1628 கள்ளம்மனம்விள்ளும்வகை கருதிக்கழல்தொழுவீர் *

வெள்ளம்முதுபரவைத் திரைவிரிய * கரையெங்கும்

தெள்ளும்மணிதிகழும் சிறுபுலியூர்ச்சலசயனத்

துள்ளும் * எனதுள்ளத்துள்ளும் உறைவாரையுள்ளீரே. (2)

1629 தெருவில்திரிசிறுநோன்பியர் செஞ்சோற்றொடுகஞ்சி

மருவி * பிரிந்தவர்வாய்மொழி மதியாதுவந்தடைவீர் *

திருவிற்பொலிமறையோர் சிறுபுலியூர்ச்சலசயனத்து *

உருவக்குறளடிகள் அடியுணர்மின்உணர்வீரே.

1630 பறையும்வினைதொழுதுஉய்ம்மினீர் பணியும்சிறுதொண்டீர் *

அறையும்புனல்ஒருபால் வயல்ஒருபால் பொழில்ஒருபால் *

சிறைவண்டினமறையும் சிறுபுலியூர்ச்சலசயனத்து

உறையும் * இறையடியல்லது ஒன்றுஇறையும்அறியேனே.

1631 வானார்மதிபொதியும்சடை மழுவாளியொடுஒருபால் *

தானாகியதலைவனவன் அமரர்க்கதிபதியாம் *

தேனார்பொழில்தழுவும் சிறுபுலியூர்ச்சலசயனத்து

ஆனாயனது * அடியல்லது ஒன்றுஅறியேன்அடியேனே.

1632 நந்தாநெடுநரகத்திடை நணுகாவகை * நாளும்

எந்தாய்! என இமையோர்தொழுதேத்தும்இடம் * எறிநீர்ச்

செந்தாமரைமலரும் சிறுபுலியூர்ச்சலசயனத்து *

அந்தாமரையடியாய்! உன தடியேற்குஅருள்புரியே.

1633 முழுநீலமும்மலராம்பலும் அரவிந்தமும்விரவி *

கழுநீரொடுமடவாரவர் கண்வாய்முகம்மலரும் *

செழுநீர்வயல்தழுவும் சிறுபுலியூர்ச்சலசயனம் *

தொழுநீர்மையதுடையார் அடிதொழுவார்துயரிலரே.

1634 சேயோங்குதண் திருமாலிருஞ்சோலைமலைஉறையும்

மாயா! * எனக்குரையாய்இது மறைநான்கினுளாயோ? *

தீயோம்புகைமறையோர் சிறுபுலியூர்ச்சலசயனத்

தாயோ? * உனதடியார்மனத்தாயோ? அறியேனே. (2)

1635 மையார்வரிநீலம் மலர்க்கண்ணார்மனம்விட்டிட்டு *

உய்வானுனகழலே தொழுதுஎழுவேன் * கிளிமடவார்

செவ்வாய்மொழிபயிலும் சிறுபுலியூர்ச்சலசயனத்து *

ஐவாயரவணைமேல் உறையமலா! அருளாயே.

1636 கருமாமுகிலுருவா! கனலுருவா! புனலுருவா! *

பெருமால்வரையுருவா! பிறவுருவா! நினதுருவா! *

திருமாமகள்மருவும் சிறுபுலியூர்ச்சலசயனத்து *

அருமாகடலமுதே! உனதுஅடியேசரணாமே. (2)

1637 சீரார்நெடுமறுகில் சிறுபுலியூர்ச்சலசயனத்து *

ஏரார்முகில்வண்ணன்தனை இமையோர்பெருமானை *

காரார்வயல்மங்கைக்கிறை கலியனொலிமாலை *

பாரார்இவைபரவித்தொழப் பாவம்பயிலாவே. (2)