1048 வானவர்தங்கள்சிந்தைபோலே என் நெஞ்சமே! இனிதுவந்து * மாதவ

மானவர்தங்கள்சிந்தை அமர்ந்துறைகின்றஎந்தை *

கானவரிடுகாரகிற்புகை ஓங்குவேங்கடம்மேவி * மாண்குற

ளான அந்தணற்குஇன்றுஅடிமைத்தொழில்பூண்டாயே. (2)

1049 உறவுசுற்றமென்றொன்றிலா ஒருவன்உகந்தவர்தம்மை * மண்மிசைப்

பிறவியேகெடுப்பான் அதுகண்டு என்நெஞ்சமென்பாய்! *

குறவர்மாதர்களோடுவண்டுகுறிஞ்சிமருளிசைபாடும் வேங்கடத்து *

அறவனாயகற்கு இன்றுஅடிமைத்தொழில்பூண்டாயே.

1050 இண்டையாயினகொண்டு தொண்டர்களேத்துவாருறவோடும் * வானிடைக்

கொண்டுபோயிடவும் அதுகண்டுஎன்நெஞ்சமென்பாய்! *

வண்டுவாழ்வடவேங்கடமலை கோயில்கொண்டதனோடும் * மீமிசை

அண்டமாண்டிருப்பாற்கு அடிமைத்தொழில்பூண்டாயே.

1051 பாவியாதுசெய் தாயென் னெஞ்சமே! பண்டுதொண்டு செய்தாரை * மண்மிசை

மேவிஆட்கொண்டுபோய் விசும்பேறவைக்கும்எந்தை *

கோவிநாயகன்கொண்டலுந்துயர் வேங்கடமலையாண்டு * வானவர்

ஆவியாயிருப்பாற்கு அடிமைத்தொழில்பூண்டாயே.

1052 பொங்குபோதியும்பிண்டியும்முடைப் புத்தர்நோன்பியர் பள்ளியுள்ளுறை *

தங்கள்தேவரும்தாங்களுமேயாக என்நெஞ்சமென்பாய்! *

எங்கும்வானவர்தானவர் நிறைந்தேத்தும்வேங்கடம்மேவி நின்றருள் *

அங்கணாயகற்கு இன்று அடிமைத்தொழில்பூண்டாயே.

1053 துவரியாடையர்மட்டையர் சமண்தொண்டர்கள் மண்டியுண்டுபின்னரும் *

தமரும் தாங்களுமேதடிக்க என்நெஞ்சமென்பாய்! *

கவரிமாக்கணம்சேரும்வேங்கடம்கோயில்கொண்ட கண்ணார்விசும்பிடை *

அமரநாயகற்கு இன்று அடிமைத்தொழில்பூண்டாயே.

1054 தருக்கினால்சமண்செய்து சோறுதண்தயிரினால்திரளை * மிடற்றிடை

நெருக்குவார்அலக்கணதுகண்டு என்நெஞ்சமென்பாய்! *

மருட்கள்வண்டுகள்பாடும் வேங்கடம்கோயில் கொண்டதனோடும் * வானிடை

அருக்கன்மேவிநிற்பாற்கு அடிமைத்தொழில்பூண்டாயே.

1055 சேயன்அணியன்சிறியன்பெரியனென்பது சிலர்பேசக்கேட்டிருந்தே *

என்நெஞ்சமென்பாய்! * எனக்குஒன்றுசொல்லாதே *

வேய்கள்நின்றுவெண்முத்தமேசொரி வேங்கடமலை கோயில்மேவிய *

ஆயர்நாயகற்குஇன்று அடிமைத்தொழில்பூண்டாயே.

1056 கூடியாடியுரைத்ததேஉரைத்தாய் என்நெஞ்சமென்பாய்! துணிந்துகேள் *

பாடியாடிப்பலரும் பணிந்தேத்திக் காண்கிலர் *

ஆடுதாமரையோனும்ஈசனும் அமரர்கோனும் நின்றேத்தும் * வேங்கடத்து

ஆடுகூத்தனுக்குஇன்று அடிமைத்தொழில்பூண்டாயே.

1057 மின்னுமாமுகில்மேவு தண்திருவேங்கடமலை கோயில்மேவிய *

அன்னமாய்நிகழ்ந்த அமரர்பெருமானை *

கன்னிமாமதிள்மங்கையர்கலிகன்றி இந்தமிழாலுரைத்த * இம்

மன்னுபாடல்வல்லார்க்கு இடமாகும்வானுலகே. (2)