3167 வீற்றிருந்தேழுலகும் தனிக்கோல்செல்ல, வீவில்சீர் *

ஆற்றல்மிக்காளுமம்மானை வெம்மாபிளந்தான்தன்னை *

போற்றியென்றேகைகளாரத் தொழுதுசொல்மாலைகள் *

ஏற்றநோற்றேற்கு இனியென்னகுறையெழுமையுமே? (2)

3168 மையகண்ணாள்மலர்மேலுறைவாள் உறைமார்பினன் *

செய்யகோலத்தடங்கண்ணன் விண்ணோர்பெருமான் தன்னை *

மொய்யசொல்லாலிசைமாலைகளேத்தி உள்ளப்பெற்றேன் *

வெய்யநோய்கள்முழுதும் வியன்ஞாலத்துவீயவே.

3169 வீவிலின்பமிக எல்லைநிகழ்ந்தநம்அச்சுதன் *

வீவில்சீரன்மலர்க்கண்ணன் விண்ணோர்பெருமான்தன்னை *

வீவில்காலமிசைமாலைகளேத்தி மேவப்பெற்றேன் *

வீவிலின்பமிக எல்லை நிகழ்ந்தனன்மேவியே.

3170 மேவிநின்றுதொழுவார் வினைபோகமேவும்பிரான் *

தூவியம்புள்ளுடையான் அடலாழியம்மான்தன்னை *

நாவியலாலிசைமாலைகளேத்தி நண்ணப்பெற்றேன் *

ஆவியென்னாவியை யானறியேன்செய்தவாற்றையே.

3171 ஆற்றநல்ல வகைகாட்டுமம்மானை * அமரர்தம்

ஏற்றைஎல்லாப்பொருளும்விரித்தானை எம்மான்தன்னை *

மாற்றமாலைபுனைந்தேத்தி நாளும்மகிழ்வெய்தினேன் *

காற்றின்முன்னங்கடுகி வினைநோய்கள்கரியவே.

3172 கரியமேனிமிசை வெளியநீறுசிறிதேயிடும் *

பெரியகோலத்தடங்கண்ணன் விண்ணோர்பெருமான் தன்னை *

உரியசொல்லாலிசைமாலைகளேத்தி உள்ளப்பெற்றேற்கு *

அரியதுண்டோ? எனக்கு இன்றுதொட்டும்இனி யென்றுமே.

3173 என்றுமொன்றாகிஒத்தாரும்மிக்கார்களும் * தன்தனக்

கின்றிநின்றானை எல்லாவுலகும்உடையான்தன்னை *

குன்றமொன்றால்மழைகாத்தபிரானைச் சொன்மாலைகள் *

நன்றுசூட்டும்விதியெய்தினம் என்னகுறைநமக்கே!

3174 நமக்கும்பூவின்மிசைநங்கைக்கும் இன்பனை * ஞாலத்தார்

தமக்கும் வானத்தவர்க்கும்பெருமானை * தண்தாமரை

சுமக்கும்பாதப்பெருமானைச் சொன்மாலைகள் * சொல்லுமாறு

அமைக்கவல்லேற்கு இனியாவர்நிகரகல்வானத்தே?

3175 வானத்தும்வானத்துள்ளும்பரும் மண்ணுள்ளும் மண்ணின்கீழ்த்

தானத்தும் * எண்திசையும் தவிராதுநின்றான்தன்னை *

கூனற்சங்கத்தடக்கையவனைக் குடமாடியை வானக்

கோனை * கவிசொல்லவல்லேற்கு இனிமாறுண்டோ?

3176 உண்டுமுமிழ்ந்தும்கடந்துமிடந்தும் கிடந்தும்நின்றும் *

கொண்டகோலத்தொடுவீற்றிருந்தும் மணங்கூடியும் *

கண்டவாற்றால் தனதேயுலகெனநின்றான்தன்னை *

வண்தமிழ்நூற்கநோற்றேன் அடியார்க்கின்பமாரியே.

3177 மாரிமாறாததண்ணம்மலை வேங்கடத்தண்ணலை *

வாரிமாறாதபைம்பூம்பொழில்சூழ் குருகூர்நகர் *

காரிமாறன்சடகோபன் சொல்லாயிரத்திப்பத்தால் *

வேரிமாறாதபூமேலிருப்பாள் வினைதீர்க்குமே. (2)