Thirukkadithānam

3618 எல்லியும்காலையும் தன்னைநினைந்தெழ *

நல்லவருள்கள் நமக்கேதந்தருள்செய்வான் *

அல்லியந்தண்ணந்துழாய்முடி அப்பனூர் *

செல்வர்கள்வாழும் திருக்கடித்தானமே. (2)

3619 திருக்கடித்தானமும் என்னுடைச்சிந்தையும் *

ஒருக்கடுத்து உள்ளேஉறையும்பிரான்கண்டீர் *

செருக்கடுத்து அன்றுதிகைத்தவரக்கரை *

உருக்கெட வாளிபொழிந்தஒருவனே.

3620 ஒருவரிருவர் ஓர்மூவரெனநின்று *

உருவுகரந்து உள்ளுந்தோறும்தித்திப்பான் *

திருவமர்மார்வன் திருக்கடித்தானத்தை *

மருவியுரைகின்ற மாயப்பிரானே.

3621 மாயப்பிரான் எனவல்வினைமாய்ந்தற *

நேயத்தினால் நெஞ்சம்நாடுகுடிகொண்டான் *

தேசத்தமரர் திருக்கடித்தானத்தை *

வாசப்பொழில் மன்னுகோயில்கொண்டானே.

3622 கோயில்கொண்டான் தன்திருக்கடித்தானத்தை *

கோயில்கொண்டான் அதனோடுமென்னெஞ்சகம் *

கோயில்கொள் தெய்வமெல்லாம்தொழ * வைகுந்தம்

கோயில்கொண்ட குடக்கூத்தவம்மானே.

3623 கூத்தவம்மான் கொடியேனிடர்முற்றவும் *

மாய்த்தவம்மான் மதுசூதவம்மானுறை *

பூத்தபொழில் தண்திருக்கடித்தானத்தை *

ஏத்தநில்லா குறிக்கொண்மின்இடரே.

3624 கொண்மின்இடர்கெட உள்ளத்துக்கோவிந்தன் *

மண்விண்முழுதும்அளந்த ஒண்தாமரை *

மண்ணவர்தாம்தொழ வானவர்தாம்வந்து *

நண்ணு திருக்கடித்தானநகரே.

3625 தானநகர்கள் தலைச்சிறந்தெங்கெங்கும் *

வானிந்நிலம்கடல் முற்றும்எம்மாயற்கே *

ஆனவிடத்தும் என்நெஞ்சும் திருக்கடித்

தானநகரும் * தனதாயப்பதியே.

3626 தாயப்பதிகள் தலைச்சிறந்தெங்கெங்கும் *

மாயத்தினால் மன்னிவீற்றிருந்தானுறை *

தேயத்தமரர் திருக்கடித்தானத்துள் *

ஆயர்க்கதிபதி அற்புதன்தானே.

3627 அற்புதன்நாராயணன் அரிவாமனன் *

நிற்பதுமேவி இருப்பதென்னெஞ்சகம் *

நற்புகழ்வேதியர் நான்மறைநின்றதிர் *

கற்பகச்சோலைத் திருக்கடித்தானமே.

3628 சோலைத்திருக்கடித்தானத்து உறைதிரு

மாலை * மதிள்குருகூர்ச் சடகோபன்சொல் *

பாலோடமுதன்ன ஆயிரத்துஇப்பத்தும் *

மேலைவைகுந்தத்து இருத்தும்வியந்தே. (2)