1078 அன்றாயர்குலக்கொடியோடு

அணிமாமலர்மங்கையொடுஅன்பளவி * அவுணர்க்கு

என்தானும் இரக்கமிலாதவனுக்கு

உறையுமிடமாவது * இரும்பொழில்சூழ்

நன்றாயபுனல்நறையூர்திருவாலிகுடந்தை

தடந்திகழ் கோவல்நகர் *

நின்றான்இருந்தான்கிடந்தான்நடந்தாற்குஇடம்

மாமலையாவதுநீர்மலையே. (2)

1079 காண்டாவனமென்பதுஓர்காடு

அமரர்க்கரையன்னதுகண்டவன் நிற்க * முனே

மூண்டாரழலுண்ணமுனிந்ததுவும் அதுவன்றியும்

முன்னுல கம்பொறைதீர்த்து

ஆண்டான் * அவுணனவன்மார்பகலம்

உகிரால்வகிராகமுனிந்து * அரியாய்

நீண்டான் குறளாகிநிமிர்ந்தவனுக்குஇடம்

மாமலையாவதுநீர்மலையே.

1080 அலமன்னுமடல்சுரிசங்கமெடுத்து

அடலாழியினால் அணியாருருவின் *

புலமன்னுவடம்புனை கொங்கையினாள்

பொறைதீரமுனாள்அடுவாளமரில் *

பலமன்னர்படச்சுடராழியினைப்

பகலோன்மறையப் பணிகொண்டு * அணிசேர்

நிலமன்னனுமாய் உலகாண்டவனுக்குஇடம்

மாமலையாவதுநீர்மலையே.

1081 தாங்காததொராளரியாய் அவுணன்தனை

வீடமுனிந்து அவனாலமரும் *

பூங்கோதையர்பொங்கெரிமூழ்கவிளைத்து

அதுவன்றியும்வென்றிகொள்வாளமரில் *

பாங்காக முன்ஐவரொடு அன்பளவிப்

பதிற்றைந்திரட்டிப்படைவேந்தர்பட *

நீங்காச்செருவில்நிறைகாத்தவனுக்குஇடம்

மாமலையாவதுநீர்மலையே.

1082 மாலும்கடலாரமலைக்குவடிட்டு அணைகட்டி

வரம்புருவ * மதிசேர்

கோலமதிளாயஇலங்கைகெடப் படை

தொட்டுஒருகால்அமரிலதிர *

காலமிதுவென்றுஅயன்வாளியினால்

கதிர்நீண்முடிபத்தும்அறுத்தமரும் *

நீலமுகில்வண்ணனெ மக்கிறைவற்குஇடம்

மாமலையாவதுநீர்மலையே.

1083 பாராருலகும்பனிமால்வரையும்

கடலும்சுடரும்இவையுண்டும் * எனக்கு

ஆராதெனநின்றவன்எம்பெருமான்

அலைநீருலகுக்கு அரசாகிய * அப்

பேரானைமுனிந்தமுனிக்கரையன்

பிறரில்லைநுனக்கெனும்எல்லையினான் *

நீரார்பேரான்நெடுமாலவனுக்குஇடம்

மாமலையாவதுநீர்மலையே.

1084 புகராருருவாகிமுனிந்தவனைப்

புகழ்வீடமுனிந்து, உயிருண்டு * அசுரன்

நகராயினபாழ்படநாமமெறிந்து அதுவன்றியும்

வென்றிகொள்வாளவுணன் *

பகராதவனாயிரநாமம்அடிப்

பணியாதவனை, பணியால்அமரில் *

நிகராயவன்நெஞ்சிடந்தானவனுக்குஇடம்

மாமலையாவதுநீர்மலையே.

1085 பிச்சச்சிறுபீலிபிடித்துஉலகில்

பிணந்தின்மடவாரவர்போல் * அங்ஙனே

அச்சமிலர்நாணிலராதன்மையால்

அவர்செய்கைவெறுத்துஅணிமாமலர்தூய் *

நச்சிநமனார்அடையாமைநமக்கருள்செய்யென

உள்குழைந்து, ஆர்வமொடு *

நிச்சம்நினைவார்க்கருள்செய்யுமவற்குஇடம்

மாமலையாவதுநீர்மலையே.

1086 பேசுமளவன்றுஇதுவம்மின்நமர்!

பிறர்கேட்பதன்முன், பணிவார்வினைகள் *

நாசமதுசெய்திடுமாதன்மையால்

அதுவேநமதுஉய்விடம் நாள்மலர்மேல்

வாசமணிவண்டறைபைம்புறவில்

மனமைந்தொடுநைந்துழல்வார் * மதியில்

நீசரவர்சென்றடையாதவனுக்குஇடம்

மாமலையாவதுநீர்மலையே.

1087 நெடுமாலவன்மேவியநீர்மலைமேல்

நிலவும்புகழ்மங்கையர்கோன் * அமரில்

கடமாகளியானைவல்லான்கலிய

னொலிசெய் தமிழ்மாலைவல்லார்க்கு * உடனே

விடுமால்வினை வேண்டிடில்மேலுலகும்

எளிதாயிடும், அன்றிஇலங்கொலிசேர் *

கொடுமாகடல்வையகம்ஆண்டு மதிக்

குடைமன்னவராய்அடிகூடுவரே. (2)