1318 கவளயானைக்கொம்பொசித்த கண்ணனென்றும் * காமருசீர்க்

குவளைமேகமன்னமேனிகொண்டகோன் என்னானை யென்றும் *

தவளமாடநீடுநாங்கைத் தாமரையாள்கேள்வனென்றும் *

பவளவாயாள்என்மடந்தை பார்த்தன்பள்ளி பாடுவாளே. (2)

1319 கஞ்சன்விட்டவெஞ்சினத்த களிறடர்த்தகாளையென்றும் *

வஞ்சமேவிவந்தபேயின் உயிரையுண்டமாயனென்றும் *

செஞ்சொலாளர்நீடுநாங்கைத் தேவதேவனென்றென்றோதி *

பஞ்சியன்னமெல்லடியாள் பார்த்தன்பள்ளிபாடுவாளே.

1320 அண்டர்கோன்என்னானையென்றும் ஆயர்மாதர்கொங்கைபுல்கு

செண்டனென்றும் * நான்மறைகள்தேடியோடும் செல்வனென்றும் *

வண்டுலவுபொழில்கொள்நாங்கை மன்னுமாயனென்றென்றோதி *

பண்டுபோலன்றுஎன்மடந்தை பார்த்தன்பள்ளிபாடுவாளே.

1321 கொல்லையானாள்பரிசழிந்தாள் கோல்வளையார்தம் முகப்பே *

மல்லைமுந்நீர்தட்டிலங்கை கட்டழித்தமாயனென்றும் *

செல்வம்மல்குமறையோர்நாங்கைத் தேவதேவனென்றென்றோதி *

பல்வளையாள்என்மடந்தை பார்த்தன்பள்ளிபாடுவாளே.

1322 அரக்கராவிமாளஅன்று ஆழ்கடல்சூழிலங்கைசெற்ற *

குரக்கரசனென்றும் கோலவில்லியென்றும் * மாமதியை

நெருக்குமாடநீடுநாங்கை நின்மலன்தானென்றென்றோதி *

பரக்கழிந்தாள்என்மடந்தை பார்த்தன்பள்ளிபாடுவாளே.

1323 ஞாலமுற்றும்உண்டுமிழ்ந்த நாதனென்றும் * நானிலம்சூழ்

வேலையன்னகோலமேனி வண்ணனென்றும் * மேலெழுந்து

சேலுகளும்வயல்கொள்நாங்கைத் தேவதேவனென்றென்றோதி *

பாலின்நல்லமென்மொழியாள் பார்த்தன்பள்ளிபாடுவாளே.

1324 நாடிஎன்தன்உள்ளம்கொண்ட நாதனென்றும் * நான்மறைகள்

தேடியென்றும்காணமாட்டாச் செல்வனென்றும் * சிறைகொள்வண்டு

சேடுலவுபொழில்கொள்நாங்கைத் தேவதேவனென்றென்றோதி *

பாடகம்சேர்மெல்லடியாள் பார்த்தன்பள்ளிபாடுவாளே.

1325 உலகமேத்தும்ஒருவனென்றும் ஒண்சுடரோடுஉம்பரெய்தா *

நிலவும்ஆழிப்படையனென்றும் நேசனென்றும் * தென்திசைக்குத்

திலதமன்னமறையோர்நாங்கைத் தேவதேவனென்றென்றோதி *

பலருமேசஎன்மடந்தை பார்த்தன்பள்ளிபாடுவாளே.

1326 கண்ணனென்றும் வானவர்கள்காதலித்துமலர்கள்தூவும் *

எண்ணனென்றும் இன்பனென்றும்ஏழுலகுக்காதிஎன்றும் *

திண்ணமாடநீடுநாங்கைத் தேவதேவனென்றென்றோதி *

பண்ணினன்னமென்மொழியாள் பார்த்தன்பள்ளிபாடுவாளே.

1327 பாருள்நல்லமறையோர்நாங்கைப் பார்த்தன்பள்ளிச்செங்கண்மாலை *

வார்கொள்நல்லமுலைமடவாள்பாடலைத் தாய்மொழிந்தமாற்றம் *

கூர்கொள்நல்லவேல்கலியன் கூறுதமிழ்பத்தும்வல்லார் *

ஏர்கொள்நல்லவைகுந்தத்துள் இன்பம்நாளும் எய்துவாரே. (2)