2857 பிறவித்துயரற ஞானத்துள் நின்று *

துறவிச்சுடர்விளக்கம் தலைப்பெய்வார் *

அறவனை ஆழிப்படையந்தணனை *

மறவியையின்றி மனத்துவைப்பாரே. (2)

2858 வைப்பாம்மருந்தாம் அடியரை * வல்வினைத்

துப்பாம்புலனைந்தும் துஞ்சக்கொடானவன் *

எப்பால்யவர்க்கும் நலத்தாலுயர்ந்துயர்ந்து *

அப்பாலவன் எங்களாயர்கொழுந்தே.

2859 ஆயர்கொழுந்தாய் அவராற்புடையுண்ணும் *

மாயப்பிரானை என்மாணிக்கச்சோதியை *

தூயவமுதைப் பருகிப்பருகி * என்

மாயப்பிறவி மயர்வறுத்தேனே.

2860 மயர்வறவென்மனத்தே மன்னினான்தன்னை *

உயர்வினையேதரும் ஒண்சுடர்க்கற்றையை *

அயர்விலமரர்கள் ஆதிக்கொழுந்தை * என்

இசைவினை என்சொல்லியான்விடுவேனோ?

2861 விடுவேனோ? என்விளக்கை என்னாவியை *

நடுவேவந்து உய்யக்கொள்கின்றநாதனை *

தொடுவேசெய்து இளவாய்ச்சியர் கண்ணினுள் *

விடவேசெய்து விழிக்கும்பிரானையே.

2862 பிரான் பெருநிலங்கீண்டவன் * பின்னும்

விராய் மலர்த்துழாய்வேய்ந்தமுடியன் *

மராமரமெய்தமாயவன் * என்னுள்

இரானெனில் பின்னையானொட்டுவேனோ?

2863 யானொட்டியென்னுள் இருத்துவமென்றிலன் *

தானொட்டிவந்து என்தனிநெஞ்சைவஞ்சித்து *

ஊனொட்டிநின்று என்உயிரில்கலந்து * இயல்

வானொட்டுமோ? இனியென்னைநெகிழ்க்கவே.

2864 என்னைநெகிழ்க்கிலும் என்னுடைநன்னெஞ்சந்

தன்னை * அகல்விக்கத் தானும்கில்லானினி *

பின்னைநெடும்பணைத்தோள் மகிழ்பீடுடை *

முன்னையமரர் முழுமுதலானே.

2865 அமரர்முழுமுதல் ஆகியவாதியை *

அமரர்க்கமுதீந்த ஆயர்கொழுந்தை *

அமரவழும்பத் துழாவிஎன்னாவி *

அமரத்தழுவிற்று இனியகலுமோ?

2866 அகலிலகலும் அணுகிலணுகும் *

புகலுமரியன் பொருவல்லனெம்மான் *

நிகரிலவன்புகழ் பாடியிளைப்பிலம் *

பகலுமிரவும் படிந்துகுடைந்தே.

2867 குடைந்துவண்டுண்ணும் துழாய்முடியானை *

அடைந்த தென்குருகூர்ச்சடகோபன் *

மிடைந்தசொல்தொடை ஆயிரத்திப்பத்து *

உடைந்துநோய்களை ஓடுவிக்குமே. (2)