3662 நெடுமாற்கடிமைசெய்வேன்போல் அவனைக்கருதவஞ்சித்து *

தடுமாற்றற்றதீக்கதிகள் முற்றும்தவிர்ந்தசதிர்நினைந்தால் *

கொடுமாவினையேன்அவனடியாரடியே கூடுமிதுவல்லால் *

விடுமாறென்பதென்? அந்தோ! வியன்மூவுலகு பெறினுமே. (2)

3663 வியன்மூவுலகுபெறினும் போய்த்தானேதானேயானாலும் *

புயல்மேகம்போல்திருமேனியம்மான் புனைபூங்கழலடிக்கீழ் *

சயமேயடிமைதலைநின்றார் திருத்தாள்வணங்கி * இம்மையே

பயனேயின்பம்யான்பெற்றது உறுமோபாவியேனுக்கே?

3664 உறுமோபாவியேனுக்கு? இவ்வுலகம்மூன்றும்உடன்நிறைய *

சிறுமாமேனிநிமிர்த்த என்செந்தாமரைக்கண் திருக்குறளன் *

நறுமாவிரைநாள்மலரடிக்கீழ்ப் புகுதலன்றிஅவனடியார் *

சிறுமாமனிசராய்என்னையாண்டார் இங்கேதிரியவே.

3665 இங்கேதிரிந்தேற்இழுக்குற்றென்? இருமாநிலம் முன்னுண்டுமிழ்ந்த *

செங்கோலத்தபவளவாய்ச் செந்தாமரைக்கணென்னம் மான் *

பொங்கேழ்புகழ்கள்வாயவாய்ப் புலன்கொள்வடிவு என்மனத்ததாய் *

அங்கேய்மலர்கள்கையவாய் வழிபட்டோடஅருளிலே.

3666 வழிபட்டோடஅருள்பெற்று மாயன்கோலமலரடிக்கீழ் *

சுழிபட்டோடும்சுடர்ச்சோதிவெள்ளத்து இன்புற்றிருந்தாலும் *

இழிபட்டோடும் உடலினிற்பிறந்து தன்சீர்யான்கற்று *

மொழிபட்டோடும்கவியமுதம் நுகர்ச்சியுறுமோ? முழுதுமே.

3667 நுகர்ச்சியுறுமோ? மூவுலகின் வீடுபேறுதன்கேழில் *

புகர்ச்செம்முகத்தகளிறட்ட பொன்னாழிக்கை யென்னம்மான் *

நிகர்ச்செம்பங்கியெரிவிழிகள் நீண்டஅசுரருயிரெல்லாம் *

தகர்த்துண்டுழலும்புட்பாகன் பெரியதனிமாப்புகழே.

3668 தனிமாப்புகழே எஞ்ஞான்றும் நிற்கும்படியாத்தான் தோன்றி *

முனிமாப்பிரமமுதல்வித்தாய் உலகம்மூன்றும்முளைப்பித்த *

தனிமாத்தெய்வத்தளிரடிக்கீழ்ப் புகுதலன்றிஅவனடியார் *

நனிமாக்கலவியின்பமே நாளும்வாய்க்கநங்கட்கே.

3669 நாளும்வாய்க்கநங்கட்கு நளிர்நீர்க்கடலைப்படைத்து * தன்

தாளும்தோளும்முடிகளும் சமனிலாதபலபரப்பி *

நீளும்படர்பூங்கற்பகக்காவும் நிறைபன்னாயிற்றின் *

கோளுமுடையமணிமலைபோல் கிடந்தான்தமர்கள் கூட்டமே.

3670 தமர்கள்கூட்டவல்வினையை நாசஞ்செய்யும் சதிர்மூர்த்தி *

அமர்கொளாழி சங்குவாள் வில்தண்டாதிபல்படையன் *

குமரன்கோலவைங்கணைவேள்தாதை கோதிலடியார்தம் *

தமர்கள் தமர்கள்தமர்களாம் சதிரேவாய்க்கதமியேற்கே.

3671 வாய்க்கதமியேற்கு ஊழிதோறூழியூழி * மாகாயாம்

பூக்கொள்மேனிநான்குதோள் பொன்னாழிக்கை யென்னம்மான் *

நீக்கமில்லாவடியார்தம் அடியாரடியாரடியாரெங்

கோக்கள் * அவர்க்கேகுடிகளாய்ச்செல்லும் நல்ல கோட்பாடே.

3672 நல்லகோட்பாட்டுலகங்கள் மூன்றினுள்ளும்தான் நிறைந்த *

அல்லிக்கமலக்கண்ணனை அந்தண்குருகூர்ச்சடகோபன் *

சொல்லப்பட்ட ஆயிரத்துள் இவையும்பத்தும்வல்லார்கள் *

நல்லபதத்தால்மனைவாழ்வர் கொண்டபெண்டிர் மக்களே. (2)