ்மாலை நாலிரண்டோடிரண்டினையும் *

தாமருவிவல்லார்மேல் சாரா தீவினைதானே. (2)