3541 என்றைக்குமென்னை உய்யக்கொண்டுபோகிய *

அன்றைக்கன்றென்னைத் தன்னாக்கிஎன்னால்தன்னை *

இன்தமிழ்பாடியவீசனை ஆதியாய்

நின்றஎன்சோதியை * என்சொல்லிநிற்பனோ? (2)

3542 என்சொல்லிநிற்பன்? என்னின்னுயிரின்றொன்றாய் *

என்சொல்லால்யான்சொன்ன இன்கவியென்பித்து *

தன்சொல்லால்தான்தன்னைக் கீர்த்தித்தமாயன் * என்

முன்சொல்லும் மூவுருவாம்முதல்வனே.

3543 ஆமுதல்வனிவனென்று தற்றேற்றி * என்

நாமுதல்வந்துபுகுந்து நல்லின்கவி *

தூமுதற்பத்தர்க்குத் தான்தன்னைச்சொன்ன * என்

வாய்முதலப்பனை என்றுமறப்பனோ?

3544 அப்பனையென்றுமறப்பன்? என்னாகியே *

தப்புதலின்றித் தனைக்கவிதான்சொல்லி *

ஒப்பிலாத்தீவினையேனை உய்யக்கொண்டு *

செப்பமேசெய்து திரிகின்றசீர்கண்டே.

3545 சீர்கண்டுகொண்டு திருந்துநல்லின்கவி *

நேர்படயான்சொல்லும் நீர்மையிலாமையில் *

ஏர்விலாஎன்னைத் தன்னாக்கிஎன்னால்தன்னை *

பார்பரவின்கவி பாடும்பரமரே.

3546 இன்கவிபாடும் பரமகவிகளால் *

தன்கவிதான் தன்னைப்பாடுவியாது * இன்று

நன்குவந்தென்னுடனாக்கி என்னால்தன்னை *

வன்கவிபாடும் என்வைகுந்தநாதனே.

3547 வைகுந்தநாதன் என்வல்வினைமாய்ந்தற *

செய்குந்தன் தன்னை என்னாக்கிஎன்னால்தன்னை *

வைகுந்தனாகப்புகழ வண்தீங்கவி *

செய்குந்தன்தன்னை எந்நாள்சிந்தித்தார்வனோ?

3548 ஆர்வனோ? ஆழியங்கை எம்பிரான்புகழ் *

பார்விண்நீர்முற்றும் கலந்துபருகிலும் *

ஏர்விலாஎன்னைத் தன்னாக்கிஎன்னால்தன்னை *

சீர்பெறஇன்கவி சொன்னதிறத்துக்கே.

3549 திறத்துக்கேதுப்புரவாம் திருமாலின்சீர் *

இறப்பெதிர்காலம் பருகிலுமார்வனோ? *

மறப்பிலா என்னைத் தன்னாக்கிஎன்னால்தன்னை *

உறப்பலஇன்கவி சொன்னவுதவிக்கே.

3550 உதவிக்கைம்மாறு என்னுயிர்என்னவுற்றெண்ணில் *

அதுவும்மற்றாங்கவன் தன்னது, என்னால்தன்னை *

பதவியஇன்கவி பாடியஅப்பனுக்கு *

எதுவுமொன்றுமில்லை செய்வதிங்குமங்கே.

3551 இங்குமங்கும் திருமாலன்றியின்மைகண்டு *

அங்ஙனேவண்குருகூர்ச்சடகோபன் *

இங்ஙனேசொன்ன ஓராயிரத்துஇப்பத்தும் *

எங்ஙனேசொல்லினும் இன்பம்பயக்குமே. (2)