1952 குன்றமொன்றெடுத்தேந்தி * மாமழை

அன்றுகாத்தஅம்மான் * அரக்கரை

வென்றவில்லியார் வீரமேகொலோ? *

தென்றல்வந்து தீவீசும்என்செய்கேன்? (2)

1953 காரும்வார்பனிக் கடலும், அன்னவன் *

தாரும்மார்வமும் கண்டதண்டமோ? *

சோருமாமுகில் துளியினூடுவந்து *

ஈரவாடைதான் ஈருமென்னையே.

1954 சங்குமாமையும் தளருமேனிமேல் *

திங்கள்வெங்கதிர் சீறும்என்செய்கேன்? *

பொங்குவெண்திரைப் புணரிவண்ணனார் *

கொங்கலார்ந்ததார் கூவும்என்னையே.

1955 அங்கோராய்க்குலத்துள் வளர்ந்துசென்று *

அங்கோர் தாயுருவாகிவந்தவள் *

கொங்கைநஞ்சுண்ட கோயின்மைகொலோ? *

திங்கள்வெங்கதிர் சீறுகின்றதே.

1956 அங்குஒராளரியாய் அவுணனை *

பங்கமா இருகூறுசெய்தவன் *

மங்குல்மாமதி வாங்கவேகொலோ? *

பொங்குமாகடல் புலம்புகின்றதே.

1957 சென்றுவார்சிலைவளைத்து * இலங்கையை

வென்றவில்லியார் வீரமேகொலோ? *

முன்றில்பெண்ணைமேல் முளரிக்கூட்டகத்து *

அன்றிலின்குரல் அடரும்என்னையே.

1958 பூவைவண்ணனார் புள்ளின்மேல்வர *

மேவிநின்றுநான் கண்டதண்டமோ? *

வீவிலைங்கணை வில்லிஅம்புகோத்து *

ஆவியே இலக்காகஎய்வதே.

1959 மால்இனந்துழாய் வரும்என்நெஞ்சகம் *

மாலின்அந்துழாய் வந்துஎன்னுள்புக *

கோலவாடையும் கொண்டுவந்தது * ஓர்

ஆலிவந்ததால் அரிதுகாவலே.

1960 கொண்டையொண்கணும்துயிலும் * என்னிறம்

பண்டுபண்டுபோலொக்கும் * மிக்கசீர்த்

தொண்டரிட்ட பூந்துளவின்வாசமே *

வண்டுகொண்டுவந்து ஊதுமாகிலே.

1961 அன்றுபாரதத்து ஐவர்தூதனாய் *

சென்றமாயனைச் செங்கண்மாலினை *

மன்றிலார்புகழ் மங்கைவாள்கலி

கன்றி * சொல்வல்லார்க்கு அல்லலில்லையே. (2)